Hebreos 4:1-16
4 Kanian, lapud wala nin siansia so sipan a pakaloob ed pampainawaan to, manalwar itayo komon ya anggapo ed sikatayo so ipasen ya agmakanepegan ed satan.
2 Ta niyabawag met la ed sikatayo so maong a balita, a singa met ed inmuunan atateng tayo; balet ag-ira agunggonaan ed salitan nadngel da, lapud andian ira na pananisia ya aliwan singa saramay dinmengel.
3 Tan sikatayoran angipatnag na pananisia so makaloob ed pampainawaan, ta nipaakar ed saya et inkuan to la: “Kanian lapud sanok ko et insambak, ‘Ag-ira makaloob ed pampainawaan ko,’” anggano asumpal la iray kimey to manlapud inkiletneg* na mundo.
4 Ta diad sakey a kasulatan et oniay inkuan to nipaakar ed komapiton agew: “Tan diad komapiton agew et nampainawa so Dios ed amin a kimey to,”
5 tan inkuan to met: “Ag-ira makaloob ed pampainawaan ko.”
6 Lapud wala nin siansia iray makaloob ed satan, tan saramay inmunan angiyabawagan ed maong a balita et ag-akaloob lapud ag-ira tinmulok,
7 walay sakey ya agew a tinandaan to lamet, ya inkuan ton “Natan” diad salmo nen David kayari na abaybayag a panaon; unong a nibaga la: “Natan no dengelen yo so boses to, agyo papaaweten so kapusoan yo.”
8 Ta no niloob la ra nen Josue diad sakey a pasen a pampainawaan, anggapo la komon so sananey nin agew ya ibaga na Dios ed saginonor.
9 Kanian wala nin siansia so panagpainawa ed sabaton parad saray totoo na Dios.
10 Ta say toon akaloob la ed pampainawaan na Dios et nampainawa met la ed saray kimey ton dili, no panon a say Dios et nampainawa met ed saray kimey to.
11 Gawaen tayo sirin so anggaay nayarian tayo a makaloob ed satan a pampainawaan, ta pian anggapoy napelag tan mangalig ed satan ya alimbawa na agkatutulok.
12 Ta say salita na Dios et mabilay tan mabisbiskeg tan mas makdem nen say dinanman ya espadan duaray-tarem tan ontalos anggad pansianen to so kamarerwa tan espiritu, tan saray pukel* tan utek na saratan, tan nibiig to iray kanonotan tan getma na puso.
13 Tan anggapo so pinalsa ya agnanengneng na Dios, balet amin a bengatla et mapatpatnag tan sankanengneng to, a diad sikato et walay eebatan tayo.
14 Kanian, lapud walaan itayo na sakey a magmaong ya atagey a saserdote a linmoob la ed katawenan, si Jesus ya Anak na Dios, itultuloy tayon bidbiren itan a betang to.
15 Ta say atagey a saserdote tayo et makapilikna ed saray kakapuyan tayo, lapud sikatoy asubok la ed amin a paraan, a singa sikatayo, balet ta andian na kasalanan.
16 Onasingger itayo sirin ed trono na agnaparaan a kaabigan na Dios tekep na kawayangan a mansalita, pian iter to ed sikatayo so panangasi tan sayan agnaparaan a kaabigan sano mankaukolan itayo na tulong.
