Hechos 12:1-25
12 Toj tqʼijlalil lu, xi tzyet tuʼn tok tbʼinchaʼn rey Herodes nya bʼaʼn kyiʼj junjun erman toj congregación.
2 Kubʼ tbʼyoʼn Santiago, aju terman Juan, tukʼil espada.
3 Ex tej tok tkeʼyin qa bʼaʼn ela jlu toj kywitz judiy, ax ikx kubʼ t-ximen tuʼn tokx tqʼoʼn Pedro pres. Bʼaj tkyaqil jlu tej tok Fiesta tiʼj Pan Mintiʼ Levadura toj.
4 Tuʼntzunju, tzaj ttzyuʼn Pedro ex okx tqʼoʼn pres. Ex xi tqʼoʼn toj kykwent kyaje grupo soldad tuʼn tok kyxqʼuqin por turno, kyaje kybʼet soldad toj junjun grupo. Porke kubʼ t-ximen tuʼn t-xi tyekʼin kye xjal* tikʼlenxi Pascua.
5 Tej tokx qʼoʼn Pedro pres, mintiʼ kyaj kytzaqpin erman toj congregación tuʼn kynaʼn Dios tiʼj.
6 Nchiʼjtoq tuʼn tetz yekʼin Pedro tuʼn Herodes kywitz xjal, in jtantoq Pedro kyxol kabʼe soldad te qonikʼen, kʼaloʼn qe tqʼabʼ kyuʼn kabʼe kaden ex waʼl qetoq guardia in che xqʼuqin ttzi cárcel.
7 Pero de repente kubʼ tyekʼin tibʼ t-anjel Jehová* twitz ex qoptzʼaj jun spikʼun toj cárcel. Ok tmakoʼn anjel ttxlaj t-xuʼk Pedro, okx tkʼasun ex xi tqʼamaʼn te: «¡Juratxa, weʼktza!». Ex e jeʼl tzʼaq kaden tiʼj tqʼabʼ Pedro.
8 Xi tqʼamaʼntl anjel te: «Qʼonka t-xbʼaluna* ex t-xjabʼa». Ex xi tbʼinchaʼn Pedro ikju. De último xi tqʼamaʼn anjel te: «Qʼonka tmanta ex lepeʼtza wiʼje».
9 Etztzun lepeʼ Pedro tiʼj, pero mintiʼ el tnikʼ tiʼj qa axix tok aju kubʼ tbʼinchaʼn anjel moqa nya. Toj tnabʼl, noq ok tkeʼyin jun witzikʼ.
10 Tej kyetz twitz tnejel grupo guardia ex yajxitl twitz tkabʼin, e pon ttzi jun pwert te kʼuxbʼil jatumel in che ex xjal tuʼn kyxiʼ toj tnam ex jaqet tjunalx. E jetz bʼet toj bʼe ex noq minabʼen el tpan tibʼ anjel tiʼj.
11 Tej tok tkeʼyin Pedro jlu, el tnikʼ tiʼjju otoq bʼaj ex tqʼama: «Ma tzʼel nnikʼe tiʼj jaʼlo qa ma tzaj tsamaʼn Jehová* t-anjel klol weye toj tqʼabʼ Herodes ex tiʼj tkyaqilju kyajbʼiltoq judiy tuʼn tbʼaj wiʼje».
12 Tej tel tnikʼ tiʼjju otoq bʼaj, xiʼ tja María aju ttxuʼ Juan, aju ok ojtzqiʼn ik tzeʼn Marcos, jatumel otoq tzʼok kychmon kyibʼ nim discípulo tuʼn kynaʼn Dios.
13 Tej tokx ttokarin pwert attoq ttzi bʼe, etz jun txin majen Rode tbʼi keʼyilte alkyetoq.
14 Tej tel tnikʼ tiʼj tqʼajqʼajel twiʼ Pedro, nimxix jaw tzalaj, pero mintiʼ okx tjaqoʼn pwert twitz tuʼn tzalajbʼil. Noq oʼkx xi ojqelan tojxi tuʼn t-xi tqʼamaʼn kye txqantl qa attoq Pedro ttzi pwert.
15 Atzun kye xi kyqʼamaʼn te: «Ma tzʼel loca». Pero tuʼnju kukx xi tqʼamaʼn txin kye qa ax tok, kyqʼama: «Noq oʼkx aju t-anjel».
16 Atzunte Pedro kukxtoq in tokarin tiʼj pwert. Tej toktz kyjaqoʼn pwert twitz, e jaw labʼin tej tok kykeʼyin.
17 Pero xi tyekʼin Pedro tukʼil tqʼabʼ kye tuʼn miʼn kyjaw yolin ex xi tqʼamaʼn kye tzeʼn otoq tzʼetz qʼiʼn tuʼn Jehová* toj cárcel. Yajxitl xi tqʼamaʼn kye: «Kyqʼamanxe jlu te Santiago ex kye erman». Tej tbʼaj tqʼamaʼn jlu, etz ex xiʼ toj juntl lugar.
18 Tej qsqix, e jaw sekʼpaj soldad porke mintiʼtoq ojtzqiʼn kyuʼn tiʼ otoq bʼaj tukʼil Pedro.
19 Tuʼntzunju, ok ten Herodes jyolte Pedro toj tkyaqil plaj. Pero tuʼnju mintiʼ kanet tuʼn, xi tqanin xjel kye guardia ex yajxitl xi tqʼamaʼn tuʼn tkubʼ qʼoʼn kykastiw. Después etz toj tnam Judea tuʼn tkuʼtz toj Cesarea ex atz kyaj ten junjun qʼij.
20 Tzajtzun tqʼoj rey Herodes* kyiʼj xjal te Tiro ex Sidón. Tuʼntzunju, ok kychmon kyibʼ xjal ex kubʼ kyximen tuʼn kyxiʼ yolil tukʼil, porke atztoq in tzaj kylaqʼoʼn kywa toj txʼotxʼ jatumel in kawin. E kubʼsan twitz Blasto, aju encargado tiʼj tja rey,* tuʼn tonin kyiʼj ex yajxitl xi kyqanin te Herodes tuʼn tten mujbʼabʼil kyxol.
21 Tej tpon qʼij tuʼn tok kychmon kyibʼ, ok tqʼoʼn Herodes t-xbʼalun tbʼanelxix, kubʼ qeʼ toj tribunal ex xi tzyet tuʼn tyolin kyukʼil xjal.
22 Atzun kye xjal in che bʼintoq tiʼj, e jaw schʼin ex kyqʼama: «¡Nya jun xjal in yolin, sino jun dios!».
23 Tej tbʼaj jlu, tzaj yabʼil tiʼj Herodes tuʼn t-anjel Jehová* porke mintiʼ jaw tnimsaʼn Dios. Ex bʼaj waʼn kyuʼn ẍchuqʼ ex kyim.
24 Pero mas nim qe xjal ok kybʼiʼn tyol Jehová* ex e okslan.
25 Atzunte Bernabé ex Saulo, tej otoq t-xi kyqʼoʼn onbʼil kye erman te Jerusalén, e meltzʼaj toj tnam Antioquía ex xi kyiʼn Juan kyukʼil, aju ax ikx ok qʼoʼn tbʼi te Marcos.
Tqanil
^ Moqa «tuʼn tkubʼ tjuzgarin kywitz xjal».
^ Qʼonka twitza tiʼj xnaqʼtzbʼil A5.
^ Moqa «Kʼalonk tkʼuʼja».
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Moqa «Tajtoq tuʼn tqʼojin».
^ Toj griego «aju encargado tiʼj tkwart rey».
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
