Hebreos 6:1-20
6 Lapud saya, ag-itayo labat angangga ed saray manunan bangat nipaakar ed Kristo, noagta itultuloy tayo komon so manpatatken, ya aliwan singano mangileletneg itayo lamet na pundasyon, salanti, say panagbabawi ed saray gawan inatey, tan pananisia ed Dios,
2 say bangat nipaakar ed saray bautismo tan panangitapew ed saray lima, say kioli na inaatey tan andi-anggaan a kaukom.
3 Tan gawaen tayo iya, no iyabuloy na Dios.
4 Nipaakar ed saramay aliwawaan la nensaman, tan saramay akasali na regalon andi-bayar a nanlapud tawen, tan saramay akaawat la na masanton espiritu,
5 tan saramay akasali ed maabig a salita na Dios tan saray pakayari ed onsabin sistema na mundo,
6 balet ta sinmian ira, agla ran balot napapawil pian magbabawi, ta diad inkasikara et impasak da lamet so Anak na Dios tan pinabanday da ed arap na totoo.
7 Singa bilang, say dalin a mangeesep ed uran a naynay ya ompepelag ditan, insan tutuboan na saray tanaman a nayarin kanen na saramay nantanem ditan, so mangawat met na bendisyon manlapud Dios.
8 Balet no say ontutubo ditan et dikarika tan sabisabit, paulyanan la itan tan magano lan naayew; tan diad kaunoran et poolan.
9 Balet nipaakar ed sikayo, agagin inad-aro, anggano oniay panagsalita mi et segurado kami a magmaong so kipapasen yo ta walad sikayo iray bengatlan mangitonton ed kilalaban.
10 Ta say Dios et aliwan agmatunong pian lingwanan to so gawa yo tan say aro ya impanengneng yo parad ngaran to diad impanlingkor yo ed saray masanto tan panlilingkor yo ed sikara.
11 Balet labay mi ya itultuloy na kada sakey ed sikayo imay inkakuli ya impanengneng yo la ed gapo pian say ilalo yo et magmaliw a segurado anggad anggaan,
12 ta pian agkayo magmaliw a mangiras, noagta alig yo iramay anawir na saray sipan lapud pananisia tan inkaanos da.
13 Ta sanen impasabi na Dios so sipan to ed si Abraham, sikatoy nansamba ed dili to ta anggapoy siopaman a mas atagey a napansambaan to,
14 ya inkuan to: “Seguradon bendisyonan ta ka, tan seguradon parakelen ta ka.”
15 Kanian naawat nen Abraham iyan sipan kayari na impan-anos to.
16 Ta saray totoo et mansasamba ed sakey a mas atagey, tan say samba ra et anggaan na amin a sangsangan, ta diad sikara et sakey la itan a legal a garantiya.
17 Mipadpara, sanen ginetma na Dios a nagkalalo nin paneknekan to ed saray tomatawir na sipan ya agmanguman so gagala to, pinekderan to itan ed panamegley na sakey a samba,
18 ta pian sikatayoran malabay a nasalimbengan et lalon napaseseg ya ombemben ed ilalo ya akatarya ed sikatayo diad panamegley na duaran agmanguman a bengatla a nipaakar ed saraya et agbalot mantila so Dios.
19 Sayan ilalo a singa angkla na kamarerwa tayo et segurado tan malet, tan mangiloob ed sikatayo anggad biek na kurtina,
20 a nilooban na samay sakey ya inmuna la parad sikatayo, si Jesus, a nagmaliw ya atagey a saserdote ed andi-anggaan a mipadpara ed si Melquisedec.
