Hebreos 9:1-28
9 Say akaunan sipanan sirin et walaan nensaman na saray totontonen nipaakar ed sagradon panaglingkor tan ed masanton pasen na satan diad dalin.
2 Ta imparaan so unonan keteg na tabernakulo a wadtan so kandelero tan say lamisaan tan saray tinapay ya akaapay; tan tatawagen itan a “Masanton Pasen.”
3 Balet diad biek na komaduan kurtina et samay keteg na tabernakulo a tatawagen a “Sankasantosan.”
4 Wadia so balitok a panagpoolan na insenso tan say inuklopan na balitok a kaban na sipanan, ya anginan ed balitok a banga a nankargay mana tan say sinmimit a baston nen Aaron tan saray baton akasulatan na sipanan;
5 tan walad tapew na satan iray maglorian kerubin a sinmakulob ed sakob* na kaban. Balet aliwa nin natan so pangipaliwawa ed sarayan bengatla.
6 Sanen niparaan la irayan bengatla ed onian paraan, saray saserdote so mabetbet ya onloloob ed unonan keteg na tabernakulo pian manggawa na sagrado iran panaglingkor;
7 balet diad komaduan keteg na tabernakulo, say atagey a saserdote labat so onloloob a maminsan ed sakey taon, a walay awit ton dala ya iyapay to parad inkasikato tan parad saray agginagalan kasalanan na totoo.
8 Kanian impalinew na masanton espiritu a say dalan a paloob ed masanton pasen et agni niparungtal legan ya akaalagey ni so inmunan tabernakulo.
9 Sayan mismon tabernakulo so mangililitrato ed aturon panaon a wadia la, tan anggad natan et iyaapay nin siansia iray regalo tan saray bagat. Balet, agsigpot a nalinisan na saraya so konsiensia na samay toon manggagawa na sagradon panaglingkor,
10 noagta nipaakar labat iraya ed saray kakanen tan iinumen tan nanduruman panangipalgep ed danum. Saraya so legal a kakaukolanen nipaakar ed pisikal iran bengatla tan nepeg irayan gawaen anggad aturon panaon a pangipetek ed saray bengatla.
11 Balet sanen linmoob si Kristo, ya atagey a saserdote nipaakar ed saray maabig a bengatlan wadia la, diad babaleg tan mas ayadyarin tabernakulo ya agginawa na too, salanti, agkabiangan na saray pinalsa diad dalin,
12 sikatoy aminpinsan a linmoob ed masanton pasen, a say awit to et aliwan dala na saray kanding tan kilaw a baka noagta say mismon dala to, tan sikatoy andi-anggaan a makapangiliktar ed sikatayo.
13 Ta no say dala na saray kanding tan saray baka tan say dapol na manmarmarikit a baka ya inwalsik ed saramay totoon arutakan et nayarin mamasanto pian nalinisan so laman,
14 agta nagkalalo a nalinisan na dala nen Kristo iray konsiensia tayo ed saray gawan inatey pian makapanlingkor itayo ed mabilay a Dios, ta diad panangiwanwan na andi-anggaan ya espiritu et inyapay toy inkasikato ya anggapoy pakabalawan ed imaton na Dios?
15 Lapud satan et sikatoy nagmaliw a manamegley ed balon sipanan pian saramay atawag et awaten day sipan ya andi-anggaan a tawir, ta sikatoy inatey pian nitarya so dondon a mangibulos ed sikara ed saray impakasumlang da diad akaunan sipanan.
16 Ta no walay sipanan, kaukolan ya ompatey ni imay toon amaelet ed sipanan.
17 Ta wala labat so kakanaan na sipanan no wala lay inatey parad satan, lapud anggapo so kakanaan na sipanan legan a mabilay ni imay toon amaelet ed sipanan.
18 Kanian samay akaunan sipanan et agmet inggapo ya anggapoy impaagus a dala.
19 Ta sanen asalita la nen Moises ed amin a totoo so amin a kakaukolanen na Ganggan, inala to so dala na saray kilaw a baka tan kanding pati say danum tan ambalbalangan bagoy karnero tan hisopo* tan inwalsik to itan ed libro na sipanan tan ed amin a totoo,
20 a kuan to: “Saya so dala nipaakar ed sipanan ya ingganggan na Dios a gawaen yo.”
21 Tan winalsikan to met na dala so tabernakulo tan say amin a pananginan ya uusaren ed panaglingkor.
22 On, diad Ganggan, amin lawarin bengatla et nalilinisan ed panamegley na dala, tan no anggapo so niibung a dala, agnaperdona iray kasalanan.
23 Kanian saray mangililitrato ed saray mangatatawen a bengatla et kaukolan a nalinisan ed panamegley na saray bagat ya ayayep, balet saray mismon mangatatawen a bengatla et kaukolan a nalinisan ed panamegley na saray bagat a magmaong ni nen sarayan bagat.
24 Ta si Kristo et linmoob diad mismon tawen, aliwan diad sakey a masanton pasen a ginawa na too, a saya so mangirerepresenta labat ed samay tua, pian sikato la natan so onarap ed Dios parad sikatayo.
25 Aliwan pian iyapay toy inkasikato a maminpigapiga, a singa ed tinaon ya iloloob na atagey a saserdote diad masanton pasen, ya awit toy agto dala.
26 Ta no ontan, sikatoy naynay a manirap manlapu la ed inkiletneg* na mundo. Balet natan et aminpinsan ton imparungtal so inkasikato diad kasampotan na sistema na mundo pian ekalen toy kasalanan diad panamegley na impangibagat to ed inkasikato.
27 Tan unong a saray totoo et niganan ompatey a maminpinsan, a kayari na saya et wala so panangukom,
28 aminpinsan met ya inyapay nen Kristo so inkasikato pian awiten iray kasalanan na dakel; tan say mikaduan kiparungtal to et aliwan lapud kasalanan, noagta parad saramay magunaet a manaalagar ed pangilaban to ed sikara.
