Hechos 4:1-37
4 Tej tzmatoq in yolin Pedro ex Juan kyukʼil xjal, e pon laqʼeʼ pal kyukʼil, tukʼil nejenel kye guardia toj templo ex qe saduceo.
2 Tzaj kyqʼoj porke xi kyqʼoʼn apóstol xnaqʼtzbʼil kye xjal ex mintiʼ e tzaj xobʼ tej kyyolin tiʼj tzeʼn jaw anqʼin Jesús kyxol kyimni.
3 Tuʼntzunju, tzaj kytzyuʼn Pedro ex Juan ex e okx kyqʼoʼn pres, tzmaxi tej qsqix toj juntl qʼij porke otoq qo qax.
4 Pero nim qe xjal ok kybʼiʼn kyyol, e okslaʼn. E okslaʼn junlo 5 mil xinaq.*
5 Toj juntl qʼij, ok kychmon kyibʼ gobernador toj Jerusalén, qe ansyan ex qe escriba,
6 junx tukʼil Anás aju nejenel kye pal ex tukʼil Caifás, tukʼil Juan ex tukʼil Alejandro, ex kyukʼil kykyaqil qeju tfamiliar nejenel kye pal.
7 Entonces tzaj kyiʼn Pedro ex Juan, kubʼ kyqʼoʼn kyxol ex xi kyqanin kye: «¿Alkye ma tzaj qʼonte kyipumale tuʼn tbʼant jlu kyuʼne moqa altoj qbʼi ma bʼant kyuʼne?».
8 Noj toj tanmi Pedro tuʼn espíritu santo ex xi ttzaqʼweʼn kye:
«Aqeye gobernador kyoj tnam ex aqeye ansyan,
9 ¿kyaje tuʼn tel kynikʼe tiʼjju ma bʼant quʼne tiʼj xinaq lu kox ex tzeʼn tten ma bʼant?
10 Qa ikju, tzʼelx kynikʼe kykyaqile tiʼj jlu junx kyukʼil xjal te Israel: ma bʼant xinaq lu toj tbʼi Jesucristo te Nazaret, aju kubʼ kybʼyoʼne twitz tzeʼ ex yajxitl jaw anqʼin tuʼn Dios kyxol kyimni. Noq tuʼn, ma bʼant xinaq lu waʼl kywitze.
11 A Jesús ‹abʼj nyatoq kyaje tuʼn tajbʼen kyuʼne aqeye xjal bʼinchal ja, pero jaʼlo ma tzʼok teju abʼj mas nim toklen›.
12 Ex mi aʼl juntl xjal jaku qo klet tuʼn, porke mintiʼ juntl xjal* twitz tkyaqil txʼotxʼ* ma txi tqʼoʼn Dios toklen tuʼn qklet tuʼn».
13 Tej tok kykeʼyin gobernador ex qe ansyan qa mintiʼ tzaj xobʼ Pedro ex Juan, e jaw labʼin porke el kynikʼ tiʼj qa noq aqʼunal xjal qe ex nyatoq nim kyxnaqʼtzbʼil.* Ex el kynikʼ tiʼj qa otoq che ten tukʼil Jesús.
14 Pero mintiʼ e ok ten yolil kyiʼj, porke kyil qa waʼltoq xinaq otoq kubʼ qʼanin kytxlaj.
15 Tuʼntzunju, xi kyqʼamaʼn kye tuʼn kyex toj kwart te Sanedrín, e ok ten yolil kyxolx
16 ex kyqʼama: «¿Tiʼ kbʼantel quʼn kyukʼil xinaq lu? Porke ma tzʼok kybʼiʼn kykyaqil xjal in che anqʼin toj Jerusalén qa ma bʼant jun milagro* kyuʼn ex mlay bʼant tuʼn tkubʼ qewin.
17 Pero tuʼn miʼn tok kybʼiʼn txqantl xjal aju ma bʼaj, che qxobʼtzanx ex qqʼamanx kye tuʼn miʼn kyyolin tiʼj tbʼi Jesús tukʼil nijun xjal».
18 E tzajtzun kytxkoʼn ex xi kyqʼamaʼn kye tuʼn miʼn kyyolin ex tuʼn miʼn txi kyqʼoʼn xnaqʼtzbʼil tiʼj tbʼi Jesús.
19 Pero xi ttzaqʼweʼn Pedro ex Juan kye: «Qa in kubʼ kyximane qa mas bʼaʼn toj twitz Dios tuʼn qbʼine kyeye twitzju tuʼn qbʼine te Dios, aqeye keʼyilte.
20 Pero mlay bʼant tuʼn tkyaj qtzaqpiʼne tuʼn qyoline tiʼjju ma qile ex ma qbʼiye».
21 Tuʼntzunju, tej tok kyxobʼtzaʼn juntl maj Pedro ex Juan, e jeʼtz kytzaqpiʼn tuʼnju mintiʼ kanet jun kyil kyuʼn tuʼn tkubʼ kysentens ex tuʼnju e tzaj xobʼ kywitz xjal, porke kykyaqil xjal jaw kynimsaʼn Dios tuʼnju otoq bʼaj.
22 Porke qʼiʼntoq mas te 40 años tuʼn xinaq kubʼ qʼanin tuʼn milagro* lu.
23 Tej tetz tzaqpiʼn Pedro ex Juan, e xiʼ kyukʼil txqantl discípulo ex xi kyqʼamaʼn kye aju kyqʼama pal nim kyoklen ex qe ansyan.
24 Tej tok kybʼiʼn jlu, e ok ten naʼl Dios junx ex kyqʼama:
«Aya Qman Tajaw Tkyaqil, aya kubʼ bʼinchante kyaʼj, txʼotxʼ ex mar, ex tkyaqilju at kyoj.
25 Ex aya tzaj qʼamante jlu te tmajena David aju qtzan qchmane tuʼn tonbʼil espíritu santo: ‹¿Tiquʼn ma che jaw tilj xjal kyoj tnam ex tiquʼn in che ximen kykyaqil xjal tiʼjju noqx gan?
26 Ma bʼaj kybʼinchaʼn kyten rey te twitz txʼotxʼ tuʼn kyqʼojin tiʼj Jehová* ex tiʼj xjal jaw tskʼoʼn,* ex ma tzʼok kychmon kyibʼ gobernador tuʼn kyqʼojin kyiʼj›.
27 Ex atzun jlu ma bʼaj, porke ma tzʼok tmojbʼan tibʼ Herodes tukʼil Poncio Pilato toj tnam lu, kyukʼil xjal te Israel ex kyukʼil txqantl xjal tuʼn kyqʼojin tiʼj Jesús aju tmajena xjan ex aju o txi tqʼoʼna toklen.
28 Ok kychmon kyibʼ tuʼn t-xi kybʼinchaʼn aju kyaj tqʼamaʼna, porke at tipumala ex atzun tajbʼila.
29 Jaʼlo Qman Jehová,* qʼonk twiʼya tiʼjju ma tzaj kyqʼamaʼn qeye ex qʼontza kyipumal tmajena tuʼn miʼn kytzaj xobʼ tuʼn kyyolin tiʼj tyola.
30 Najsama, kukx qʼontza tipumala tuʼn kybʼant qe yabʼ, qe milagro* ex qe tbʼanel bʼinchbʼen toj tbʼi Jesús aju tmajena xjan».
31 Tej kybʼaj naʼn Dios tuʼn tkyaqil kyanmi,* tzaj luʼlun ja jatumel ok kychmon kyibʼ ex noj toj kyanmi kykyaqil tuʼn espíritu santo ex mintiʼ e tzaj xobʼ tej kyok ten yolil tiʼj tyol Dios.
32 Ex kykyaqil qeju otoq che okslan, ten junx kyximbʼetz ex kynabʼil, ex nijun kubʼ t-xkʼayin aju at te, sino xi kysipen kyxolx tkyaqilju at kye.
33 Kukx e yolin apóstol tukʼil kyipumal tiʼj tzeʼn jaw anqʼin Qajaw Jesús kyxol kyimni. Ex nimxix t-xtalbʼil Dios kubʼ ten kyibʼaj kykyaqil.
34 Ex nijun kyxol ikʼ toj necesidad, porke kykyaqil qeju attoq kytxʼotxʼ ex kyja, xi kykʼayin ex xi kyiʼn pwaq otoq kambʼet kyuʼn
35 ex xi kyqʼoʼn kye apóstol. Atzun kye apóstol xi kysipen kyxol qeju at tajbʼen kye.
36 Ax ikx attoq jun levita José tbʼi aju ok qʼoʼn tbʼi te Bernabé kyuʼn apóstol, (a tzʼelpuna tbʼi «Qʼuqbʼal kykʼuʼj txqantl»). Ex atz ul itzʼj toj tnam Chipre.
37 Xi tkʼayin jun piẍ ttxʼotxʼ ex xi tiʼn pwaq otoq tzaj chjoʼn te, ex xi tqʼoʼn kye apóstol.
Tqanil
^ Toj junjuntl lugar «ichan».
^ Toj griego «bʼibʼaj».
^ Toj griego «tjaqʼ kyaʼj».
^ Moqa «mintiʼ e xiʼ toj escuela». Toj juntl yol, mintiʼ e xnaqʼtzan kyoj escuela kye nejenel kyxol judiy. Nya a tzʼelpuna qa mintiʼ in bʼant kyleerin ex kytzʼibʼin.
^ Toj griego «señal».
^ Toj griego «señal».
^ Qʼonka twitza tiʼj xnaqʼtzbʼil A5.
^ Moqa «tiʼj Tcristo».
^ Qʼonka twitza tiʼj xnaqʼtzbʼil A5.
^ Toj griego «qe señal».
^ Moqa «Tej kybʼaj kubʼsan twitz Dios».
