2 Corinto 2:1-17

2  Ta ninonot ko la ya agta kayo paermenen lamet diad ontumbok ya iyakar ko ed sikayo.  Ta no napaermen ta kayo, siopa ni so mamaliket ed siak noagta samay apaermen ko?  Kanian insulat ko iya, ta pian agak naermenan sano onla ak lapud saramay nepeg komon a panliketan ko; ta matalek ak ed sikayon amin a say gayaga a naliliknak et nalikna yo met ya amin.  Ta diad dakel a kairapan tan gonigon ed puso et sinulatan ta kayo tekep na dakel a lua, aliwan pian naermenan kayo, noagta pian naamtaan yo ya inar-aro ta kayo.  Natan no walay siopaman a nansengegan na kaermenan, say lalon pinaermen to et sikayon amin, aliwan siak. Agko getma ya usaren dia so ansasakit iran salita.  Magenap la ed satan a too so impamaat na karaklan ed sikayo,  balet natan et sikatoy mapangasi yon perdonaen tan ligliwaen, ta pian agnadaeg na alablabas a paneermen to.  Bilinen ta kayo sirin ya ipaseguro yo ed sikato so panangaro yo.  Ta nansulat ak ed sikayo pian napaneknekan yo met ed siak no kasin matulok kayo ed amin a bengatla. 10  Antokaman a lingo na siopaman a mapangasin peperdonaen yo, peperdonaen ko met. Diad tua, parad siak, antokaman a lingo a mapangasin peperdonaen ko, gagawaen ko nisengeg ed sikayo diad imaton nen Kristo; 11  pian ag-itayo naanamot nen Satanas, ta aliwa itayon andian na pikakabat ed saray paraan to. 12  Sanen sinmabi ak ed Troas pian iyabawag so maong a balita nipaakar ed Kristo, tan nilukas ed siak so sakey a puerta ed kimey na Katawan, 13  agak nainawaan ta agko naromog si Tito ya agik, balet nampatanir ak ed sikara tan linma ak ed Macedonia. 14  Balet salamat ed Dios a naynay a mangiwawanwan ed sikatayo diad sakey a parada na pananalo a kaiba so Kristo tan mangikakayat ed angob na pikakabat ed sikato ed amin a pasen diad panamegley tayo! 15  Ta parad Dios et sikatayo so ambalingit ya angob na balita nipaakar ed Kristo diad limog na saramay nilalaban tan diad limog na saramay nadederal; 16  parad saramay unor ya abitla et sakey ya angob a mangitonton ed ipapatey, balet parad saramay unonan abitla et sakey ya angob a mangitonton ed bilay. Tan siopa so kualipikado parad sarayan bengatla? 17  Sikami; ta agmi pannenegosyoan so salita na Dios a singa gagawaen na dakel a totoo, noagta masimoon kamin mansasalita, on, bilang saray imbaki na Dios, a kaiba so Kristo diad imaton na Dios.

Paimanod leksab