Nalay atension na saray researcher ed saray piraso na 3,000 taon lan ceramic a buyog ya akotkot nen 2012. Antoy nikadkaduma ed sayan buyog? Aliwan saramay piraso noagta samay akasulat ed satan.

Nen atuop iratan a siansia na saray archaeologist, naamtaan dan akasulat ditan iray pigaran letra na saray Canaanita. Oniay nabasa: “Eshba’al Ben [anak nen] Beda’.” First time ya nalmo na saray archaeologist iyan ngaran diad daan iran sulsulat.

Diad tua, wala ni sakey ya Eshbaal ya abitlad Biblia—sakey ed saray anak nen Arin Saul. (1 Awa. 8:33; 9:39) Oniay imbaga nen Professor Yosef Garfinkel ya kaibad saray nankotkot: “Makapainteres ya naamtaan a say ngaran ya Eshbaal et nabasad Biblia, balet dia labat ed uley nen Arin David, tan natan et wala met lad rekord na archaeology.” Kanian iisipen na arum ya diad saman labat a panaon ya walay ontan a ngaran. Sakey lamet iyan detalye ed Biblia ya susuportaan na saray ebidensya na archaeology.

Diad Biblia, say ngaran ya Eshbaal et nabasa met ya Is-boset, say “baal” et sinalatan na “boset.” (2 Sam. 2:10) Akin? “Diad II Samuel singa agda labay ya usaren so ngaran ya Eshbaal, ya pakanodnonotan ed dios na bagyo na saray Canaanita,” so impaliwawa na saray researcher, “balet say orihinal ya ngaran . . . et pinansiansia ed Libro na Awaran.”