Hebreos 10:1-39
10 Lapud say Ganggan et mangiyaanino ed saray maabig ya onsabi, tan aliwa nin saya imay peteg iran bengatla, agbalot nayarian na saray totoo a gawaen ya ayadyari iramay onaasingger ed Dios diad panamegley na saray parehon bagat a tinaon-taon dan iyaapay.
2 Ta no nayarian da, agta intunda la komon so pangiyaapay ed saray bagat, lapud saramay manggagawa na sagradon panaglingkor ya aminpinsan lan alinisan et agda la nalikna a walaray kasalanan da?
3 Balet, diad panamegley na sarayan bagat et tinaon a nipapanonot iray kasalanan,
4 ta say dala na saray baka tan saray kanding et agnayarin mangekal ed saray kasalanan.
5 Kanian sanen linma dia ed mundo si Kristo, inkuan to: “‘Agmo nilabay so bagat tan apay, balet angiparaan kay sakey a laman parad siak.
6 Agmo nanliketan so interon apay a popoolan tan say apay parad kasalanan.’
7 Tan inkuan ko, ‘Nia! Onsabi ak (diad kabiangan na libro et nisulat iya nipaakar ed siak) pian gawaen koy linawam, O Dios.’”
8 Kayari ton imbagan: “Agmo nilabay odino nanliketan iray bagat tan apay tan say interon apay a popoolan tan apay parad kasalanan”—saray bagat ya iyaapay unong ed Ganggan—
9 inkuan to: “Nia! Onsabi ak pian gawaen koy linawam.” Inekal to imay inmuna pian niletneg so komadua.
10 Diad panamegley na samay imbagan ‘linawa,’ apasanto itayo lapud aminpinsan ya impangiyapay ed laman nen Jesu-Kristo.
11 Ontan met, balang saserdote so inagew-agew ya oonla ed pasen to pian manlingkor parad totoo tan maminpigan mangiyapay na saray parehon bagat, ta agsigpot a naekal na saraya iray kasalanan anggan kapigan.
12 Balet sikatoy angiyapay na sakey a bagat a permanentin makapangekal ed saray kasalanan tan yinmurong ed nikawanan na Dios,
13 a manlapu la ed saman et sikatoy manaalagar anggad saray kakabusol to et niiyan bilang toonan na saray sali to.
14 Ta diad impangiyapay to na sakey a bagat, ginawa ton lawas ayadyari iramay napapasanto.
15 Niarum ni, say masanton espiritu so mantatasi met ed sikatayo, ta kayari ton inkuan a:
16 “‘Saya so sipanan a pisipanan ko ed sikara kayari na saraman ya agew,’ kuan nen Jehova. ‘Iyan ko ed kapusoan da iray ganggan ko, tan isulat ko iratan ed nonot da,’”
17 inkuan to ni: “Tan agko lan balot nonoten iray kasalanan da tan saray mauges a gawa ra.”
18 Natan no saraya et naperdona la, agla nakaukolan so apay parad kasalanan.
19 Kanian, agagi, lapud walay talek tayon makaloob ed masanton pasen diad panamegley na dala nen Jesus,
20 a nilukasan to parad sikatayo so sakey a balo tan mabilay a dalan ya onlabas ed kurtina, salanti, say laman to,
21 tan lapud walay magmaong a saserdote tayo a mangaasikaso ed sankaabungan na Dios,
22 onasingger itayo tekep na masimoon a kapusoan a napno na kompiyansa lapud pananisia, a nakal la ed kapusoan tayo so mauges a konsiensia tan saray laman tayo et naurasan lay malinis a danum.
23 Itultuloy tayon iyabawag so ilalo tayo ed amin a totoo ya anggapo so panduaruwa tayo, ta matoor imay angisipan.
24 Tan nonoten tayo so sakey tan sakey pian makapansasagyatan itayo a mangaro tan manggawa na maabig,
25 ya agtayo papaulyanan so pantitipon tayo, a singa niyugali na arum, noagta manpapasesegan itayo, nagkalalo la ta nanenengneng yon asingsingger lay agew.
26 Ta no gagagalaen tayoy mankasalanan kayari tayon naamtaan so suston pikakabat ed katuaan, anggapo lan balot so akeran bagat parad saray kasalanan tayo,
27 balet segurado a walay onsabin makapataktakot a panangukom tan mandarlang a sanok a maneral ed saramay onsusumpa.
28 Siopaman ya angipulisay ed Ganggan nen Moises et pateyen ya anggapoy panangasi, diad pantestigo na duara odino talora.
29 Panon kabelat a dusa so iisipen yo a manepeg ed too ya angigatin ed Anak na Dios tan impasen ton andiay-kakanaan so dala na sipanan ya amasanto ed sikato, tan agnanrespeto ed espiritu na Dios a mangipapatnag na agnaparaan a kaabigan?
30 Ta kabat tayo imay angikuan a: “Betang ko so panangibales; siak so ombales”; tan inkuan to ni: “Ukomen nen Jehova so totoo to.”
31 Makapataktakot so pakaawat na dusa manlapud mabilay a Dios.
32 Balet, nonot yon naynay iray inmuunan panaon a kayari na impakaliwawaan yo et nansungdo kayo ed impasyan pilalaban yo tekep na dakel ya irap,
33 sanen papabandayen tan papairapen da kayo ed arap na totoo a singa kayo walad teatro, tan sanen inibaan yo iramay manasagmak na ontan a kairapan.
34 Ta akiambegya kayo ed saramay nipriso tan maliket kayo anggano sinamsam iray kaykayarian yo, lapud amta yo a walay magmaong tan mansiansia a tawir yo.
35 Agyo sirin aabuloyan a naandi so kawayangan yon mansalita lapud walay baleg a tumang parad satan.
36 Ta nakaukolan yoy mansungdo, ta pian naawat yoy kasumpalan na sipan sano agawaan yo lay linawa na Dios.
37 Ta “antiktikey la so panaon,” tan “samay onla dia et onsabi tan agnaatrasado.”
38 “Balet say matunong a lingkor ko et manbilay nisengeg ed pananisia,” tan, “no sikatoy onsener, agak naliketan ed sikato.”
39 Balet aliwa itayon singa saramay onsener a mamaarap ed kadederal, noagta singa saramay walaan na pananisia a pakaliktaran na kamarerwa.
