2 Corinto 6:1-18
6 Lapud mankikimey kamin kaiba to, mikakasi kami met ya agyo aawaten so agnaparaan a kaabigan na Dios insan lingwanan so gagala na satan.
2 Ta inkuan to: “Diad sakey a makapaliket a panaon et dinengel ta ka, tan diad sakey ya agew na kilalaban et tinulongan ta ka.” Nia! Natan la so makapalikliket a panaon. Nia! Natan la so agew na kilalaban.
3 Agkamin balot manggagawa na antokaman a pakatiroran, pian anggapoy naromog a pakabalawan ed ministeryo mi;
4 balet diad amin a paraan et irerekomenda mi so inkasikami bilang ministros na Dios, diad pansusungdo mi ed dakel a subok, diad saray kairapan, diad saray pankakkaukolan, diad saray mairap a kipapasen,
5 diad saray inkapekpek, diad saray inkapriso, diad saray gulo, diad saray panagsagpot, diad saray labin agpakakaugip, diad saray panaon ya agpakakapangan,
6 diad inkasimpit, diad pikakabat, diad andukey a panag-anos, diad kaabigan, diad masanton espiritu, diad aro ya anggapoy pansimpisimpitan,
7 diad matuan panagsalita, diad pakapanyari na Dios; diad panamegley na saray armas na inkatunong ed kawanan a lima tan ed kawigi,
8 diad saray panaon a nararayew tan napapabaingan, diad saray panaon a mauges so narerengelan tan maong so narerengelan; impasen kamin managpalikdo ingen ta matua,
9 bilang agkabat ingen ta bibidbiren, bilang singa ompapatey ingen ta nia! manbibilay kami, bilang saray dinisiplina ingen ta agniyawat ed ipapatey,
10 bilang maneermen balet naynay a manliliket, bilang saray mairap-bilay balet mamapayaman ed dakel, bilang saray andian a balot ingen ta walaan na amin a bengatla.
11 Bulobulos kamin nansalita* ed sikayoran taga Corinto, ninmatnat* ed sikayo so panangaron walad puso mi.
12 Agmi isisiblet ed sikayo so panamabli mi, balet sikayo et mair-irap yon ipanengneng so panamabli yo.
13 Kanian, bilang bales—mansasalita ak a singa ed saray ananak—inatnat* yo met so panangaron walad puso yo.
14 Agkayo mikakasakey ed saray agmananisia.* Ta panon a makapanulop so inkatunong tan kaugsan? Odino antoy piparaan na liwawa ed kabilungetan?
15 Niarum ni, anto so pantunosan nen Kristo tan si Belial?* Odino anto so pamparaan na sakey a mananisia tan sakey ya agmananisia?
16 Tan anto so pipaknaan na templo na Dios ed saray idolo? Ta sikatayo so templo na sakey a mabilay a Dios; unong ya inkuan na Dios: “Manayam ak ed limog da tan manakar ak ed limog da, tan siak so magmaliw a Dios da, tan sikara so magmaliw a totook.”
17 “‘Ekal kayo sirin ed limog da, tan onsian kayo,’ so kuan nen Jehova, ‘tan agyo la didiwiten so marutak a bengatla’”; “‘tan awaten ta kayo.’”
18 “‘Tan siak so magmaliw ya ama yo, tan sikayo so magmaliw ya ananak kon lalaki tan bibii,’ so kuan nen Jehova a Makapanyarin-amin.”
