Hechos 26:1-32
26 Xitzun tqʼamaʼn Agripa te Pablo: «Jaku yolina tuʼn tklonte tibʼa». Entonces xi tbʼinchaʼn Pablo señ tukʼil tqʼabʼ ex xi tzyet tuʼn tyolin tuʼn tklon tibʼ:
2 «Aya rey Agripa, in chin tzalaje tuʼnju jaku bʼant nklon wibʼe twitza tiʼj tkyaqilju in kyqʼamaʼn judiy wiʼje.
3 Ex mas porke ojtzqiʼn kykostumbr judiy tuʼna ex tkyaqilju in yolinjtz kyxol. Tuʼntzunju, in chin kubʼsane twitza tuʼn wok tbʼiʼna tukʼil pasens.
4 Kykyaqil judiy ojtzqiʼn qine kyuʼn, ojtzqiʼn kyuʼn tzeʼn tten wanqʼibʼile nej tej tzmatoq kuʼxun qine, tanto kyxol nxjalile* ex toj Jerusalén.
5 Ex noqwit kyajbʼil, jaku txi kyqʼamaʼn teya qa in nanqʼine ik tzeʼn jun fariseo, aqeju xjal kyajbʼil tuʼn tjapun twi tkyaqilju in tzaj tqʼamaʼn qokslabʼil.
6 Pero jaʼlo in chin kubʼ juzgarine tuʼnju in chin ayone tuʼn tjapun kywi yol xi tqʼamaʼn Dios kye ojtxe qyajil.
7 Aʼyex yol in che ayon 12 tribu te Israel tiʼj tuʼn tjapun twi, tuʼntzunju in che ajbʼen te Dios qʼijl ex qonikʼen. Ex in kyqʼamaʼn judiy qa at wile, aya tat rey, noq tuʼnju in chin ayone tuʼn tjapun kywi yol lu.
8 ¿Tiquʼn mintiʼ in xi kyokslaʼne qa che jawil anqʼin kyimni tuʼn Dios?
9 Porke ax ikx weye kubʼ nximane tuʼn t-xi nbʼinchaʼne noq tiʼxku tuʼn nqʼojine tiʼj tbʼi Jesús te Nazaret.
10 Atzun jlu bʼant wuʼne Jerusalén. Tukʼil permis tzaj kyqʼoʼn pal nim kyoklen weye, e okx nqʼoʼne nim okslal pres. Ex tej kykubʼ bʼyoʼn, ax ikx weye bʼaʼn ela toj nwitze.
11 In xiʼye jyol kye kyoj kykyaqil ja te kʼulbʼil* ex kubʼ nqʼoʼne kykastiw noq tuʼn tkyaj kytzaqpiʼn kyokslabʼil. Ex tuʼnju otoq tzaj nim nqʼoje kyiʼj, ax ikx in xiʼye jyol kye kyoj tnam najchaq ateʼ.
12 Atzun jlu in bʼanttoq wuʼne tej nxiʼye Damasco. Otoq tzaj qʼoʼn permis weye ex otoq tzaj qʼoʼn woklene kyuʼn pal nim kyoklen.
13 Pero tej tzmatoq in chin bʼete tat rey, como a las 12 del mediodía, wile jun spikʼun tzaj twitz kyaʼj ex mastoq in qoptzʼaj tspikʼumal twitz tqan qʼij. Qoptzʼaj wibʼaje ex kyibʼaj qeju ateʼ wukʼile.
14 Tej qkubʼ tzʼaqe qkyaqile twitz txʼotxʼ, ok nbʼiʼne jun xjal tzaj yolin weye toj hebreo: ‹Saulo, Saulo, ¿tiquʼn in nok tbʼinchaʼna nya bʼaʼn wiʼje? Tuʼnxa in bʼaj tkʼixbʼisaʼn tibʼa ik tzeʼn jun wakx in nok tpatearin tzeʼ in najbʼen xyuʼlte›.*
15 Xi ntzaqʼweʼne te: ‹¿Alkyetzuna tat?›. Atzunte tzaj ttzaqʼweʼn weye: ‹Aqine Jesús, aju in nok tbʼinchaʼna nya bʼaʼn tiʼj.
16 Pero jaʼlo weʼktza. Ma kubʼ nyekʼin wibʼe twitza porke ma jaw nskʼoʼna tuʼn toka te nmajene ex tuʼn toka testiw tiʼjju ma tzʼok tkeʼyina wiʼje ex tiʼjju kxel nyekʼine teya.
17 Ex kkletela wuʼne toj kyqʼabʼ xjal lu ex toj kyqʼabʼ xjal kyoj txqantl tnam jatumel kxel nsamaʼna.
18 Kʼonila kyiʼj tuʼn tjaqet kywitz, tuʼntzun kyetz toj qlolj ex tuʼn kyul toj spikʼun, tuʼn kyetz tjaqʼ tipumal Satanás ex tuʼn kyul tukʼil Dios. Iktzun tten kbʼel najsaʼn kyil tuʼn Dios ex che ktzajel tkʼiwlaʼn ex che okel xjan noq tuʼnju in nok qeʼ kykʼuʼj wiʼje›.
19 Tuʼntzunju, tat rey Agripa, xi nbʼinchaʼne aju tzaj tqʼamaʼn Jesús weye toj witzikʼ ok nkeʼyine.
20 Ex tnejel in xiʼye kyukʼil xjal najl qe toj Damasco ex yajxitl kyukʼil qeju ateʼ Jerusalén, ax ikx in xiʼye toj tkyaqil tnam te Judea ex kyukʼil xjal in che anqʼin kyoj junjuntl tnam. Ex xi nqʼamaʼne kye qa iltoq tiʼj tuʼn tajtz tiʼj kyanmi ex tuʼn kymeltzʼaj tukʼil Dios, ex tuʼn tkubʼ kyyekʼin tukʼil kybʼinchbʼen qa otoq tzʼajtz tiʼj kyanmi.
21 Tuʼntzun jlu in tzyete kyuʼn judiy toj templo ex kyajbʼiltoq tuʼn tkubʼ kybʼyoʼn qine.
22 Pero noq tuʼn tonbʼil Dios, kukx in chin yoline tiʼj tyol jaʼlo, kyukʼil xjal nim kyoklen ex kyukʼil xjal chʼin kyoklen. Ex mintiʼ juntl tiʼ in xi nqʼamaʼne, noq oʼkx aju kubʼ kytzʼibʼin Profeta ex aju kubʼ ttzʼibʼin Moisés tuʼn tbʼaj. Aqeju kyqʼama
23 qa iltoq tiʼj tuʼn tsufririn Cristo ex qa a tnejel tuʼn tjaw anqʼin kyxol kyimni, ex qa kyolil tiʼj spikʼun kyukʼil qxjalil ex kyukʼil xjal kye txqantl tnam».
24 Tej tzmatoq in tqʼamaʼn Pablo jlu tuʼn tklonte tibʼ, jaw schʼin Festo ex tqʼama: «¡Ma tzʼoka te loc Pablo! ¡Ma tzpet twiʼya tuʼnju in xnaqʼtzana nim!».
25 Pero xi ttzaqʼweʼn Pablo te: «Nya loc qine tat Festo, nimxix toklen, axix tok aju in chin yoline tiʼj ex at ttxolil.
26 Ex mintiʼ in chin xobʼe tuʼn nyoline tukʼil rey tiʼj, porke ojtzqiʼn tkyaqil jlu tuʼn. Ex qʼuqli nkʼuʼje tiʼj qa ojtzqiʼn tkyaqil jlu tuʼn, porke mintiʼ jun tiʼ o bʼant toj ewaj.
27 Aya rey Agripa, ¿okslaʼnpe tuʼna aju kubʼ kytzʼibʼin Profeta? Ojtzqiʼn wuʼne qa okslaʼn tuʼna».
28 Atzunte Agripa xi ttzaqʼweʼn te Pablo: «Jurat jaku kubʼ nkʼuʼje tuʼna tuʼn woke te okslal».
29 Xi tqʼamaʼn Pablo te: «In chin kubʼsane twitz Dios, qa jaʼlo moqa yajxitl, nya oʼkx teya tat rey Agripa, sino kykyaqil qeju in che bʼin wiʼje jaʼlo, waje tuʼn kyok ik tzeʼn weye, pero nya kʼaloʼn qe tuʼn cadena ik tzeʼn weye jaʼlo».
30 Tej tbʼaj yolin Pablo, jaw weʼ rey junx tukʼil gobernador, tukʼil Berenice ex qe xinaq* qʼuqli qetoq kyukʼil.
31 Tej kyetz, in che yolintoq kyxolx ex in kyqʼamaʼn: «Mintiʼ jun il ma kubʼ tbʼinchaʼn xinaq lu tuʼn tkyim moqa tuʼn tokx qʼoʼn pres».
32 Ax ikx, xi tqʼamaʼn Agripa te Festo: «Noqwit mintiʼ ma tzaj tqanin xinaq lu tuʼn t-xiʼ twitz César, mawtlo tzʼex tzaqpet».
