Исус објаснил како ќе знаеме „дека Божјето царство е близу“ (Лука 21:31). Тој претскажал дека, меѓу другото, ќе има војни од светски размери, силни земјотреси, глад и болести. Сите тие работи се случуваат пред наши очи (Лука 21:10-17).

Во 2. Тимотеј 3:1-5, a Библијата прорекла и кои неубави особини и ставови ќе ги имаат луѓето во „последните денови“ од човечкото владеење. Кога гледаш дека луѓето околу нас размислуваат и се однесуваат на лош начин, сигурно се согласуваш дека ова библиско пророштво содржи точен опис на она што се случува денес.

Што значи ова? Тоа значи дека е близу времето кога Божјето Царство ќе направи огромни промени кои ќе го сменат животот на подобро (Лука 21:36). Во Библијата, Бог дал многу убави ветувања во врска со Земјата и со луѓето што ќе живеат на неа. Да наведеме некои од нив.

„Нему [на Исус] му беа предадени власта, честа и царството за да му служат сите народи, племиња и јазици. Неговата власт е вечна власт, која никогаш нема да помине, и неговото царство нема да пропадне“ (ДАНИЕЛ 7:14).

Што значи ова: Ќе можеш да живееш под власта на една далеку повозвишена влада воспоставена од Бог, со Исус Христос како Цар. Таа ќе владее над целата Земја.

„Никој од жителите нема да рече: ’Болен сум‘“ (ИСАИЈА 33:24).

Што значи ова: Никогаш нема да се разболиш или да страдаш од некаков инвалидитет. Ќе можеш да живееш без никогаш да умреш.

„Ги прекинува војните до крајот на земјата“ (ПСАЛМ 46:9).

Што значи ова: Нема повеќе да се плашиме од војни и од страдањата што тие ги причинуваат.

„Злиот ќе го снема... Кротките ќе ја поседуваат земјата“ (ПСАЛМ 37:10, 11).

Што значи ова: Повеќе ќе нема зли луѓе. На Земјата ќе живеат само оние што му се послушни на Бог.

„Тие ќе градат куќи и ќе живеат во нив, ќе садат лозја и ќе го јадат нивниот род“ (ИСАИЈА 65:21, 22).

Што значи ова: Целата Земја ќе биде прекрасна. Бог ќе одговори на нашата молитва неговата волја да се врши „на земјата“ (Матеј 6:10).