Hechos 23:1-35
23 Xi tkeʼyin Pablo toj kywitz kykyaqil qeju ateʼ toj Sanedrín ex xi tqʼamaʼn kye: «Aqeye erman, atxix ojtxe o chin anqʼine bʼaʼn twitz Dios ex tukʼil jun tbʼanel wanmiye».
2 Tej tok tbʼiʼn Ananías jlu, aju nejenel kye pal, xi tqʼamaʼn kye qeju ateʼ ttxlaj Pablo tuʼn tok kytzʼajin toj ttziʼ.
3 Atzunte Pablo xi tqʼamaʼn te: «Xmeletzʼ,* ax ikx teya kʼokel tzʼajina tuʼn Dios. Qa qʼuqla tuʼn woke toj xjel tuʼna ik tzeʼn in tzaj tqʼamaʼn Ley, ¿tiquʼn in nikʼa tibʼaj Ley ex in xi tqʼamaʼna tuʼn wok tzʼajine?».
4 Atzun qeju waʼl qetoq ttxlaj Pablo kyqʼama: «¿In jawpe ilina tiʼj nejenel kye pal o jaw skʼoʼn tuʼn Dios?».
5 Xi ttzaqʼweʼn Pablo kye: «Aqeye erman, nyatoq ojtzqiʼn wuʼne qa a nejenel kye pal. Porke tzʼibʼin toj tyol Dios: ‹Miʼn yolina nya bʼaʼn kyiʼj nejenel toj ttnama›».
6 Tuʼnju ojtzqiʼntoq tuʼn Pablo qa attoq jun grupo saduceo ex jun grupo fariseo toj Sanedrín, tqʼama tukʼil tqʼajqʼajel twiʼ: «Aqeye erman, ax ikx weye fariseo qine, tzajni qine kyiʼj fariseo. Ma chin oke toj xjel jaʼlo porke in nok qeʼ nkʼuʼje tiʼj qa che kjawil anqʼin kyimni».
7 Tej tqʼama Pablo jlu, tzaj qʼoj kyxol fariseo ex saduceo, ex el kypan kyibʼ kykyaqil.
8 Porke in kubʼ kyximen saduceo qa mlay che jaw anqʼin kyimni, qa mintiʼ qe anjel ex qa mintiʼ espíritu, atzun kye fariseo in kubʼ kyximen* qa at.
9 Tuʼntzunju, e jaw schʼin kykyaqil. Entonces e jaw weʼ junjun escriba at kyoklen kyxol fariseo ex kyqʼama tukʼil qʼoj: «Mintiʼ jun til xinaq lu ma kanet quʼne. ¿Yajtzun qa ma yolin tukʼil jun espíritu moqa tukʼil jun anjel?».
10 Tej tok tkeʼyin coronel qa mas tzaj kyqʼoj xjal, tzaj xobʼ porke kubʼ t-ximen qa jakutoq kubʼ bʼyoʼn Pablo. Tuʼntzunju, xi tqʼamaʼn kye soldad tuʼn kyxiʼ qʼilte ex tuʼn t-xi kyiʼn toj cuartel kye soldad.
11 Toj qonikʼen aju, kubʼ tyekʼin tibʼ Qajaw twitz Pablo ex xi tqʼamaʼn te: «¡Miʼn xobʼa! Porke ik tzeʼn ma yolina bʼaʼn wiʼje toj Jerusalén, ax ikx il tiʼj tuʼn tyolina wiʼje toj tnam Roma».
12 Tej qsqix, kubʼ kyximen judiy tuʼn tkubʼ kybʼyoʼn Pablo ex xi kyqanin tuʼn ttzaj nya bʼaʼn kyibʼaj qa ma che waʼn ex qa ma che kʼan qa naʼmxtoq tkubʼ kybʼyoʼn.
13 Ex mas te 40 kybʼet xinaq* kubʼ kyximen tuʼn tbʼant jlu kyuʼn.
14 Tuʼntzunju, e xiʼ keʼyil kye pal nim kyoklen ex qe ansyan, ex xi kyqʼamaʼn kye: «Ma txi qqanine tuʼn ttzaj nya bʼaʼn qibʼaje qa ma qo waʼne ex qa ma qo kʼane naʼmxtoq tkubʼ qbʼyoʼne Pablo.
15 Tuʼntzunju, kyqaninxe tukʼil Sanedrín te coronel tuʼn ttzaj tiʼn Pablo kywitze, kyqʼamanxe te qa kyajbʼile tuʼn kyyoline mas tukʼil. Atzun qeye list qo tele tuʼn tkubʼ qbʼyoʼne naʼmxtoq tpon kyukʼile».
16 Pero ok tbʼiʼn tal tanabʼ Pablo aju otoq kubʼ kyximen judiy. Tuʼntzunju, xiʼ toj cuartel kye soldad ex xi tqʼamaʼn te Pablo.
17 Tzajtzun ttxkoʼn Pablo jun capitán kye soldad ex xi tqʼamaʼn te: «Qʼinxa kuʼxun lu twitz coronel, porke at jun tqanil tuʼn t-xi tqʼamaʼn te».
18 Tuʼntzunju, xi tiʼn capitán kuʼxun twitz coronel ex xi tqʼamaʼn te: «Ma chin tzaj txkoʼne tuʼn pres Pablo ex ma tzaj tqanin weye tuʼn ttzaj wiʼne kuʼxun lu twitza porke at jun tqanil tuʼn t-xi tqʼamaʼn teya».
19 Tzajtzun ttzyuʼn coronel tqʼabʼ kuʼxun, xi tiʼn part ex xi tqanin te: «¿Tiʼtzun tajbʼila tuʼn ttzaj tqʼamaʼna weye?».
20 Xi tqʼamaʼn kuʼxun te: «Ma kubʼ kyximen judiy tuʼn t-xi kyqanin teya tuʼn t-xi tiʼna Pablo kywitz toj Sanedrín nchiʼj, in kyqʼamaʼn qa kyajbʼil tuʼn kyyolin mas tukʼil.
21 Pero miʼn txi tbʼiʼna kyyol, porke in che ayon mas te 40 xinaq tiʼj tuʼn tkubʼ kybʼyoʼn. Ax ikx ma txi kyqanin tuʼn ttzaj nya bʼaʼn kyibʼaj qa ma che waʼn ex qa ma che kʼan naʼmxtoq tkubʼ kybʼyoʼn. Ex oʼkx in che ayon tiʼj tzaqʼwebʼil kxel tqʼoʼna kye».
22 Tej chʼixtoq tetz kuʼxun, xi tqʼamaʼn coronel te: «Miʼn yolina tukʼil jun xjal tiʼjju ma tzaj tqʼamaʼna weye».
23 Yajxitl e tzaj ttxkoʼn kabʼe capitán kye soldad ex xi tqʼamaʼn kye: «Kybʼinchame kyten 200 soldad tuʼn kyxiʼ Cesarea a las 9* te qonikʼen. Ax ikx 70 soldad kyjax kyibʼaj chej ex 200 soldad qʼiʼn lans kyuʼn.
24 Ex kybʼinchame kyten chej che ajbʼel tuʼn Pablo tuʼntzun tpon mintiʼ tpaltil twitz gobernador Félix».
25 Yajxitl, kubʼ ttzʼibʼin coronel jun carta in tqʼamaʼn jlu:
26 «Aqine Claudio Lisias. Ma txi ntzʼibʼine carta lu teya Félix, aya gobernador nimxix toklen: ¡Qʼolbʼebʼil!
27 Ma tzyet xjal lu kyuʼn judiy ex chʼixtoq tkubʼ kybʼyoʼn. Pero tej sok nbʼiʼne qa te Roma, in xiʼye klolte kyukʼil soldad ateʼ wukʼile.
28 Wajtoqe tuʼn tel nnikʼe tiʼj alkye til kywitz judiy, tuʼntzunju xi wiʼne toj Sanedrín.
29 Ex el nnikʼe tiʼj qa in kyqʼamaʼntoq qa otoq tzikʼ tibʼaj Kyley, pero mintiʼ kanet jun til wuʼne tuʼn tkyim moqa tuʼn tokx pres.
30 Ax ikx, ma tzaj qʼamaʼn weye qa kyajbʼil judiy tuʼn tkubʼ kybʼyoʼn. Tuʼntzunju, jurat xi nsamaʼne tukʼila ex ma txi nqʼamaʼne kye aj qʼoj tiʼj tuʼn kypon twitza qʼamalte alkye til».
31 Xitzun kybʼinchaʼn soldad lu aju xi qʼamaʼn kye ex xi kyiʼn Pablo te qonikʼen atz Antípatris.
32 Toj juntl qʼij, xi qʼiʼn Pablo kyuʼn soldad kyjax kyibʼaj chej, atzun kye txqantl e meltzʼaj toj cuartel kye soldad.
33 Tej kypon soldad kyjax kyibʼaj chej toj tnam Cesarea, xi kyqʼoʼn carta te gobernador ex xi kyiʼn Pablo twitz.
34 Jawtzun tleerin gobernador carta ex xi tqanin te Pablo jatumel ul itzʼj. Tej tok tbʼiʼn qa atz ul itzʼj toj tnam Cilicia,
35 xi tqʼamaʼn te: «Kʼokel nbʼiʼne tkyaqilju tzul tqʼamaʼna tzmaxi aj kyul aj qʼoj tiʼja». Yajxitl xi tqʼamaʼn tuʼn tok xqʼuqin Pablo toj palacio jatumel in nanqʼin Herodes.
