Hebreos 5:1-14
5 Ta balang atagey a saserdote a pinili ed limog na totoo so aturon mangasikaso ed saray bengatlan nipaakar ed Dios nisengeg ed saray totoo, pian niyapay to iray regalo tan bagat parad saray kasalanan.
2 Nayarian toy mideneng a mapangasi ed saray andiay-pikakabat a mankakasalanan lapud amta ton wala met so kakapuyan to,
3 tan lapud satan, sikatoy obligadon mangiyapay parad saray kasalanan to tan parad saray kasalanan na totoo.
4 Ontan met, sayan galang et awaten na sakey a too, aliwan lapud panlabay ton dili, noagta naawat to labat iya no sikatoy tinuro na Dios, a singa impanuro met ed si Aaron.
5 Kanian agmet inggloria na Kristo so inkasikaton dili sanen nagmaliw ya atagey a saserdote, noagta sikatoy inggloria na samay angikuan ed saya nipaakar ed sikato: “Sika so ana’ko; nagmaliw ak ya amam natan.”
6 Unong ya inkuan to met ed sananey a kasulatan: “Sakey kan saserdote ed andi-anggaan a mipadpara ed si Melquisedec.”
7 Sanen nambilay si Kristo bilang too, sikatoy masimoon a nampikasi tan kinmerew tekep na pannangnangis tan saray lua diad Dios a makapangiliktar ed sikato ed ipapatey, tan naebatan iray pikakasi to lapud tatakotan to so Dios.
8 Anggano sikato so Anak, naaralan toy katutulok makasengeg ed saray asagmak to;
9 tan sanen nagmaliw lan nagnap, amin iramay ontutulok ed sikato et makaawat na andi-anggaan a kilalaban diad panamegley to,
10 lapud sikatoy tinuro na Dios bilang atagey a saserdote a mipadpara ed si Melquisedec.
11 Nipaakar ed sikato et dakel so ibaga mi, balet mairap itan ya ipaliwawa lapud nagmaliw ya epel so pakadngel yo.
12 Ta managbangat kayo la komon lapud kabayag lay panaon, balet kaukolan a walay mangibangat lamet ed sikayo ya igapo to ed saray mainomay a bengatla nipaakar ed sagrado iran salita na Dios; tan nagmaliw kayon singa samay mankaukolan na gatas, imbes ya anawet a naakan.
13 Ta samay oniinum na gatas et agto amta so salita na inkatunong, lapud sikatoy melag nin ugaw.
14 Balet say anawet a naakan et parad saray matatken la a manguusar ed pakayari ran mantalos tan lapud saya et nipasal itan a mangibiig ed duga tan aliwa.

