2 Corinto 9:1-15
9 Natan nipaakar ed panaglingkor a parad saray masanto, agla nakaukolan a mansulat ak ni ed sikayo,
2 ta amtak so nipaakar ed inkagunaet na nonot yo, a saya so ipapasirayew ko ed saray taga Macedonia, a say Acaya et sakey taon lan akaparaan natan, tan apakiwas so dakel ed sikara lapud inkaseseg yo.
3 Balet ibabakik iray agagi pian agnapaneknekan ya andi-kakanaan so pangipapasirayew mi ed sikayo nipaakar ed saya, noagta pian makapanparaan kayon maong, a singa ibabagak la nensaman a nepeg yon gawaen.
4 Ta no andi, ompan no mila ed siak iray taga Macedonia tan nanengneng da kayon ag-akaparaan, sikami so naturingan ed sayan panamaseguro mi, aliwan sikayo.
5 Kanian ninonot ko a nakaukolan a pasesegen iray agagi pian onla la ra ed sikayo tan iparaan da lan masakbay so mabunlok a regalo ya insipan yo nensaman, ta pian niparaan iya bilang mabunlok a regalo, ya aliwan sakey a bengatlan inala diad impamasoot.
6 Balet nipaakar ed saya, samay mantatanem na daiset et manani na daiset; tan samay mantatanem na dakel et manani met na dakel.
7 Gawaen komon na kada sakey so unong ed ginetma to ed puso to, ya aliwan ambelat ed liknaan to odino lapud napapasootan, ta aaroen na Dios so maliket a mangiiter.
8 Niarum ni, nayarian na Dios a padaaken ed sikayo so amin ya agnaparaan a kaabigan to, ta pian walaan kayon naynay na saray bengatlan onkana ed sikayo, tan niwala met ed sikayo so dakel a bengatlan nakaukolan yo ed amin a maabig a gawa.
9 (Ta unong a nisulat: “Sikatoy mabunbunlok ya angiter, sikatoy angiter ed saray mairap-bilay, say inkatunong to et mantultuloy ed andi-anggaan.”
10 Natan samay mangiiter na dakel a bini ed tomatanem tan tinapay a kanen, sikatoy mangiter tan mamarakel na bini ya itanem yo tan parakelen to iray bunga na inkatunong yo.)
11 Diad amin a bengatla et nabebendisyonan kayo ta pian mabunlok kayo met a mangiter diad amin a paraan, tan diad saray sagpot mi et napakiwas iray totoo a misalamat ed Dios;
12 ta sayan panaglingkor* et aliwa labat a daakan a mangitarya ed pankaukolan na saray masanto noagta panlapuan met na dakel a balikas na pisasalamat ed Dios.
13 Papaneknekan na sayan panaglingkor no anto kayo, kanian iglogloria ray Dios lapud manpapasakop kayo ed maong a balita nipaakar ed Kristo, legan ya iyaabawag yo ya ontan kayo, tan lapud mabunlok kayo a mangiiter na kontribusyon ed sikara tan ed amin;
14 tan masimoon iran mangipipikasi ed sikayo tan papablien da kayo lapud agnaparaan a kaabigan na Dios ed sikayo.
15 Salamat ed Dios lapud alay abig a regalo to.
