Hechos 17:1-34
17 Entonces e ikʼ toj tnam Anfípolis ex Apolonia, ex e pon toj Tesalónica, jatumel attoq jun ja te kʼulbʼil* kye judiy.
2 Okxtzun Pablo toj ja te kʼulbʼil ik tzeʼn tkostumbr, ex toj oxe sábado onin kyiʼj tuʼn tel kynikʼ tiʼj tyol Dios.
3 Xi tqʼamaʼn ex xi tyekʼin kye tukʼil tyol Dios qa iltoq tiʼj tuʼn tikʼ Cristo toj nim sufrimiento ex tuʼn tjaw anqʼin kyxol kyimni. Xi tqʼamaʼn kye: «Aju Jesús in chin yoline tiʼj kyukʼile, atzun Cristo».
4 Ex ateʼ junjun kyxol e okslan ex e ok lepeʼ tiʼj Pablo ex Silas. Ax ikx e okslan nim xjal griego in che kʼulin twitz Dios ex nim qe xuʼj* nim kyoklen.
5 Pero tzaj nim kyqʼoj judiy ex ok kychmoʼn junjun xinaq* nya bʼaʼn ex noq in che bʼet toj merkad. Tej tchmet kybʼet, e xiʼ kyukʼil xjal toj tnam ex e jaw tilj kyuʼn. Okx kypaʼn tpwertil tja Jasón, porke in che jyontoq tiʼj Pablo ex Silas tuʼn t-xi kyqʼoʼn toj kyqʼabʼ xjal.
6 Pero tuʼnju mintiʼ e kanet kyuʼn, xi kyjawoʼn* Jasón kyukʼil junjuntl erman kywitz gobernador toj tnam, e jaw schʼin ex kyqʼama: «Ma che ul xinaq ma tzaj kyiʼn nya bʼaʼn twitz tkyaqil txʼotxʼ tzalu,
7 ex atz ma che kyaj ten tja Jasón. Mintiʼ in xi kyniman kykyaqil xjal lu tley César porke in kyqʼamaʼn qa at juntl rey, a Jesús».
8 Tej tbʼaj kyqʼamaʼn jlu, e tzaj xobʼ xjal ex qe gobernador toj tnam.
9 Tuʼntzunju, xi kyqanin te Jasón ex kye erman tuʼn t-xi kychjoʼn kymulta ex yajxitl e jeʼtz kytzaqpiʼn.
10 Ex toj qonikʼen aju, xi kysamaʼn erman Pablo ex Silas atz Berea. Tej kypon, e xiʼ toj ja te kʼulbʼil kye judiy.
11 Ex mastoq tbʼanel kyanmi judiy te Berea kywitz qeju te Tesalónica, porke xi kybʼiʼn tyol Dios tuʼn tkyaqil kyanmi. Ex tkyaqil qʼij e xnaqʼtzan tiʼj tyol Dios tuʼn tel kynikʼ tiʼj qa ax tok aju xi qʼamaʼn kye.
12 Tuʼntzunju nim qe kyxol e okslaʼn. Ax ikx e okslaʼn nim qe xuʼj griego at kyoklen ex junjun xinaq.
13 Pero tej tok kybʼin judiy te Tesalónica qa ax ikx ok ten Pablo yolil tiʼj tyol Dios toj tnam Berea, e xiʼ toj tnam Berea ex ok kyikʼlen qe xjal tuʼn kyjaw tilj.
14 Tuʼntzunju, jurat xi kysamaʼn erman Pablo ttzi mar, atzunte Silas ex Timoteo ax e kyaj ten.
15 Pero aqeju e xiʼ wabʼalte Pablo, xi kyiʼn toj tnam Atenas. Tej kymeltzʼaj, tzaj tqʼamaʼn Pablo kye tuʼn t-xi kyqʼamaʼn te Silas ex Timoteo tuʼn kypon naj tukʼil.
16 Tej in nayontoq Pablo kyiʼj toj Atenas, tzaj tqʼoj tej tok tkeʼyin qa nojni toj tnam kyuʼn kydios xjal.
17 Oktzun ten yolil toj ja te kʼulbʼil kyukʼil judiy ex qe txqantl xjal e kʼulin twitz Dios. Ax ikx, tkyaqil qʼij yolin kyukʼil xjal e pon toj plas te merkad.
18 Entonces e pon junjun xjal at nim kynabʼil, qe epicúrio ex qe estoico, ex e ok ten qʼojil tukʼil Pablo. Ateʼ junjun kyqʼama: «¿Tiʼ tajbʼil xjal loc lu tuʼn ttzaj tqʼamaʼn?». Atzun junjuntl kyqʼama: «Parece que in yolin kyiʼj stranjer dios». Kyqʼama jlu porke yolin Pablo kyiʼj tbʼanel noticia tiʼj Jesús ex tiʼj resurrección.
19 Tuʼntzunju xi kyiʼn toj Areópago ex xi kyqʼamaʼn te: «¿Jakupe tzaj tqʼamaʼna qeye tiʼ tzʼelpuna akʼaj xnaqʼtzbʼil in yolina tiʼj?
20 Porke naʼmx tok qbʼiʼne aju in yolina tiʼj ex qajbʼile tuʼn tel qnikʼe tiʼj tiʼ tzʼelpuna».
21 Ex kykyaqil xjal te Atenas ex qe stranjer xjal najli qe kyxol,* e yolin kyiʼj akʼaj tqanil tej kybʼaj aqʼunan ex ok kybʼiʼn.
22 Jawtzun weʼ Pablo kyxol xjal toj Areópago ex tqʼama:
«Aqeye xinaq te Atenas, toj tkyaqil in nok nkeʼyine qa mas in che xobʼe kywitz dios kywitz qe txqantl xjal.
23 Por ejemplo, tej in chin bʼete, ma tzʼok nkeʼyine tkyaqilju in che kʼulune twitz ex ma wile jun altar tzʼibʼin jlu twitz: ‹Jun altar te jun Dios Mintiʼ Ojtzqiʼn quʼne›. Aju Dios in che kʼulune twitz ex mintiʼ ojtzqiʼn kyuʼne, atzunju in chin yoline tiʼj kyukʼile.
24 Aju Dios kubʼ bʼinchante txʼotxʼ ex tkyaqilju at twitz, a Tajaw kyaʼj ex txʼotxʼ, ex mintiʼ in nanqʼin kyoj ja bʼinchaʼn kyuʼn xjal.
25 Ax ikx mintiʼ in nayon tuʼn kyajbʼen xjal te, porke mintiʼ jun tnecesidad at, ex a in tzaj qʼonte qchwinqlal, qxew ex tkyaqilju at qe.
26 Kubʼ tbʼinchaʼn kykyaqil tnam tiʼj jun xjal tuʼntzun kyanqʼin twitz tkyaqil txʼotxʼ, ax ikx tzaj tqʼamaʼn jtoj kbʼajel junjun tiʼ ex jatumel che anqʼil xjal.
27 Porke tajbʼil Dios tuʼn kyjyon xjal tiʼj, ex jaku kanet kyuʼn maske xmakin, tuʼnju nya najchaq taʼ Dios tiʼj teyele junjun qe.
28 Porke noq tuʼn Dios at qchwinqlal, in qo yukch ex itzʼ qoʼ. Ik tzeʼn kyqʼama junjun poeta kyxole: ‹Porke ax ikx qe, tkʼwal Dios qoʼ›.*
29 Tuʼntzunju, ya que tkʼwal* Dios qoʼ, miʼn kubʼ qximen qa ik tten Dios ik tzeʼn jun imagen bʼinchaʼn tuʼn oro, tuʼn plata moqa tuʼn abʼj, ik tzeʼn jun tiʼ in kubʼ kybʼinchaʼn ex in kubʼ kyximen xjal.
30 Ax tok, toj ambʼil ojtxe, xi tqʼoʼn Dios ambʼil tuʼn tbʼaj jlu porke nyatoq ojtzqiʼn kyuʼn xjal. Pero jaʼlo in xi tqʼamaʼn kye kykyaqil xjal in che anqʼin noq jaxku tumel tuʼn tajtz tiʼj kyanmi.
31 Porke o jaw tskʼoʼn Dios jun qʼij tuʼn kyok kykyaqil xjal toj xjel tuʼn toj tumelxix, tuʼn jun xinaq o jaw tskʼoʼn. Ex jaku tzʼok qeʼ kykʼuʼj kykyaqil xjal tiʼj jlu, porke jaw anqʼin tuʼn kyxol kyimni».
32 Tej tok kybʼiʼn xjal qa in yolin Pablo tiʼj qa che jawil anqʼin kyimni, ateʼ junjun e ok ten xmayil tiʼj, atzun junjuntl kyqʼama: «Qajbʼile tuʼn tok qbʼiʼne aj tyolina tiʼj jlu toj juntl maj».
33 Entonces ikʼ bʼet Pablo.
34 Pero e ok lepeʼ junjun xinaq tiʼj ex e okslan. Kyxol, ten Dionisio, jun jwes toj tribunal te Areópago, ax ikx jun xuʼj Dámaris tbʼi ex junjuntl.
