Onlad karga

Onlad saray karga

Matoor ya Kaaro No Nasusubok so Pankakaaro

Matoor ya Kaaro No Nasusubok so Pankakaaro

Si Gianni tan Maurizio et 50 taon lan sankaaro. Balet, walay panaon ya asubok so pankakaaro da. Impaliwawa nen Maurizio: “Nen walay mairap ya situasyon, akagawa ak na seryoso iran lingo kanian inmarawi liknaan mid sakey tan sakey.” Inyarum nen Gianni: “Si Maurizio so angiyaral ed siak na Biblia. Sikatoy mamapabiskeg ed siak ed espiritual. Kanian singa agko natanggap so ginawa to. Asakitan ak a maong ta antak ya alamatan so pankakaaro mi. Maer-ermen ak.”

SARAY maapit ya kaaro et mabmabli, tan say legay bilay a pankakaaro et aliwan nibanbana. No nasubok so pankakaaro, antoy makatulong pian naprotektaan itan? Dakel so naaralan tayod pigaran totoo ya abitlad Biblia ya malet a sankaaro balet ta asubok so pankakaaro da.

NO NALINGO SO KAARO

Si David ya sakey a pastol tan ari et wala ray maapit ya kaaro to. Nayarin say nanonotan mo et si Jonatan. (1 Sam. 18:1) Balet, wala ni ray arum ya kakaaro nen David, say sakey et si propeta Natan. Ag-ibabaga na Biblia no kapigan ira nagmaliw a sankaaro. Balet aminsan et walay importantin imbaga nen David ed kaaro ton si Natan. Labay nen David so manpaalagey na abung parad si Jehova. Seguradon importantid ari so opinyon nen Natan ta kaaro to tan sikatoy aabobonan nen Jehova.2 Sam. 7:2, 3.

Balet walay agawa ya anubok ed pankakaaro da. Akikalugoran si David ed si Bat-sheba, tan impapatey toy asawa nen Bat-sheba ya si Urias. (2 Sam. 11:2-21) Diad  dakel a taon, nansiansian matoor si David ed si Jehova tan impanengneng toy inkahustisya. Balet akagaway seryoson kasalanan! Antoy agawad sayan maong ya ari? Kasin agto atebek ya aliwa lay gagawaen to? Kasin inisip to ya niyamot to itan ed Dios?

Antoy gawaen nen Natan? Kasin mangibaki na arum ya mitongtong ed ari? Wala ray makaamta ya implano nen David so pamatey ed si Urias. Kanian akin ya mibali ni si Natan tan ipeligro toy abaybayag lan pankakaaro da? Ompan napeligro ni ingen so bilay nen Natan no mansalita ta impapatey nen David so inosentin si Urias.

Balet si Natan et propeta na Dios. Amta to ya no agmansalita, aliwa lan singa dati so pankakaaro da tan nakonsiensia. Nankasalanan so kaaro ton si David kanian ag-inabobonan nen Jehova. Kakkaukolan na ari so tulong pian nipetek. On, kaukolan nen David so tuan kaaro. Ontan ya kaaro si Natan. Angusar na ilustrasyon ya onsabid puso na datin pastol. Impasabi nen Natan so mensahe na Dios diad paraan ya namoria nen David so inkaseryoso na kasalanan to tan napakiwas ya magbabawi.2 Sam. 12:1-14.

Antoy gawaen mo no walay kaarom ya alingo odino akagaway seryoson kasalanan? Ompan natukso kan ikatunongan ya no ibagam so lingo to et naderal so pankakaaro yo. Odino isipen mo ya traidor kad pankakaaro yo no ipaamtam so kasalanan to ed saray elder, ya makatulong ed sikato. Antoy gawaen mo?

Oniay nanonotan nen Gianni ya abitla nen niman: “Alikas kon walay anguman. Aliwa lan maistoryay Maurizio. Nandesisyon ak ya asinggeran ko, anggano mair-irap ya gawaen. Inisip ko: ‘Antoy ibagak ed sikato ya agto ni amta? Ompan manpasnok!’ Balet nen anonotan ko iramay inaral mi, awalaan ak na pakpel ya mitongtong ed sikato. Ontan met so gagawaen nen Maurizio no kaukolan koy tulong. Agko labay ya naderal so pankakaaro mi, balet labay kon tulongan ta iyaansakit ko.”

Inyarum nen Maurizio: “Walay malasakit nen Gianni—tan dugay ginawa to. Antak ya agto kasalanan tan agmet kasalanan nen Jehova so agawad siak. Kanian inawat koy disiplina, tan asabi panaon et binmiskeg lamet so espiritualidad ko.”

NO NAPROBLEMA SO KAARO

Wala ni arum ya kaaro nen David ya nanmatoor ed sikato nen aproblema. Sakey ed sikara si Husai, ya atawag ed Biblia ya “kaaro nen David.” (2 Sam. 16:16; 1 Awa. 27:33) Nayarin sikatoy sakey ya opisyal ed palasyo ya kaaro tan kaiba na ari, tan no maminsan et sikatoy igaganggan ya manggawad saray kompidensyal ya misyon.

Nen sinamsam nen Absalom ya anak nen David so trono, dakel ya Israelita so dinmapag ed si Absalom, balet agkaiba si Husai. Nen ontatakas si David, sikatoy inabet nen Husai. Asakitan ya maong si David ta trinaidor na mismon anak to tan arum nin panmamatalkan to. Balet nansiansian matoor si Husai, tan akaparaan ya irisgay bilay to tan gawaey misyon ya maneral ed sabwatan. Ginawa itan nen Husai aliwan lapud obligasyon to bilang opisyal na palasyo, noagta lapud sikatoy matoor ya kaaro.2 Sam. 15:13-17, 32-37; 16:15–17:16.

Diad panaon tayo, makapalikliket ya nanengneng a nankakasakey iray agagi, aliwan lapud saray betang odino asainmin dad kongregasyon. Diad saray gagawaen da et singa da ibabagan, “Kaaro ta ka, aliwan lapud kaukolan, noagta lapud importante kad siak.”

 Ontan so naeksperiensya nen Federico. Diad tulong na kaaro ton si Antonio, asarag toy mairap ya panaon ed bilay to. Imbaga nen Federico: “Nen inmalis si Antonio ed kongregasyon mi, nagmaliw kamin sankaaro. Pareho kamin ministeryal a lingkor, tan maliket kamin saniban mankikimey. Ag-abayag, sikatoy nagmaliw ya elder. Sikatoy agko labat kaaro, noagta maong ya alimbawa ed siak ed espiritual.” Insan akagaway lingo si Federico. Kinmerew ya tampol na espiritual ya tulong, balet agla kualipikado ya mansiansian payunir o ministeryal a lingkor. Antoy reaksion nen Antonio?

Nen aproblema si Federico, sikatoy dinengel tan pinaseseg na kaaro ton si Antonio

Imbaga nen Federico: “Nalilikas kon nalilikna met nen Antonio so ermen ko. Ginawa toy anggaay nayarian ton pabiskegen ak. Sankanonot toy iyabig kod espiritual tan agto ak tinaynan. Pinaseseg to ak ya pabiskegen lamet so espiritualidad ko tan ag-onsuko.” Impaliwawa nen Antonio: “Agko insiblet so panaon kod si Federico. Labay kon ipaliknad sikato ya sarag ton ibagad siak so anggan anto, anggan say paneermen to.” Makapalikliket ta asabi panaon binmiskeg lamet ed espiritual si Federico tan akapawil ya payunir tan ministeryal a lingkor. Inkuan nen Antonio: “Anggano nandumaan lay kongregasyon mi, mas inmelet so pankaaro mi.”

KASIN PAKALIKNAM ET ATRAIDOR KA?

Antoy naliknam no pinaulyanan ka na maapit ya kaarom nen kakkaukolan moy tulong to? Seguradon nasakitan ka. Naperdonam ni kasi? Ompawil ni kasid datin ulopan yo?

Isip mo pay agawad si Jesus diad saramay unor lan agew to diad dalin. Naynay ton kaiba iray matoor ya apostol to, tan maapit irad sakey tan sakey kanian tinawag ira nen Jesus ya kakaaro to. (Juan 15:15) Balet, antoy agawa nen inaresto da? Batik iray apostol. Aminpigan imbaga nen Pedro ya agton balot taynan so Katawan to,  pero diad saman ya mismon labi et imburi nen Pedro si Jesus!Mat. 26:31-33, 56, 69-75.

Amta nen Jesus ya bukor ton arapen so unor ya subok. Anggano walay rason to komon ya nadismaya tan nasakitan, diad samay impitongtong tod saray disipulo to pigaran agew kayari inkioli to, anggapoy pakapatnagan ya sikatoy adismaya, mansyodot, odino magbabawi. Agla sinansakey nen Jesus iray lingo na saray disipulo to, tan agto met la binitla imay ginawa da diad samay labi ya sikatoy inaresto.

Imbes, positiboy imbaga nen Jesus ed si Pedro tan saray arum nin apostol. Impaseguro ton panmamatalkan to ra tan binilin to ra nipaakar ed sankaimportantian ya kimey ed interon mundo. Parad si Jesus, kaaro to nin siansia iray apostol. Agda alingwanan so panangaro tod sikara. Lapud satan, ginawa day anggaay nayarian da pian agla nadismaya so Katawan da. On, agawaan day kimey ya pagagawa tod saray papatumbok to.Gawa 1:8; Col. 1:23.

Agni nalingwanan nen Elvira imay agda impantalosan nen Giuliana ya kaaro to. Inkuan to: “Nen imbaga ton asakitan ed ginawak, aliwliway liknaan ko. Wala komoy rason ton manpasnok. Balet say pandinayewan ko et mapagpagan maong ed siak tan say resulta na ginawak. Say naapresyak et agnanpokus ed lingok, noagta diad epektod siak na ginawak. Misalsalamat ak ed si Jehova ta walay kaarok ya iyuuna toy pankaabigan ko imbes ya say liknaan to.”

Kanian antoy reaksion na maong a kaaro no nasusubok so pankakaaro? Sikatoy akaparaan ya mitongtong diad maaron paraan balet prangka no nakaukolan. Say ontan ya kaaro et singa si Natan tan Husai, ya nansiansian matoor anggano diad mairap iran situasyon, tan singa si Jesus ya mabulos a mamerdona. Kasin ontan kan kaaro?