Hechos 22:1-30
22 «Aqeye erman ex aqeye tatbʼaj, kybʼintze aju kxel nqʼamaʼne kyeye jaʼlo».
2 Tej tok kybʼiʼn xjal qa in yolin Pablo toj yol hebreo, mas ok kybʼiʼn ex mintiʼ e yolin. Entonces xi tqʼamaʼntl Pablo kye:
3 «Ax ikx weye judiy qine. Atz in nul itzʼje toj tnam Tarso te Cilicia, pero tzaj qʼoʼn xnaqʼtzbʼil weye tzalu toj Jerusalén tuʼn Gamaliel. Tzaj qʼoʼn xnaqʼtzbʼil weye tuʼn t-xi nnimane tkyaqilju in tzaj tqʼamaʼn Kyley ojtxe qyajil ex o chin ajbʼene te Dios tuʼn tkyaqil wanmiye ik tzeʼn kyeye jaʼlo.
4 Ojtxe, ok nbʼinchaʼne nya bʼaʼn kyiʼj xinaq* ex xuʼj* e ok lepeʼ tiʼj tbʼe Qajaw, e bʼaj nkʼaloʼne, e okx nqʼoʼne pres ex e kubʼ nbʼyoʼne.
5 Ex testiw nejenel kye pal tiʼj jlu kyukʼil kykyaqil ansyan. Porke ax ikx tzaj kyqʼoʼn junjun carta weye tuʼn t-xi wiʼne kye qxjalil toj Damasco, jatumel in xiʼye tuʼn kytzaj ntzyuʼne kykyaqil qeju in che ok lepeʼ tiʼj tbʼe Qajaw ex tuʼn kyxi wiʼne toj Jerusalén tuʼn tkubʼ kykastiw.
6 Pero tej tzmatoq in chin bʼete tuʼn npone Damasco ex tej chʼinxtoq npone, como a las 12 del mediodía, noq minabʼen qoptzʼaj jun spikʼun wibʼaje tzajni toj kyaʼj.
7 Entonces in kubʼ tzʼaqe twitz txʼotxʼ ex ok nbʼiʼne qe yol lu: ‹Saulo, Saulo, ¿tiquʼn in nok tbʼinchaʼna nya bʼaʼn wiʼje?›.
8 Atzun weye xi nqanine te: ‹¿Alkyetzuna Tat?›. Tzaj ttzaqʼweʼn weye: ‹Aqine Jesús te Nazaret, aju in nok tbʼinchaʼna nya bʼaʼn tiʼj›.
9 Atzun kye xinaq in che bʼettoq wukʼile, oʼkx kyil spikʼun, pero mintiʼ ok kybʼiʼn alkye tzaj yolin weye.
10 Entonces xi nqanine te: ‹Tat, ¿tiʼ il tiʼj tuʼn tbʼant wuʼne?›. Atzunte Qajaw tzaj tqʼamaʼn weye: ‹Weʼktza, txiʼya toj tnam Damasco, jatumel ktzajel qʼamaʼn teya tkyaqilju il tiʼj tuʼn tbʼant tuʼna›.
11 Tuʼnju in kyaje moẍ tuʼn tqoptzʼajil spikʼun, noq in xi qʼiʼne tukʼil nqʼabʼe kyuʼn wukʼile ex iktzun tten in pone toj tnam Damasco.
12 Tej qpone Damasco, attoq jun xinaq Ananías tbʼi. Jun xinaq in xobʼtoq twitz Dios ex xi tbʼinchaʼn aju tzaj tqʼamaʼn Ley. Ax ikx e yolin kykyaqil judiy te Damasco bʼaʼn tiʼj.
13 Pon Ananías keʼyil weye, kubʼ weʼ ntxlaje ex tqʼama: ‹¡Saulo, werman, keʼyina juntl maj!›. Ex tojx rat aju, bʼant nkeʼyine juntl maj ex wile Ananías.
14 Ex tzaj tqʼamaʼn jlu weye: ‹Ma jaw skʼoʼna tuʼn Kydios ojtxe qyajil tuʼn tel tnikʼa tiʼjju tajbʼil, ex tuʼn tok tkeʼyina xjal tzʼaqlixix ex tuʼn tok tbʼiʼna tyol.
15 Porke kʼokela testiw tiʼj kywitz kykyaqil xjal, ex ok kyolila tiʼjju ma tzʼok tkeʼyina ex ma tzʼok tbʼiʼna.
16 Tuʼntzunju, ¿tiʼ in nayona tiʼj? Weʼktza ex bautisarina. Tuʼn tkubʼ najsaʼn tila tuʼn Dios, il tiʼj tuʼn tok qeʼ tkʼuʼja tiʼj tbʼi Jesús›.
17 Tej in meltzʼaje Jerusalén, in xiʼye naʼl Dios toj templo ex ok nkeʼyine jun witzikʼ.
18 Wile Qajaw in tqʼamaʼn weye: ‹Juratxa, kutexa toj Jerusalén, porke mlay tzʼok kybʼiʼn xjal aju kxel tqʼamaʼna kye wiʼje›.
19 Atzun weye xi ntzaqʼweʼne te: ‹Tat, bʼiʼn kyuʼn xjal qa in xiʼye kyojele ja te kʼulbʼil,* ex qa e xi wiʼne okslal tiʼja pres ex qa e bʼaj ngolpearine.
20 Ex tej tkubʼ bʼyoʼn Esteban aju testiw tiʼja, ax ikx bʼaʼn ela toj nwitze ex ok nxqʼuqine kymanta qeju e kubʼ bʼyonte›.
21 Maske ikju, tzaj tqʼamaʼn weye: ‹Txiʼya, porke kxel nsamaʼna kyoj tnam najchaq ateʼ›».
22 Tnejel kubʼ kybʼiʼn xjal tkyaqilju otoq tqʼama Pablo, pero yajxitl e jaw schʼin ex kyqʼama: «¡Nya bʼaʼn tuʼn kukx tanqʼin xjal lu! ¡Il tiʼj tuʼn tkyim!».
23 Tuʼnju kukx in che schʼintoq xjal, otoq tzʼel kyiʼn kymanta ex jaw kychitun quq twitz kyaʼj,
24 xi tqʼamaʼn coronel tuʼn tokx qʼiʼn Pablo toj cuartel kye soldad. Ax ikx xi tqʼoʼn orden tuʼn tbʼaj asyalin Pablo tzmaxi aj tjatz tqʼamaʼn aju otoq bʼant tuʼn, porke tajbʼiltoq tuʼn tel tnikʼ tiʼj tiquʼn in che schʼin xjal tiʼj.
25 Tej otoq bʼaj kʼaloʼn Pablo tuʼn tbʼaj asyalin, xi tqʼamaʼn jlu te capitán te soldad waʼltoq ttxlaj: «¿In tzajpe tqʼoʼn ley ambʼil kyeye tuʼn tbʼaj ky-asyaline jun xjal te Roma naʼmxtoq tkubʼ tsentens?».
26 Tej tok tbʼiʼn capitán jlu, xiʼ yolil tukʼil coronel ex xi tqʼamaʼn te: «¿Tiʼ kbʼantel tuʼna? Porke ate xinaq lu te Roma».
27 Tuʼntzunju, xiʼ coronel yolil tukʼil Pablo ex xi tqanin te: «Qʼamantza weye, ¿axpe tok qa te Roma teya?». Xi ttzaqʼweʼn Pablo te: «Ikju».
28 Xi tqʼamaʼntl coronel te: «Nim pwaq xi nchjoʼne tuʼn ttzaj qʼoʼn woklene ik tzeʼn kye xjal te Roma». Atzunte Pablo xi ttzaqʼweʼn te: «Atzun weye witzʼjlenxe».
29 Tuʼntzunju, jurat e jel laqʼeʼ soldad tiʼj aqeju xi qʼoʼn orden kye tuʼn tok toj xjel kyuʼn ex tuʼn tbʼaj ky-asyalin. Atzunte coronel, tzaj xobʼ tej tok tbʼiʼn qa te Roma Pablo porke otoq tzʼok tkʼaloʼn tukʼil cadena.
30 Toj juntl qʼij, xi tqʼamaʼn coronel tuʼn tel tzaqpiʼn Pablo ex tuʼn tok kychmon kyibʼ pal nim kyoklen ex tkyaqil Sanedrín, porke tajbʼiltoq tuʼn tel tnikʼ tiʼj tiquʼn in che qʼojin judiy tiʼj. Yajxitl xi tqʼamaʼn tuʼn tkuʼtz Pablo ex xi tiʼn kywitz.
