2 Corinto 1:1-24

1  Siak, si Pablo, ya apostol nen Kristo Jesus ed panamegley na linawa na Dios, tan si Timoteo ya agi tayo, so nansulat ed kongregasyon na Dios a walad Corinto, ontan met ed amin a masanto a walad interon Acaya:  Nawalaan kayo komon na agnaparaan a kaabigan tan deen a manlalapu ed Dios ya Ama tayo tan ed Katawan a Jesu-Kristo.  Narayew komon so Dios tan Ama na Katawan tayon Jesu-Kristo, say Ama na maaron panangasi tan say Dios na amin a ligliwa,  a manliligliwa ed sikatayo diad amin a kairapan tayo, ta pian naligliwa tayo iramay walad amin a klase na kairapan diad panamegley na ligliwa a panliligliwa na Dios ed sikatayo.  Ta no panon ya ondarakel so ir-irap tayo parad Kristo, ondarakel met so ligliwa a nagagamoran tayo diad panamegley na Kristo.  Natan, no wala kami ed kairapan, saya so pakaligliwaan tan kilabanan yo; no naliligliwa kami, saya so pakaligliwaan yo a makatulong pian nasungdoan yo iray ir-irap a sasagmaken mi met.  Kanian malet so paniilalo mi parad sikayo, lapud amta mi a no gagawaen mi itan et naligliwa kayo met a singa sikami, ta nasasagmak yo met so ir-irap mi.  Ta agmi labay a magmaliw kayon andiay-pikakabat, agagi, nipaakar ed kairapan ya agawa ed sikami diad distrito na Asia, ya alablabas so impakadetdetan mi ya agmi la nayarian, kanian agmi la anggan amta no antoy nagawa ed bilay mi.  Diad tua et inisip mi ya asentensiaan kami lay ipapatey, ta pian makapanmatalek kami ed Dios a mamapaoli ed saray inaatey, aliwan diad sikamin dili. 10  Diad ontan kabaleg a bengatla a singa say ipapatey et inliktar to kami tan iliktar to kami; tan maniilalo kami ed sikato ya iliktar to kami ni. 11  Makatulong kayo met diad masimoon a pangipikasi yo ed sikami, ta pian dakel so makapisalamat parad sikami lapud kaabigan ya impatnag ed sikami nisengeg ed saray pikakasi na dakel. 12  Ta say bengatlan ipapasirayew mi et saya, unong a tatasian na konsiensia mi, a nambilay kami diad mundo, balet nagkalalo la ed limog yo, a walaan kami na inkasanto tan inkasimoon ya ibabangat na Dios, a manmamatalek kami ed agnaparaan a kaabigan na Dios, aliwan diad minumundon karunongan. 13  Ta anggapoy arum ya isusulat mi ed sikayo noag saramay amta yo la odino bibidbiren yo met; tan iilaloan ko ya itultuloy yon bidbiren iratan anggad kasampotan, 14  no panon a binidbir met la na arum ed sikayo a sikami so sengegan na pampasirayew yo, tan sikayo met so magmaliw a sengegan na pampasirayew mi diad agew na Katawan tayon Jesus. 15  Kanian, lapud sayan panagmatalek, nononoten ko la nensaman so onla ed sikayo, ta pian naliketan kayo ed komaduan pankanawnawa, 16  tan kayari na isamar ko ed sikayo et onla ak ed Macedonia, tan ompawil ak ed sikayo manlapud Macedonia tan ipatnubang yo ak sano onla ak ed Judea. 17  On, sanen nononoten ko itan, agta aliwan alemlemew so impangipasen ko ed satan? Odino saray bengatlan inggagalak, kasin unong iratan ed laman, ta pian ibagak ya “On, On” insan “Andi, Andi”? 18  Balet napanmatalkan so Dios a say sasalitaen mi ed sikayo et aliwa ya On insan Andi. 19  Ta say Anak na Dios, si Kristo Jesus, ya impulong mi ed sikayo, kaibak si Silvano* tan si Timoteo, et agnagmaliw ya On insan Andi, balet say On et nagmaliw ya On ed sikato. 20  Ta anggan panon karakel iray sipan na Dios, nagmaliw iratan ya On diad panamegley to. Kanian diad panamegley to et ibabalikas tayo ed Dios so “Amen” ta pian sikatoy nigloria tayo. 21  Balet samay mangipapaseguro a sikayo tan sikami et kayarian na Kristo et say Dios, tan sikato met so amili ed sikatayo. 22  Inyan to met ed sikatayo so tatak to tan inyan to ed kapusoan tayo so espiritu bilang pakaseguroan nipaakar ed samay onsabi. 23  Natan say Dios komon so mantasi sumpad dilin kamarerwak, ya agak ni linma ditan ed Corinto ta pian agkayo lalon manermen. 24  Aliwan lapud kakatawan kami na pananisia yo, noagta kakimeyan yo kami pian manliket kayo, ta sikayoy akatalindeg a malet lapud pananisia yo.

Paimanod leksab

2Co 1:19 * Odino, “Silas.”