Hechos 3:1-26
3 Jun qʼij, jax Pedro tukʼil Juan toj templo como a las 3 te qale,* toj or tej kypon xjal naʼl Dios.
2 Tej kypon, ax ikx e pon junjun xjal iqintoq jun xinaq* kyuʼn aju kox titzʼjlenx. Tkyaqil qʼij, xi kyiʼn xinaq lu ttzi templo jatumel taʼ pwert tok tbʼi Tbʼanelxix, tuʼn t-xi tqanin tkotz kye xjal e pon toj templo.
3 Tej til xinaq kox qa chʼinxtoq tokx Pedro ex Juan toj templo, xi tqanin tkotz kye.
4 Pero xi tkeʼyin Pedro ex Juan xinaq ex xi tqʼamaʼn Pedro te: «Qo tkeʼyintza».
5 Tuʼntzunju, kyaj keʼyin xinaq kox kyiʼj ex ayon tuʼn t-xi kyqʼoʼn jun tiʼ te.
6 Pero xi tqʼamaʼn Pedro te: «Mintiʼ qʼiʼn plata ex oro wuʼne, pero kxel nqʼoʼne teya aju at weye. ¡Kxel nqʼamaʼne teya toj tbʼi Jesucristo te Nazaret, weʼktza ex bʼeta!».
7 Tej tbʼaj tqʼamaʼn Pedro jlu, tzaj ttzyuʼn tqʼabʼ xinaq derecha ex jaw twabʼan, ex jurat ok kyipun tqan.
8 Jaw tʼikpaj ex kubʼ weʼ, ex ok ten bʼetel. Okx kyukʼil toj templo, in bʼet ex in tʼikpaj ex in xi tqʼoʼn chjonte te Dios.
9 Ex kyil kykyaqil xjal qa in bʼet ex qa in xi tqʼoʼn chjonte te Dios.
10 Tej tel kynikʼ xjal tiʼj qa atoq xinaq kox in kubʼ qeʼ qanil tkotz ttzi templo jatumel taʼ Pwert Tbʼanelxix, e jaw labʼin ex mintiʼ xi kyokslaʼn aju otoq bʼaj.
11 Tej tzyuʼn Pedro ex Juan tuʼn xinaq, e xiʼ ojqelan xjal kyukʼil ex bʼaj kychmon kyibʼ jatumel taʼ Corredor* Salomón tbʼi. Ex e jaw labʼin tiʼjju otoq bʼaj.
12 Tej tok tkeʼyin Pedro jlu, xi tqʼamaʼn kye xjal: «Aqeye xjal te Israel, ¿tiquʼn in che jaw labʼine tiʼj jlu? ¿Tiquʼn in kubʼ kyximane qa tuʼn qipumale ma bʼet xinaq lu moqa tuʼnju in qo kʼuline te Dios tukʼil tkyaqil qanmiye?
13 Porke aju Kydios qtzan qchman, aju Tdios Abrahán, Tdios Isaac ex Jacob, jaw tnimsaʼn Jesús aju Tmajen. Aju xinaq xi kyqʼoʼne toj tqʼabʼ Pilato ex el kyikʼune, maske otoq kubʼ t-ximen tuʼn tetz ttzaqpiʼn.
14 Ikju, el kyikʼune xinaq lu xjan ex tzʼaqli, ex xi kyqanine tuʼn tetz tzaqpiʼn jun bʼyol xjal.
15 Kubʼ kybʼyoʼne Nejenel qʼol chwinqlal. Pero jaw anqʼin tuʼn Dios kyxol kyimni ex qile jlu.
16 Atzunte xinaq lu in nok kykeʼyine ex ojtzqiʼn kyuʼne, ma tzʼok tipumal tqan noq tuʼn tbʼi Jesús ex tuʼnju in nok qeʼ qkʼuʼje tiʼj tbʼi. Ikju, noq tuʼnju in nok qeʼ qkʼuʼje tiʼj Jesús ma bʼant xinaq lu kywitze kykyaqile.
17 Aqeye werman, bʼiʼn wuʼne qa nyatoq ojtzqiʼn kyuʼne tiʼ in xi kybʼinchaʼne, ik tzeʼn kye gobernador kyxole.
18 Pero xi tqʼoʼn Dios ambʼil tuʼn tbʼaj jlu tuʼn tjapun kywi yol otoq tzaj tqʼamaʼn kye kykyaqil profeta, qa iltoq tiʼj tuʼn tsufririn Tcristo.
19 Tuʼntzunju, tajtz tiʼj kyanmiye ex che meltzʼaje tukʼil Dios tuʼn tkubʼ najsaʼn kyile. Entonces ktzajel tqʼoʼn Jehová* tqʼijlalil chewsabʼl kyeye
20 ex tzul tsamaʼn Jesús, aju Cristo jaw skʼoʼn onil kyeye.
21 Ilxix tiʼj tuʼn tkyaj ten Jesús toj kyaʼj tzmaxi aj tpon tqʼijlalil tuʼn tok tkyaqil juntl maj te akʼaj, ik tzeʼn tzaj tqʼamaʼn Dios kye profeta xjan e anqʼin ojtxe.
22 Porke tqʼama Moisés jlu: ‹Kjawil tskʼoʼn Jehová* aju Kydiose jun profeta ik tzeʼn weye kyxol kyermane. Il tiʼj tuʼn t-xi kybʼiʼne ex tuʼn t-xi kybʼinchaʼne tkyaqilju kxel tqʼamaʼn kyeye.
23 Ex alkye mintiʼ ma txi tbʼiʼn Profeta lu, kbʼel najsaʼn tuʼn ya miʼn tten kyxol xjal›.
24 Ex kykyaqil profeta, tzajni tzyet tiʼj Samuel ex qeju e anqʼin yajxitl, e yolin tiʼj tqʼijlalil lu.
25 E yolin profeta lu tiʼj trat kyaj bʼant tuʼn Dios kyukʼil qtzan kychmane, aju ax ikx kyeye at kyoklene tiʼj, porke xi tqʼamaʼn Dios jlu te Abrahán: ‹Che bʼel kʼiwlaʼn kykyaqil tnam* twitz txʼotxʼ noq tuʼn tyajila›.
26 Tej tjaw tskʼoʼn Dios Tmajen, tzaj tsamaʼn kyukʼile tnejel tuʼn kykubʼ kʼiwlaʼne tuʼn, tuʼn tonin tiʼj teyele junjun kyeye tuʼn tajtz tiʼj tanmi tiʼj tbʼinchbʼen nya bʼaʼn».
