Hechos 25:1-27
25 Tej tikʼ oxe qʼij tponlen Festo toj tnam Judea tuʼn tok te gobernador, jax toj tnam Cesarea tuʼn tpon Jerusalén.
2 Atzun kye pal nim kyoklen ex qe judiy mas nim kyoklen e pon twitz Festo qʼamalte alkyeqe til Pablo. Ax ikx e ok ten kubʼsal twitz Festo,
3 ex xi kyqanin xtalbʼil te tuʼn t-xi tqʼamaʼn tuʼn tpon qʼiʼn Pablo toj Jerusalén. Porke otoq kubʼ kyximen tuʼn kyyon tiʼj Pablo toj bʼe tuʼntzun tkubʼ kybʼyoʼn.
4 Pero xi tqʼamaʼn Festo kye qa atztoq ktel Pablo pres toj Cesarea ex qa chʼinxtoq tmeltzʼaj te toj tnam.
5 Ax ikx xi tqʼamaʼn kye: «Alkyeqe at kyoklen kyxole, kytzaj wukʼile. Qa at jun til xjal lu, kyqʼamantze weye».
6 Tej tikʼ 8 moqa 10 qʼij tponlen Festo toj Jerusalén, meltzʼaj toj Cesarea. Toj juntl qʼij, kubʼ qeʼ toj tribunal ex xi tqʼamaʼn tuʼn ttzaj qʼiʼn Pablo twitz.
7 Tej tokx Pablo, ok kytxolin kyibʼ judiy e kuʼtz toj Jerusalén tiʼj. Xi kyqʼamaʼn qa otoq kubʼ tbʼinchaʼn nim nya bʼaʼn, pero mintiʼ bʼant tuʼn t-xi kyyekʼin.
8 Tuʼntzunju, tqʼama Pablo jlu tuʼn tklonte tibʼ: «Mintiʼ jun il ma nbʼinchaye tiʼj Kyley judiy, ni tiʼj templo nix tiʼj César».
9 Tuʼnju tajtoq Festo tuʼn tkyaj bʼaʼn kyukʼil judiy, xi tqʼamaʼn te Pablo: «¿Tajbʼila tuʼn t-xiʼya Jerusalén tuʼn tkubʼ juzgarina nwitze atz tiʼj tkyaqilju in kyqʼamaʼn tiʼja?».
10 Xi ttzaqʼweʼn Pablo te: «Waʼl qine twitz xjal in kawin te t-xel César ex atz tzalu tuʼn nkubʼ juzgarine. Porke ik tzeʼn ma tzʼel tnikʼa tiʼj, mintiʼ jun nya bʼaʼn ma tzʼok nbʼinchaʼne kyiʼj judiy.
11 Qa o kubʼ nbʼinchaʼne jun nya bʼaʼn moqa at jun wile tuʼn nkyime, mlay kubʼ nxkʼayin wibʼe tuʼn nkyime. Pero qa nya ax tok tkyaqilju in tzaj kyqʼamaʼn xinaq* lu wiʼje, mi al jun xjal at toklen tuʼn t-xi tqʼoʼn qine toj kyqʼabʼ. ¡Chin kyiʼnxe twitz César!».
12 Tej tbʼaj yolin Festo kyukʼil xjal qʼol tnabʼil, xi tqʼamaʼn te Pablo: «Ma tzaj tqanina tuʼn t-xiʼya twitz César, ex kxeʼla twitz César».
13 Tej tikʼ jteʼ qʼij, pon rey Agripa ex Berenice toj Cesarea qʼolbʼelte Festo.
14 Tuʼnju ax e kyaj ten junjun qʼij, xi tqʼamaʼn Festo te rey Agripa tiʼtoq in bʼaj tukʼil Pablo. Xi tqʼamaʼn te:
«At jun xinaq tzalu kyaj qʼoʼn pres tuʼn Félix.
15 Ex tej ntene Jerusalén, tzaj kyqʼamaʼn pal nim kyoklen weye ex qe ansyan nim kyoklen kyxol judiy qa attoq til ex qa iltoq tiʼj tuʼn tkubʼ tsentens.
16 Pero xi ntzaqʼweʼne kye qa mlay, porke ik tzeʼn in tzaj tqʼamaʼn ley te Roma, mlay bʼant tuʼn t-xi qʼet jun xjal toj kyqʼabʼ aj qʼoj tiʼj noq tuʼn kytzalaj qa naʼmxtoq t-xi qʼet ambʼil te tuʼn tklonte tibʼ kywitz.
17 Tuʼntzunju, tej kyul tzalu, jurat in kubʼ qeʼye toj juntl qʼij toj tribunal ex xi nqʼamaʼne tuʼn ttzaj qʼiʼn xinaq nwitze.
18 E jawtzun weʼ aj qʼoj tiʼj ex xi tzyet tuʼn kyyolin, pero mintiʼ kyqʼama qe til otoq kubʼ nximane tuʼn ttzaj kyqʼamaʼn.
19 Noq oʼkx in che qʼojintoq tukʼil tuʼn tpaj kyokslabʼil ex tuʼn tpaj jun xjal Jesús tbʼi, aju o kyim, pero in tqʼamaʼn Pablo qa itzʼ.
20 Mintiʼtoq ojtzqiʼn wuʼne tiʼ tuʼn t-xi nbʼinchaʼne kyukʼil. Tuʼntzunju, xi nqanine te Pablo qa tajbʼiltoq tuʼn t-xiʼ Jerusalén tuʼn tkubʼ juzgarin atz tiʼj tkyaqilju tzaj qʼamaʼn tiʼj.
21 Pero tzaj tqʼamaʼn weye qa tajbʼiltoq tuʼn t-xiʼ twitz Augusto* ex tuʼn kukx tten pres naʼmxtoq tok tbʼiʼn tiʼ t-xim. Tuʼntzunju, xi nqʼamaʼne tuʼn tok kwentin tzmaxi aj t-xi nsamaʼne twitz César».
22 Xitzun tqʼamaʼn Agripa te Festo: «Ax ikx weye wajbʼile tuʼn tok nbʼiʼne xinaq». Atzunte Festo xi ttzaqʼweʼn te: «Nchiʼj kʼokel tbʼiʼna».
23 Toj juntl qʼij, pon Agripa tukʼil Berenice tukʼil nim kyoklen. E okx toj sala de audiencia junx kyukʼil coronel ex qe xjal nim kyoklen toj tnam. Entonces xi tqʼamaʼn Festo tuʼn ttzaj qʼiʼn Pablo twitz.
24 Ex tqʼama Festo jlu: «Aya rey Agripa ex aqeye ateʼ tzalu qukʼile, kykeʼyinxe xinaq lu. Ma tzaj kyqanin kykyaqil judiy weye tukʼil tqʼajqʼajel kywiʼ, tanto toj Jerusalén ex tzalu, qa il tiʼj tuʼn tkyim.
25 Pero ma tzʼel nnikʼe tiʼj qa mintiʼ jun til xinaq lu tuʼn tkyim. Tuʼntzunju, tej saj tqanin weye tuʼn t-xiʼ twitz Augusto, ma kubʼ nximane tuʼn t-xi nsamaʼne tukʼil.
26 Pero mintiʼ ojtzqiʼn wuʼne tiʼ kxel ntzʼibʼine te Wajawe.* Tuʼntzunju, ma tzaj wiʼne kywitze tuʼn tok toj xjel ex tnejelxix twitza, aya rey Agripa, tuʼntzun tel nnikʼe tiʼj tiʼ tuʼn tkubʼ ntzʼibʼine.
27 Porke in kubʼ nximane qa nya toj tumel tuʼn t-xi nsamaʼne jun pres qa mintiʼ ma txi nqʼamaʼne alkyeqe til».
