Hechos 1:1-26
1 Aya Teófilo, kubʼ ntzʼibʼine teya toj tnejel uʼj tkyaqilju xi tzyet tuʼn tbʼant tuʼn Jesús ex aju xnaqʼtzbʼil xi tqʼoʼn,
2 tzmaxi tej t-xi qʼiʼn toj kyaʼj. Xi qʼiʼn toj kyaʼj tej otoq t-xi tqʼamaʼn kye apóstol e jaw tskʼoʼn tiʼ tuʼn tbʼant kyuʼn ex xi tqʼamaʼn jlu kye tuʼn tonbʼil espíritu santo.*
3 Tnejel sufririn Jesús nim tzmaxi tej tkyim ex yajxitl kubʼ tyekʼin tibʼ kywitz nimku maj tuʼntzun tok qeʼ kykʼuʼj tiʼj qa itzʼ. Kyil toj 40 qʼij ex ok ten yolil kyukʼil tiʼj Tgobierno Dios.*
4 Tej tok tchmon tibʼ kyukʼil, xi tqʼamaʼn jlu kye: «Miʼn che exe toj tnam Jerusalén. Che ayone tiʼjju tzaj tprometerin Mambʼaj kyeye, aju in yoline tiʼj kyukʼile.
5 Porke e bautisarin xjal tuʼn Juan toj aʼ, atzun kyeye che bautisarile tuʼn espíritu santo toj jteʼ qʼijtl».
6 Tej tok kychmon kyibʼ juntl maj, xi kyqanin te Jesús: «Tat, ¿okpe kxel tzyet tuʼn tkawin Tgobierno Dios juntl maj toj Israel toj ambʼil jaʼlo?».
7 Xi ttzaqʼweʼn Jesús kye: «Oʼkx Mambʼaj jaku tzaj qʼamante jtoj ex alkye qʼij kbʼajel jlu, atzun kyeye nya il tiʼj tuʼn tel kynikʼe tiʼj.
8 Pero tzul qʼoʼn kyipumale aj tul espíritu santo kyibʼaje. Ex che okele testiw wiʼje toj Jerusalén, toj tkyaqil Judea ex Samaria, ex twitz tkyaqil txʼotxʼ».
9 Tej tbʼaj tqʼamaʼn Jesús jlu, jaw qʼiʼn Jesús kywitz tej in che keʼyin tiʼj. Ex ok jupl jun muj tiʼj ex ya mintiʼ qʼanchaʼlix toj kywitz.
10 Tej tzmatoq in che keʼyin twitz kyaʼj tiʼj Jesús tej t-xi qʼiʼn, kubʼ kyyekʼin kyibʼ kabʼe xinaq* kytxlaj tok kyxbʼalun saq
11 ex xi kyqʼamaʼn kye: «Aqeye xinaq te Galilea, ¿tiquʼn ma che kyaj tene keʼyil twitz kyaʼj? Aju Jesús ma ten kyukʼile ex ma t-xi qʼiʼn toj kyaʼj, tzul juntl maj ik tzeʼn ma kyile xiʼ toj kyaʼj».
12 Yajxitl e meltzʼaj twi witz Olivos ex e pon toj Jerusalén. Atztoq tok witz Olivos nqayin tiʼj Jerusalén como a un kilómetro.*
13 Tej kypon, e jax toj tkabʼin nivel ja jatumel e kyaj ten. Kyxol qeju e ten, ten Pedro, Juan, Santiago ex Andrés, Felipe ex Tomás, Bartolomé ex Mateo, ten Santiago tkʼwal Alfeo, Simón el Entusiasta* ex ten Judas aju tkʼwal Santiago.
14 Junx kyximbʼetz ten kykyaqil, ok kychmon kyibʼ tuʼn kynaʼn Dios nimku maj. Ex kyukʼil e ten junjun xuʼj,* ax ikx ten María aju ttxuʼ Jesús ex qe titzʼin Jesús.
15 Kyoj qʼij aju, ok kychmon kyibʼ junlo 120 kybʼet erman ex jaw weʼ Pedro kyxol ex xi tqʼamaʼn kye:
16 «Aqeye erman, iltoq tiʼj tuʼn tjapun twi profecía tzaj tqʼamaʼn David toj tyol Dios tiʼj Judas, aju kubʼ nej kywitz qeju tzaj tzyunte Jesús. Tzaj tqʼamaʼn David profecía lu tuʼn tonbʼil espíritu santo.
17 Ten Judas qxol ex xi qʼoʼn toklen tuʼn tajbʼen junx qukʼil.
18 (Tzaj tlaqʼoʼn xinaq lu jun piẍ txʼotxʼ tuʼn twi tkʼuʼj tzaj chjoʼn tiʼj tbʼinchbʼen nya bʼaʼn. Ex tej ttzaj pichʼkuj, el laqj tkʼuʼj ex etz chitj toj tkʼuʼj.
19 Tej tok kybʼiʼn kykyaqil xjal te Jerusalén jlu, ok kyqʼoʼn tbʼi txʼotxʼ lu te Akéldama, aju toj kyyol a tzʼelpun ‹lugar te chikʼ›).
20 Porke kubʼ tzʼibʼin jlu toj uʼj te Salmos: ‹Mlaywit tzʼanqʼin jun xjal toj tja ex mlaywit najan jun xjal toj›, ex ‹bʼaʼnwt tuʼn t-xi qʼoʼn toklen te juntl›.
21 Tuʼntzunju, il tiʼj tuʼn tjaw qskʼoʼn jun xinaq kyxol qeju e bʼet qukʼil tej tbʼant taqʼun Qajaw Jesús qxol,
22 tuʼntzun tok testiw junx qukʼil tiʼj ambʼil tej tjaw anqʼin. Jun xinaq ten qukʼil tej tbautisarin tuʼn Juan hasta tej t-xi qʼiʼn toj kyaʼj».
23 Tuʼntzunju e yolin tiʼj kabʼe xinaq, tiʼj José aju ok qʼoʼn tbʼi te Barsabás ex ok ojtzqiʼn ik tzeʼn Justo, ex tiʼj Matías.
24 Yajxitl e ok ten naʼl Dios ex kyqʼama: «Aya Qman Jehová,* ojtzqiʼn kyanmi kykyaqil xjal tuʼna. Najsama, yekʼuntza qeye alkye ma jaw tskʼoʼna kyxol kabʼe xinaq lu
25 tuʼn tok te apóstol te t-xel Judas ex tuʼn tajbʼen teya. Porke ma kyaj tqʼoʼn Judas toklen ex ma txiʼ toj tex tlugar».
26 Entonces jaw kyiʼn swert ex kubʼ tzʼaq tibʼaj Matías ex ok tajlal kyukʼil juntl* 11 apóstol.
Tqanil
^ Moqa «xewbʼaj xjan».
^ Moqa «Tkawbʼil Dios».
^ Toj junjuntl lugar «ichan».
^ Toj griego «ik tzeʼn jaku txi tbʼetin jun xjal toj sábado». Toj juntl yol, aju jakutoq txi tbʼetin jun judiy toj jun qʼij sábado.
^ Moqa «el Celoso».
^ Toj junjuntl lugar «qya».
^ Qʼonka twitza tiʼj xnaqʼtzbʼil A5.
^ Toj juntl yol, ok qʼoʼn toklen ik tzeʼn kye juntl 11 apóstol.
