Hechos 5:1-42
5 Ex xi tkʼayin jun xinaq* Ananías tbʼi jun piẍ ttxʼotxʼ junx tukʼil Safira aju t-xuʼjil.
2 Pero kubʼ t-ximen tuʼn miʼn t-xi tqʼoʼn tkyaqil pwaq ex mintiʼ xi tqʼamaʼn te nijun, oʼkx te t-xuʼjil. Ex aju pwaq mintiʼ kyaj ttzyuʼn, xi tiʼn ex xi tqʼoʼn kye apóstol.
3 Pero xi tqʼamaʼn Pedro te: «Ananías, ¿tiquʼn ma txi tqʼoʼna ambʼil te Satanás tuʼn tyolina tiʼj nya ax tok yol twitz espíritu santo ex tuʼn tkyaj ttzyuʼna jniʼ pwaq twi txʼotxʼ?
4 ¿Nyapetzun teya txʼotxʼ tej naʼmxtoq t-xi tkʼayina? Ex tej t-xi tkʼayina, ¿nyapetzun teya twi? ¿Tiquʼn ma kubʼ t-ximana jlu toj tanmiya? Nya kywitz xjal ma txi tqʼamaʼna nya ax tok yol, sino twitz Dios».
5 Tej tok tbʼiʼn Ananías jlu, kubʼ tzʼaq twitz txʼotxʼ ex kyim. Ex tzaj nim kyxobʼil kykyaqil qeju ok kybʼiʼn jlu.
6 Entonces e pon junjun kuʼxun, ok kybʼalqʼiʼn tela tiʼj t-xmilal Ananías, etz kyiʼn ex kux kymaquʼn.
7 Tej otoq tzikʼ oxe or tbʼajlen jlu, okx t-xuʼjil Ananías. Pero nyatoq ojtzqiʼn tuʼn tiʼ otoq bʼaj.
8 Xi tqanin Pedro te: «Qʼamantza weye, ¿tkyaqilpe twi txʼotxʼ lu ma tzaj qʼoʼn kyeye?». Xi ttzaqʼweʼn Safira te: «Ikju, tkyaqil».
9 Entonces xi tqʼamaʼn Pedro te: «¿Tiquʼn ma kubʼ kyximane tuʼn tok kyqʼoʼne t-espíritu Jehová* toj prueba? Bʼinxa, lu qe kuʼxun ma che ul ttzi pwert, ma che meltzʼaj maqulte tchmila ex ax ikx teya kʼelex qʼiʼna kyuʼn».
10 Tej tbʼaj yolin Pedro, kubʼ tzʼaq Safira t-xe tqan ex kyim. Ex tej kyokx kuʼxun toj ja, kyil qa otoq kyim. Tuʼntzunju etz kyiʼn ex kux kymaquʼn ttxlaj tchmil.
11 Ex tzaj xobʼil tiʼj tkyaqil congregación ex kyiʼj kykyaqil qeju ok kybʼiʼn jlu.
12 Ex e bʼant nim milagro* ex tbʼanel bʼinchbʼen kyuʼn apóstol kyxol xjal, ex atztoq in nok kybʼuyin kyibʼ twitz Corredor Salomón tbʼi.
13 Mintiʼ kynimarin kyibʼ junjun tuʼn tok kymojbʼan kyibʼ kyukʼil, pero e yolin xjal bʼaʼn kyiʼj.
14 Ex chmet kybʼaj okslal tiʼj Qajaw, e okslan nim xinaq ex xuʼj.*
15 Ax ikx e jeʼtz kyiʼn xjal qe yabʼ kyoj kay principal ex e kubʼ kyqʼoʼn kywitz watbʼil ex kywitz camilla. Kubʼ kyximen qa jakutoq che bʼant aj tikʼ t-xlekumal Pedro kyibʼaj.
16 Ex nim qe xjal in che anqʼin kyoj lugar nqayin tiʼj Jerusalén, e pon kyukʼil yabʼ ex qeju in che sufririn kyuʼn demonio, ex e kubʼ kyqʼanin kykyaqil.
17 Jawtzun weʼ nejenel kye pal junx kyukʼil qeju ateʼ tukʼil, aqeju e ok lepeʼ tiʼj kyxnaqʼtzbʼil saduceo, ex tzaj nim kyqʼoj kyiʼj apóstol.
18 Tuʼntzunju, e tzaj kytzyuʼn ex e okx kyqʼoʼn pres toj tnam.
19 Pero toj qonikʼen, ul t-anjel Jehová* ex okx tjaqoʼn tpwertil cárcel, e jeʼtz tiʼn ex xi tqʼamaʼn kye:
20 «Kyxiʼye toj templo ex kukx kymanxe kye xjal tkyaqil tqanil tiʼj chwinqlal».
21 Tej tok kybʼiʼn apóstol jlu, e xiʼ toj templo te prim ex xi kyqʼoʼn xnaqʼtzbʼil kye xjal.
Atzunte nejenel kye pal ex qeju ateʼ tukʼil, e pon ex ok kychmoʼn Sanedrín ex kykyaqil ansyan kyxol xjal te Israel. Ex xi kyqʼamaʼn kye guardia tuʼn tetz kyiʼn apóstol toj cárcel ex tuʼn kyxi kyiʼn kywitz.
22 Pero tej kypon guardia toj cárcel, mintiʼ e kanet kyuʼn. Tuʼntzunju e meltzʼaj kyukʼil ex xi kyqʼamaʼn jlu kye:
23 «Jupuʼntoq cárcel tej xqo pone ex waʼl qetoq guardia ttzi pwert, pero nijun xjal ma kanet quʼne tej sokx qjqoʼne».
24 Tej tok tbʼiʼn nejenel kye guardia toj templo ex qe pal nim kyoklen qe yol lu, tzaj kyxim porke mintiʼ el kynikʼ tiʼj tzeʼn kpol bʼaj tkyaqil jlu.
25 Pero ul jun xjal kyukʼil ex xi tqʼamaʼn kye: «¡Kybʼintze! Aqeju xinaq ma che okx kyqʼoʼne pres, in xi kyqʼoʼn xnaqʼtzbʼil kye xjal toj templo».
26 Tuʼntzunju, xiʼ nejenel kye guardia junx kyukʼil guardia qʼil kye apóstol, pero mintiʼ e ok tzaqpaj kyiʼj porke tzaj kyxobʼil tuʼn tok xoʼn abʼj kyiʼj kyuʼn xjal.
27 E xitzun qʼiʼn apóstol twitz Sanedrín ex e ok toj xjel tuʼn nejenel kye pal.
28 Xi tqʼamaʼn kye: «¿Mintiʼpe ma txi qqʼamaʼne kyeye tuʼn miʼn txi kyqʼoʼne xnaqʼtzbʼil tiʼj tbʼi xinaq lu? Pero jaʼlo ma tzʼok kybʼiʼn kykyaqil xjal toj Jerusalén aju kyxnaqʼtzbʼile. ¿Tiquʼn in xi kyqʼamaʼne qa tuʼn qpaje ma kyim xinaq lu?».*
29 Xi ttzaqʼweʼn Pedro ex qe txqantl apóstol jlu: «Tnejel ilxix tiʼj tuʼn qnimane* te Dios ex nya kye xjal.
30 Jaw anqʼin Jesús, aju kubʼ kybʼyoʼne twitz jun tzeʼ, tuʼn Kydios qtzan qchmane.
31 Xi tqʼoʼn Dios toklen ttxlaj toj derecha ex jaw tskʼoʼn te Nejenel ex Kolol tuʼntzun tajtz tiʼj kyanmi xjal te Israel ex tuʼn tkubʼ najsaʼn kyil.
32 Testiw qoʼye tiʼj tkyaqil jlu ex testiw espíritu santo, aju in tzaj tqʼoʼn Dios kye qeju in che nimen te».*
33 Tej tok kybʼiʼn jlu, tzaj nim kyqʼoj ex kyajbʼiltoq tuʼn kykubʼ kybʼyoʼn.
34 Pero jaw weʼ jun fariseo Gamaliel tbʼi kyxol xjal toj Sanedrín ex xi tqʼamaʼn tuʼn kyex qʼiʼn apóstol jun rat. Jun xnaqʼtzaltoq Gamaliel tiʼj Ley ex ok qʼoʼn toklen kyuʼn kykyaqil xjal.
35 Yajxitl xi tqʼamaʼn kye txqantl: «Aqeye xjal te Israel, kyximankuye bʼaʼnxix tiʼ kyajbʼile tuʼn tok kybʼinchaʼne kyiʼj xinaq lu.
36 Porke ma tzikʼ qʼij, ten jun xinaq Teudas tbʼi ex tzaj tman qa nimtoq toklen, ex e ok lepeʼ junlo kyaje syent xjal tiʼj. Pero tej tkubʼ bʼyoʼn, e jel oq kykyaqil xjal e ok lepeʼ tiʼj ex mintiʼ juntl tiʼ bʼaj.
37 Yajxitl, anqʼin Judas te Galilea kyoj qʼij tej tjaw qʼiʼn censo, ex e ok lepeʼ nim xjal tiʼj. Pero ax ikx kubʼ bʼyoʼn, ex e jel oq kykyaqil qeju e ok lepeʼ tiʼj.
38 Tuʼntzunju, a weye nxim jlu tiʼjju in bʼaj: miʼn tzʼokx kyqʼon kyibʼe kyukʼil xjal lu ex che kytzaqpiʼnxe. Porke qa kyximbʼetz xjal lu moqa kyaqʼun, mlay tzʼel bʼaʼn.
39 Pero qa atz in tzaj tukʼil Dios, mlay bʼant jun tiʼ kyuʼne tuʼn tweʼ. Kykeʼyinxe, porke si no ax ikx jaku che qʼojine tukʼil Dios».
40 Xitzun kynimen tyol Gamaliel. E tzaj kytxkoʼn apóstol, e bʼaj kygolpearin ex xi kyqʼamaʼn kye tuʼn miʼn kyyolin tiʼj tbʼi Jesús ex e jeʼtz kytzaqpiʼn.
41 Tuʼntzunju, e jeʼtz kywitz qeju ateʼ toj Sanedrín, in che tzalaj porke bʼaʼn ela toj twitz Dios tuʼn tkubʼ kychʼixwi kywitz xjal noq tuʼn tbʼi Jesús.
42 Ex tkyaqil qʼij, toj templo ex ttziyele kyja xjal, mintiʼ kyaj kytzaqpiʼn tuʼn t-xi kyqʼoʼn xnaqʼtzbʼil ex tuʼn kyyolin tiʼj tbʼanel noticia* tiʼj Jesús aju Cristo.
Tqanil
^ Toj junjuntl lugar «ichan».
^ Qʼonka twitza tiʼj xnaqʼtzbʼil A5.
^ Toj griego «señal».
^ Toj junjuntl lugar «qya».
^ Qʼonka twitza tiʼj xnaqʼtzbʼil A5.
^ Toj griego «in tzaj kyiʼne tchkʼel xinaq lu qibʼaje».
^ Aju yol nimen toj griego, ax ikx a tzʼelpuna tuʼn kynimen te Dios ik tzeʼn jun gobernador.
^ Toj juntl yol, kye qeju in che nimen te ik tzeʼn jun gobernador.
^ Moqa «tbʼanel tqanil».
