2 Corinto 11:1-33

11  Komon ta anosan yo ak ed daiset ya ag-inkamakatunongan ko. Balet diad tua et aanosan yo ak la!  Ta maniimon ak ed sikayo a singa paniimon na Dios, ta siak a mismo et insipan ta kayon mikasal ed sakey ya asawan laki, diad Kristo, tan labay ta kayon iyarap ed sikato bilang masimpit a birhen.  Balet natatakot ak ompan naderal so masimoon tan masimpit a kanonotan yo a manepeg ya ipatnag yo ed Kristo, a singa si Eva a masilib ya atukso na uleg.  Ta no ontan, mainomay yon awaten so siopaman a mangipulong na sakey a Jesus nilikud ed samay impulong mi, odino sakey ya espiritu nilikud ed samay naawat yo la, odino maong a balita nilikud ed samay inawat yo la.  Ta ipapasen ko ya anggapon balot so pakanengnengan ya abebbeba ak nen “saray sankamaongan ya apostol” yo.  Balet anggano agak marunong a mansalita, seguradon aliwa ak ya ontan no nipaakar ed pikakabat; balet diad amin a paraan et impatnag mi itan ed sikayo diad amin a bengatla.  Odino kasin nankasalanan ak diad impangiyabebak ed inkasiak pian nipaatagey kayo, lapud maliket kon inyabawag ed sikayo so maong a balita na Dios ya anggapoy bayar?  Singa tinakewan koy arum a kongregasyon diad impangawat koy tulong da pian nalingkoran ta kayo;  ingen ta sanen wadtan ak ed sikayo tan mankakkaukolan ak, agak nagmaliw a pabelat ed anggan siopa, ta saray agagin nanlapud Macedonia et daakan ya angitarya na saray nakaukolan ko. On, diad amin a paraan et agak nagmaliw a pabelat ed sikayo tan mantultuloy ak ya ontan. 10  Walad siak so katuaan nen Kristo kanian agnapatunda iyan pampapasirayew ko diad saray lugar ed Acaya. 11  Antoy makasengeg? Lapud agta kayo inaro? Amta na Dios ya inaro ta kayo. 12  Natan et itultuloy koy gagawaen ko, ta pian naamper koy pangikakatunongan na saramay malabay a makapipara ed sikami diad pangipapasirayew da ed posisyon da. 13  Ta saratan a totoo et palson apostoles, managpalikdon komikimey, a pagmamaliwen day inkasikara ya apostoles nen Kristo. 14  Tan agla pankelawan iya, ta si Satanas a mismo et pagmamaliwen toy inkasikato a sakey ya anghel na liwawa. 15  Agmet sirin pankelawan no saray ministro to et pagmamaliwen da met so inkasikara a ministros na inkatunong. Balet say pansumpalan da et unong ed saray gawa ra. 16  Ibagak lamet, Anggapo komon so manisip ya agak makatunongan. Balet, no ontan so iisipen yo, awat yo ak anggano ipapasen yo ak ya agmakatunongan, ta pian makapanpasirayew ak met na daiset. 17  Say sasalitaen ko et aliwan unong ed alimbawa na Katawan, noagta mansasalita ak a singa agmakatunongan, a singa saray managpasirayew ya alabas a makompiyansa. 18  Lapud dakel so mangipapasirayew ed saray bengatla ed sayan mundo, manpasirayew ak met. 19  Ta maliket kayon manaanos ed saray agmakatunongan a totoo, ta makatunongan kayon mismo. 20  Diad tua et aanosan yoy siopaman a mangaaripen ed sikayo, siopaman a manguupot ed saray walad sikayo, siopaman a manasamsam ed saray walad sikayo, siopaman a mangipapaatagey na inkasikato ed sikayo, siopaman a manatampal ed sikayo. 21  Nababaingan kamin mangibaga ed saya, a singano kinmapuy lay autoridad mi. Balet no walay makpel ya onkikiwas ed sakey a bengatla, mansasalita ak a singa agmakatunongan a too, kanian nayarian ko met so onkiwas a makpel. 22  Kasin Hebreo ira? Ontan ak met. Kasin Israelita ira? Ontan ak met. Kasin bini ira nen Abraham? Ontan ak met. 23  Kasin ministros ira nen Kristo? Onebat ak a singa toon makulangkulang, mas maong ak ni: diad mairap iran kimey et mas dakel, diad impakapriso et mas dakel, diad impakalewet et alablabas, diad impatey lawari et mabetbet. 24  Diad saray Judio et aminlima ak ya akaawat na talomplo tan siam a siplat, 25  amitlo ak a nilewet, aminsan a tinupak, amitlon nakneb so barkon niluganan ko, a sanlabi tan sanagew ak ed pegley na dayat; 26  diad panagbiahe et mabetbet, diad saray kapeligroan ed saray ilog, diad saray kapeligroan ed saray tulisan, diad saray kapeligroan ed saray kanasyonan ko, diad saray kapeligroan ed arum a nasyon, diad saray kapeligroan ed syudad, diad saray kapeligroan ed kalawakan, diad saray kapeligroan ed dayat, diad saray kapeligroan ed limog na saray palson agagi, 27  diad mairap a kimey tan panagsagpot, diad pakakapuyat et mabetbet, diad pakakaerasan tan pakakapgaan, diad pamapalabas na panangan et aminpigapiga, diad betel tan inkalakseban. 28  Nilikud ed sarayan bengatla et walay inagew-agew a manedesdes ed siak, say panagpaga ed amin a kongregasyon. 29  Siopa so makapuy, tan agak makapuy? Siopa so atiror, tan agak nampasnok? 30  No walay nepeg ya ipasirayew, ipasirayew ko iray nipaakar ed kakapuyan ko. 31  Amta na Dios tan Ama na Katawan a Jesus, samay Sakey a nepeg a narayew ed andi-anggaan, ya agak mantitila. 32  Diad Damasco, say gobernador a nasasakopan nen Aretas ya ari so manbabantay ed syudad na saray taga Damasco pian erelen to ak, 33  balet diad sakey a bintana ed padir et siak so inleksab ed panamegley na sakey a buksot tan akatakas ak ed sikato.

Paimanod leksab