Hechos 6:1-15
6 Tej tchmet kybʼaj discípulo toj tqʼijlalil aju, e ok ten judiy in che yolin toj griego kejaril kyiʼj judiy in che yolin toj hebreo, porke mintiʼ ok qʼoʼn kyoklen xuʼj* viud ateʼ kyxol tej t-xi sipin wabʼj junjun qʼij.
2 Tuʼntzunju, ok kychmoʼn qeju Doce kykyaqil discípulo ex xi kyqʼamaʼn kye: «Nya toj tumel tuʼn tkyaj qtzaqpiʼne tuʼn qyoline tiʼj tyol Dios noq tuʼn t-xi qsipene wabʼj.
3 Tuʼntzunju, erman, kyskʼonktze siete xinaq* kyxole aqeju in che yolin txqantl bʼaʼn kyiʼj, at kynabʼil ex nojni toj kyanmi tuʼn espíritu santo tuʼntzun t-xi qqʼoʼne kyoklen tuʼn t-xi kybʼinchaʼn aqʼuntl lu.
4 Atzun qeye kukx kʼokel tilil quʼne tuʼn qnaʼne Dios ex tuʼn t-xi qqʼoʼne xnaqʼtzbʼil tiʼj tyol».
5 Kykyaqil discípulo bʼaʼn ela jlu toj kywitz ex jaw kyskʼoʼn Esteban, jun xinaq ok qeʼxix tkʼuʼj tiʼj Dios ex nojni toj tanmi tuʼn espíritu santo, junx tukʼil Felipe, Prócoro, Nicanor, Timón, Parmenas ex Nicolás te Antioquía, jun xjal xi tokslaʼn kyreligión judiy.*
6 E xitzun kyiʼn kywitz apóstol, atzun kye apóstol e ok ten naʼl Dios kyiʼj ex kubʼ kyqʼoʼn kyqʼabʼ kyibʼaj.
7 Tuʼn jlu, mas nim qe xjal ok kybʼiʼn tyol Dios ex chmet nimxix kyajlal discípulo toj tnam Jerusalén. Ax ikx nim qe pal e okslan.
8 Atzunte Esteban, kubʼ tyekʼin Dios t-xtalbʼil tiʼj ex tzaj tqʼoʼn tipumal, ex e bʼant qe milagro* tuʼn kyxol xjal ex qe tbʼanel bʼinchbʼen.
9 Pero e pon junjun xinaq qʼojil tiʼj Esteban, aqeju e tzaj toj Ja te Kʼulbʼil* kye qeju e jeʼtz Tzaqpiʼn, atzun junjuntl te Cirene, te Alejandría, te Cilicia ex te Asia.
10 Pero mintiʼ bʼant ttzaqʼwet tyol Esteban kyuʼn, porke yolin tukʼil nim tnabʼil ex onin espíritu santo tiʼj.
11 Entonces e yolin kyukʼil junjun xinaq toj ewaj tuʼn t-xi kyqʼamaʼn jlu tiʼj Esteban: «Ma qbʼiye qa in yolin xinaq lu nya bʼaʼn tiʼj Moisés ex tiʼj Dios».
12 Tuʼntzunju tzaj kyqʼoj xjal, qe ansyan ex qe escriba. E pon tilj tukʼil Esteban, tzaj kytzyuʼn ex xi kyiʼn twitz Sanedrín.
13 Ex e tzaj kyiʼn junjun testiw aqeju kyqʼama nya ax tok yol tiʼj. Kyqʼama: «Kukx in yolin xinaq lu tiʼj tja Dios ex tiʼj Ley.
14 Porke ma tzʼok qbʼiʼne qa in tqʼamaʼn qa kbʼel t-xiten Jesús te Nazaret templo ex qa kbʼajel tchʼexpuʼn kostumbr tzaj tyekʼin Moisés qe».
15 Kykyaqil qeju qʼuqli qetoq toj Sanedrín, tej tok kykeʼyin twitz Esteban, kyil twitz ik tzeʼn twitz jun anjel.
