Hebreos 3:1-19
3 Lapud saya, masanton agagi, a kabiangan ed saray atawag ya onla ed tawen, nodnonot yo imay bibidbiren tayon apostol tan atagey a saserdote, si Jesus.
2 Sikatoy matoor ed Dios a nanggawa ed sikaton ontan, a singa si Moises a matoor met ed interon abung* na Dios.
3 Ta si Jesus et impasen a makanepegan na babaleg a gloria nen si Moises, no panon a say sakey a managpaalagey et babaleg so galang to nen say abung.
4 On, kada abung et walay angipaalagey, balet say angipaalagey ed amin a bengatla et say Dios.
5 Tan si Moises et sakey a matoor a lingkor ed interon abung na Dios bilang paneknek ed saray bengatlan iparungtal diad saginonor,
6 balet si Kristo et sakey a matoor ya Anak a mangaasikaso ed abung na Dios. Sikatayo so abung na Dios, no pansiansiaen tayo anggad kasampotan so inkakpel tayon mansalita tan say pangipapasirayew tayo ed ilalo tayo.
7 Lapud saya et inkuan na masanton espiritu: “Natan no dengelen yo so boses to,
8 agyo papaaweten so kapusoan yo a singa ed samay agawa a sengegay insanok ko, singa ed samay agew a sinubok da ak diad kalawakan,
9 salanti, sanen sinubok ak na inmuunan atateng yo, anta anengneng da la iray ginawak ed loob na apataplon taon.
10 Lapud saya et binusol ko iyan kailalakan tan inkuan ko, ‘Diad kapusoan da et naynay iran onaarawi, tan agda amta iray dalan ko.’
11 Kanian lapud sanok ko et insambak, ‘Ag-ira makaloob ed pampainawaan ko.’”
12 Manalwar kayo, agagi, ompano walad sikayo so nawalaan na mauges a puso ya andian na pananisia lapud iyaarawi to ed mabilay a Dios;
13 balet mantultuloy kayon manpapasesegan ed kada agew, legan a natawag ni itan a “Natan,” ompano wala ed sikayoy onawet so puso to lapud mapalikdon pakayari na kasalanan.
14 Ta magmaliw itayon kaiba nen Kristo daput no bembenan tayon malet anggad kasampotan so panagmatalek tayo manlapu la ed gapo,
15 unong a nibaga la: “Natan no dengelen yo so boses to, agyo papaaweten so kapusoan yo a singa ed samay agawa a sengegay insanok ko.”
16 Ta siopa iray akadngel ingen ta pinasanok da so Dios? Agta amin na saramay pinmaway ed Ehipto diad panamegley nen Moises?
17 Niarum ni, siopa iramay binusol na Dios ed loob na apataplon taon? Agta saramay nankasalanan, ya inaatey diad kalawakan?
18 Balet siopa iramay insamba na Dios ya agmakaloob ed pampainawaan to noag saramay agtinmulok?
19 Kanian anengneng tayo ya ag-ira akaloob lapud andian ira na pananisia.
