Hechos 9:1-43
9 Pero kukx qʼojin Saulo kyiʼj tdiscípulo Qajaw ex tajtoq tuʼn kykubʼ tbʼyoʼn. Tuʼntzunju, xiʼ yolil tukʼil nejenel kye pal,
2 ex xi tqanin junjun carta te tuʼntzun t-xi tiʼn kyoj ja te kʼulbʼil* te Damasco. Kyoj carta lu, xi qʼoʼn toklen tuʼn ttzaj ttzyuʼn ex tuʼn ttzaj tiʼn toj Jerusalén alkyexku xinaq* ex xuʼj* in nok lepeʼ tiʼj tbʼe Qajaw.*
3 Tej tzmatoq in bʼet ex tej chʼixtoq tpon toj Damasco, noq minabʼen tzaj qoptzʼaj jun spikʼun tibʼaj tzmax toj kyaʼj.
4 Kubʼ tzʼaq twitz txʼotxʼ ex ok tbʼiʼn qe yol lu: «Saulo, Saulo, ¿tiquʼn in nok tbʼinchaʼna nya bʼaʼn wiʼje?».
5 Xi tqanin Saulo te: «¿Alkyetzuna Tat?». Atzunte tzaj ttzaqʼweʼn: «Aqine Jesús, aju in nok tbʼinchaʼna nya bʼaʼn tiʼj.
6 Pero jaʼlo, weʼktza ex tokxa toj tnam, jatumel tzul qʼamaʼn teya tiʼ kxel tbʼinchaʼna».
7 Atzun kye xinaq in che bʼet junx tukʼil Saulo, e kyaj weʼ ex e jaw sekʼpaj, porke ok kybʼiʼn qa in yolin jun xjal pero mintiʼ kyil.
8 Jawtzun weʼ Saulo twitz txʼotxʼ, pero mintiʼ bʼant tkeʼyin maske jaqoʼn qe twitz. Tuʼntzunju tzaj kytzyuʼn xinaq tqʼabʼ ex xi kyiʼn toj Damasco.
9 Toj oxe qʼij, mintiʼ bʼant tkeʼyin ex mintiʼ jun tiʼ xi twaʼn ex xi tkʼaʼn.
10 Ex in nanqʼintoq jun discípulo toj tnam Damasco aju Ananías tbʼi. Kubʼ tyekʼin tibʼ Qajaw twitz toj jun witzikʼ ex xi tqʼamaʼn te: «¡Ananías!». Xi ttzaqʼweʼn Ananías te: «Lu qine lu Tat».
11 Xi tqʼamaʼn Qajaw te: «Weʼktza, ex txiʼya toj kay Recta tbʼi. Qaninkxa tja Judas qa at jun xjal te Tarso aju Saulo tbʼi, porke lu in naʼn Dios.
12 Ma tzʼok tkeʼyin toj jun witzikʼ qa in pon jun xinaq tukʼil aju Ananías tbʼi, ex qa in kubʼ tqʼoʼn tqʼabʼ tibʼaj tuʼn tbʼant tkeʼyin».
13 Pero xi ttzaqʼweʼn Ananías te Qajaw: «Tat, o che ok nbʼiʼne nim xjal in che yolin tiʼj xinaq lu ex tiʼj tkyaqil nya bʼaʼn o tzʼok tbʼinchaʼn kyiʼj discípulo toj Jerusalén.
14 Ax ikx, qa o tzaj qʼoʼn toklen tuʼn tul tzalu kyuʼn nejenel kye pal ex tuʼn ttzaj ttzyuʼn* kykyaqil qeju in nok qeʼ kykʼuʼj tiʼj tbʼiya».
15 Pero xi tqʼamaʼn Qajaw te: «Txiʼya, porke ma jaw nskʼoʼne xinaq lu tuʼn tyolin tiʼj nbʼiye kyukʼil xjal kye txqantl nasyon, kyukʼil rey ex qe xjal te Israel.
16 Ex kxel nyekʼine te tkyaqil nya bʼaʼn il tiʼj tuʼn tikʼx tuʼn noq tuʼn nbʼiye».
17 Tuʼntzunju, kubʼ bʼe tuʼn Ananías, okx toj tja Judas, kubʼ tqʼoʼn tqʼabʼ tibʼaj Saulo ex xi tqʼamaʼn te: «Saulo, werman, ma chin tzaj samaʼne tuʼn Qajaw Jesús, aju kubʼ tyekʼin tibʼ toj tbʼeya tej ttzaja, tuʼntzun tbʼant tkeʼyina juntl maj ex tuʼn tnoj toj tanmiya tuʼn espíritu santo».
18 Tej tbʼaj yolin, el tzʼaq jun tzʼis tiʼj twitz Saulo ik keʼyin ik tzeʼn t-escama pescad ex bʼant tkeʼyin juntl maj. Jawtzun weʼ ex bautisarin,
19 waʼn ex ten tipumal juntl maj.
Ex ax kyaj ten jteʼ qʼijtl kyukʼil discípulo in che anqʼin toj Damasco.
20 Ex tojx qʼij aju, xi tzyet tuʼn tyolin tiʼj Jesús kyukʼil xjal toj ja te kʼulbʼil, xi tqʼamaʼn kye qa a Jesús Tkʼwal Dios.
21 Pero kykyaqil qeju ok kybʼiʼn tyol, e jaw labʼin ex kyqʼama: «¿Nyapetzun a xinaq lu ok tzoqpaj kyiʼj okslal ok qeʼ kykʼuʼj tiʼj tbʼi Jesús toj Jerusalén? ¿Mintiʼpe ma tzul tzalu tuʼn kytzaj ttzyuʼn* ex tuʼn kyxi tiʼn kywitz pal nim kyoklen?».
22 Pero mas ok tipumal Saulo, ex el tzpet kynabʼil judiy in che anqʼin toj Damasco tuʼn tej t-xi tyekʼin klar kye qa a Jesús Cristo.
23 Tbʼajlenxitzun nimku qʼij, kubʼ kyximen judiy tuʼn tkubʼ kybʼyoʼn Saulo.
24 Pero ok tbʼiʼn Saulo aju kubʼ kyximen tuʼn tok kybʼinchaʼn tiʼj. Porke e ayon judiy qʼijtl ex qonikʼen tiʼj ttzi pwert tuʼn tkubʼ kybʼyoʼn.
25 Tuʼntzunju e onin tdiscípulo tiʼj, ex toj jun ventan kutz kyqʼoʼn toj jun chiʼl tibʼaj muro te qonikʼen.
26 Tej tpon toj Jerusalén, jyon kyiʼj discípulo tuʼn tten kyukʼil. Pero e tzaj xobʼ kykyaqil discípulo twitz, porke mintiʼ xi kyokslaʼn qa otoq tzʼok te jun discípulo.
27 Tuʼntzunju, xiʼ Bernabé onilte ex xi tiʼn kywitz apóstol. Yajxitl xi tqʼamaʼn kye apóstol qa til Saulo Qajaw toj bʼe ex qa tzaj yolin te. Ax ikx xi tqʼamaʼn kye qa mintiʼ xobʼ Saulo tej tyolin tiʼj tbʼi Jesús toj Damasco.
28 Tuʼntzunju, ax kyaj ten Saulo kyukʼil ex bʼet junx kyukʼil* toj Jerusalén. Ex mintiʼ xobʼ tej tyolin tiʼj tbʼi Qajaw.
29 Yolin kyukʼil judiy in che yolin toj griego ex kolin tiʼjju ojtzqiʼn tuʼn. Pero ok tilil kyuʼn judiy tuʼn tkubʼ kybʼyoʼn nimku maj.
30 Tej tok kybʼiʼn erman jlu, xi kyiʼn Saulo toj tnam Cesarea ex xi kysamaʼn Tarso.
31 Ex toj tkyaqil Judea, Galilea ex Samaria, e anqʼin discípulo toj tzalajbʼil ex e kyuwix toj kyokslabʼil. Ex kukx chʼiy kybʼet, porke e xobʼ twitz Jehová* ex qʼuqbʼanjtz kykʼuʼj tuʼn espíritu santo.
32 Xiʼtzun Pedro visitaril kye discípulo in che anqʼin toj tkyaqil tnam, ex xiʼ visitaril kye discípulo in che anqʼin toj tnam Lida.
33 Toj lugar lu, kanet jun xinaq tuʼn aju Eneas tbʼi. Mintiʼtoq in bʼant tyukch tuʼn jun yabʼil ex otoq tzikʼ ocho años tkubʼlen twitz watbʼil.
34 Xi tqʼamaʼn Pedro te: «Eneas, kbʼel qʼanina tuʼn Jesucristo. Weʼktza ex bʼincham twatbʼila». Ex jurat jaw weʼ Eneas.
35 Tej tok kykeʼyin kykyaqil qeju in che anqʼin toj Lida ex toj chqʼajlaj te Sarón jlu, e okslan tiʼj Qajaw.
36 Ex in nanqʼintoq jun xuʼj toj tnam Jope okslal tiʼj Qajaw, aju Tabita tbʼi, atzun toj griego Dorcas.* Ten nim tbʼinchbʼen bʼaʼn ex onin kyiʼj qeju e ikʼ toj necesidad.
37 Pero tej attoq Pedro toj tnam Lida, tzaj yabʼil tiʼj Dorcas ex kyim. Tuʼntzunju, bʼaj bañarin kyuʼn discípulo ex kubʼ kykuẍbʼaʼn toj jun kwart toj tkabʼin nivel.
38 Tej tok kybʼiʼn discípulo qa attoq Pedro toj tnam Lida, xi kysamaʼn kabʼe xjal txkolte porke nqayintoq tok tnam Lida tiʼj Jope. Tej kypon, e kubʼsan twitz Pedro ex kyqʼama: «Bʼinchama xtalbʼil, bʼiʼx tzaja qukʼile».
39 Jurattzun jaw weʼ Pedro ex xiʼ kyukʼil. Tej tpon, xi qʼiʼn kyuʼn toj jun kwart toj tkabʼin nivel. Entonces ok kychmon kyibʼ kykyaqil viud tiʼj in che oqʼ ex xi kyyekʼin te kykyaqil xbʼalun ex mant kubʼ tbʼinchaʼn Dorcas tej itzʼ.
40 Pero xi tqʼamaʼn Pedro kye kykyaqil tuʼn kyetz, kubʼ ẍmejeʼ ex ok ten naʼl Dios. Ajtz tkeʼyin t-xmilal kyimni ex tqʼama: «Tabita, ¡weʼktza!». Ex jaw tjaqoʼn Tabita twitz ex tej tok tkeʼyin Pedro jaw qeʼ.
41 Tzajtzun ttzyuʼn Pedro tqʼabʼ Tabita ex jaw twabʼan. Yajxitl tzaj txkoʼn qe discípulo ex qe viud ex xi tyekʼin kye qa itzʼtoq taʼ Tabita.
42 Ok kybʼiʼn kykyaqil xjal te Jope aju bʼaj ex nim qe e okslan tiʼj Qajaw.
43 Tbʼajlenxi jlu, ax kyaj ten Pedro nim qʼij toj tnam Jope toj tja jun xjal tzqʼajsal cuero Simón tbʼi.
Tqanil
^ Moqa «sinagoga».
^ Toj junjuntl lugar «ichan».
^ Toj junjuntl lugar «qya».
^ Toj juntl yol, atz in yolin tiʼj kyanqʼibʼil okslal ex kyiʼj t-xnaqʼtzbʼil Jesucristo.
^ Toj griego «tuʼn tok tkʼaloʼn».
^ Toj griego «tuʼn kyok tkʼaloʼn».
^ Toj griego «okx ex etz».
^ Qʼonka twitza tiʼj xnaqʼtzbʼil A5.
^ Aju bʼibʼaj Dorcas toj griego ex aju bʼibʼaj Tabita toj arameo a tzʼelpuna ‹masat›.
