2 Corinto 12:1-21

12  Kaukolan a manpasirayew ak. Aliwa iyan makagunggona, balet say itongtong ko natan et saray makapakelkelaw a pasingawey tan saray panangiparungtal na Katawan.  Walay kabat kon too a nikasakey ed Kristo. Labin-apat a taon lay apalabas et sikatoy biglan niyakar ed komatlon tawen—agko amta no kasin sikatoy walad laman odino anggapo ed laman, balet amta na Dios.  On, kabat ko itan a too—ingen agko amta no kasin walad laman odino anggapo ed laman, balet amta na Dios—  a sikatoy biglan niyakar ed paraiso tan nadngel to iray salitan agnayarin ibalikas tan agmanepeg a salitaen na sakey a too.  Ipasirayew ko itan a too, balet agko ipasirayew so inkasiak, nilikud ed saray kakapuyan ko.  Ta no bilang labay koy manpasirayew, agak magmaliw ya agmakatunongan, ta ibagak so katuaan. Balet agko itan gawaen, ta pian anggapoy mangipasen ya atagtagey ak ni nen say nanenengneng odino narerengel to ed siak,  lapu labat ed karakel na saray panangiparungtal. Ta pian agak manpaatagey, niiter ed siak so sakey a sabit ed laman, sakey ya anghel nen Satanas, a mantultuloy a mamasakit ed siak, ta pian agak magmaliw a mapaatagey.  Nisengeg ed saya, amitlo ak ya akikasi ed Katawan a naekal komon itan ed siak;  balet inkuan to ed siak: “Magenap la ed sika so agnaparaan a kaabigan ko; ta say pakayarik et magmaliw a nagnap ed kakapuyan.” Kanian, malikeliket ak laingen a manpasirayew nipaakar ed kakapuyan ko, ta say pakayari nen Kristo et singa tolda a naynay ya akatarong ed siak. 10  Kanian manliliket ak diad saray kakapuyan, diad saray panag-insulto, diad saray pankakkaukolan, diad saray panamasegsegang tan mairap a kipapasen, nisengeg ed Kristo. Ta no kapigan a makapuy ak, ombibiskeg ak. 11  Nagmaliw ak ya agmakatunongan. Pinilit yo ak a magmaliw ya ontan, ta nepeg komon a maabig iray imbaga yo nipaakar ed siak. Ta anggapon balot so pakanengnengan ya abebbeba ak nen “saray sankamaongan ya apostol” yo, anggano anggapoy kakanaan ko. 12  On, anengneng yon mismo iray tanda na inka-apostol ko diad panamegley na sigpot a panagsungdo, tan diad panamegley na saray tanda tan pakelaw tan makapanyari iran gawa.* 13  Agta say sengegan labat a nagmaliw kayon abeba nen say arum ed saray kongregasyon et say agko impagmaliw a pabelat ed sikayo? Perdona yo ak pa ed sayan lingo. 14  Nia! Komatlo la iyan pankanawnawa ya akaparaan ak ya onla ed sikayo, ingen ta agak magmaliw a pabelat. Ta say aanapen ko et aliwan say kaykayarian yo noagta sikayo; ta saray anak et agnepeg a mantipon parad saray ateng da, noagta saray ateng so mantipon parad saray anak da. 15  Balet malikeliket ak a mangusar ed inkasiak tan sigpot a pausar parad sikayo.* No aaroen ta kayon maong, aroen yo ak kasi na daiset? 16  Anggano ontan so imbagak, agta kayo pinabelatan. Ingen ta ibabaga yon, “masilib” ak tan narel ta kayo “lapud panagpalikdo.” 17  Wala ta’y inanamot ko ed sikayo diad panamegley na anggan sakey ed saramay imbakik ed sikayo? 18  Ingganggan koy Tito tan imbakik so agin kaiba to. Agta agkayon balot inanamot nen Tito? Agta saksakey so gagala mi? Agta parehon bakat so tinumbok mi? 19  Kasin anggad sayan bekta et iisipen yo a mandedepensa kami ed sikayo? Mansasalita kami nipaakar ed Kristo diad imaton na Dios. Balet, inad-arok ira, say gagala na sayan amin a bengatla et pian ombiskeg kayo. 20  Ta mapaga ak ompan sano onsabi ak ditan et duma kayo ed samay iilaloan ko tan magmaliw ak met a duma ed samay iilaloan yo, tan wala laingen iray pankokolkol, imon, sanok, balingaan, pandederalan, panagnguronguro, panagpaatagey, gulo. 21  Tan sano onsabi ak lamet et ompan iyabeba ak na Dios ko sano kaiba ta kayo, tan panermenan ko iramay dakel a nankasalanan tan agni ra nagbabawi ed gagawaen dan karutakan tan pilalawanan* tan anggapoy-baing a kagagawa.*

Paimanod leksab

2Co 12:12 * Odino, “saray milagro.”
2Co 12:15 * Literal, “saray kamarerwa yo.”
2Co 12:21 * Sayan salita et manutukoy ed amin a klase na agmanepeg a seksual a relasyon. Nengnengen so Apendise 4.
2Co 12:21 * Nengnengen so paimano ed leksab na Gal 5:19.