Hebreos 12:1-29
12 Kanian lapud walay baleg a grupo na saray tasi* ya akapaliber ed sikatayo, ekalen tayo met sirin so amin a pakabelatan tan say kasalanan a mainomay a makaamper ed sikatayo, tan anosan tayoy ombatik ed lumba a niiyan diad arapan tayo,
2 legan ya akateen so imano tayo ed Manunan Manangitonton tan Manamayadyari na pananisia tayo, si Jesus. Lapud gayaga a niiyan diad arapan to, sikatoy nansungdo ed panamairapan a kiew,* imbaliwala to so kababaingan, tan yinmurong ed nikawanan na trono na Dios.
3 On, nonot yon maong imay nansungdo ed masumpan panagsalita na saray managkasalanan, a pankaugsan da lanlamang a dili, ta pian agkayo onkesaw tan ag-onkapuy so linawa yo.
4 Diad pilalaban yo ed satan a kasalanan, agyo nin balot asali so akilaban a tinmedter so dala yo,
5 balet alingwanan yo la imay bilin sanen sikayoy tinawag ya ananak: “Ana’ko, agmo melmelagen so pananisiplina nen Jehova, tan agmo papakapuyen so linawam sano ipepetek to ka;
6 ta say aaroen nen Jehova et didisiplinaen to; diad tua et leleweten to so balang sakey ya aawaten ton anak.”
7 Onkanan disiplina so pansusungdo yo. Say Dios et ipapasen to kayon ananak. Ta wala ta’y anak ya agdidisiplinaen na ama to?
8 Balet no agkayo nadidisiplina a singa ed impanisiplina to ed arum, aliwa kayon peteg ya ananak noagta ananak ed paway.
9 Sakey ni, walaray kaamaan tayo ed laman a manidisiplina ed sikatayo, tan rerespetoen tayo ra. Agta nagkalalon manpasakop itayo ed Ama na espiritual a bilay tayo pian manbilay itayo?
10 Ta didisiplinaen itayo na kaamaan tayo diad maganon panaon unong ed iisipen dan maabig, balet say Dios et gagawaen to itan parad pakagunggonaan tayo pian magmaliw itayon masanto a singa sikato.
11 Tua, diad panaon a niiter so disiplina et ag-itan makapaliket noagta makapaermen; ingen kayari to, saramay nipasal ed satan et manani na mareen a bunga, salanti, inkatunong.
12 Kanian pabiskeg yo iray linmaylay a kalimaan tan saray kinmapuy a pueg,
13 tan pansiansia yon maptek so dadalanen na saray sali yo, ta pian samay apiley et ag-onloor, noagta napaabig.
14 Mikareenan kayo ed amin a totoo, tan magmaliw kayon masanto ta no andi et anggapo so makanengneng ed Katawan,
15 tan manalwar kayo pian agnaandi ed sikayo so agnaparaan a kaabigan na Dios; pian anggapoy ontubon makasamal a lamot tan pansengegay gulo, pian agnadutakan na satan so dakel;
16 pian anggapoy managlawan odino siopaman ya agmamapabli ed sagrado iran bengatla, a singa si Esau, ya insalat to ed sakey a naakan iray kanepegan to bilang panguloan.
17 Ta amta yo a sikatoy impulisay la sanen labay to met lanlamang ya awaten so bendisyon, tan anggapo lay agawaan to anggano nanakis ed panggugunaet ton umanen so kanonotan nen ama to.
18 Ta agyo naasinggeran* imay nayarin diwiten tan napopoolan ed apoy, tan apaliberan na andekereket a lurem tan makapal a bilunget tan makmaksil a dagem,
19 a walay tanol na trumpeta tan boses a nansalita; sanen nadngel na totoo iyan boses et akikasi ira ya anggapo la komon so salita ya ibaga ni ed sikara.
20 Ta ataktakot ira ed ganggan a: “No say sakey ya ayep et akagatin ed sayan palandey, nepeg a tupaken itan anggad ompatey.”
21 Ontan met, makapataktakot itan a nengnengen kanian inkuan nen Moises: “Natatakot ak tan manggiwgiw ak.”
22 Balet naasinggeran yo so Palandey Sion tan say syudad na mabilay a Dios, a mangatatawen a Jerusalem, tan say nilibolibon anghel
23 a nandaragup, tan say kongregasyon na saray panguloan a nilista ed tawen, tan say Dios ya Ukom na amin, tan say espiritual a bilay na saray matunong a ginawan ayadyari,
24 tan si Jesus a manamegley ed balon sipanan, tan say dala ya inwalsik to, a mansasalita ed magmaong a paraan nen say dala nen Abel.
25 Seguroen yo ya agyo ipupulisay imay mansasalita. Ta no ag-akaliktar iramay angipulisay ed samay angipasabi na pasakbay na Dios diad dalin, ag-itayo met makaliktar no ibeneg tayo imay mansasalita ed tawen.
26 Ta diad saman a panaon et yinmegyeg so dalin lapud boses to, balet natan et oniay insipan to: “Ingen ta maminsan lamet et aliwa labat a say dalin so yegyegen ko noagta pati say tawen.”
27 Natan say kabaliksan na salitan “Ingen ta maminsan lamet” et deralen iramay nayeyegyeg a singa saray bengatlan ginawa na arum, ta pian mansiansia iramay agnayeyegyeg.
28 Kanian, lapud awaten tayo so panarian ya agnayegyeg, mantultuloy itayo komon a nawalaan na agnaparaan a kaabigan, a diad panamegley na satan et abobonan na Dios so sagradon panlilingkor tayo ed sikato tekep na takot tan respeto.
29 Ta say Dios tayo et sakey met a makaderal ya apoy.
