Hechos 13:1-52
13 Ax ikx e ten profeta ex xnaqʼtzal toj congregación te Antioquía. Kyxol jlu ten Bernabé, ten Symeón, aju ok qʼoʼn tbʼi te Niger, ten Lucio te Cirene, ten Manaén, aju xnaqʼtzan junx tukʼil rey Herodes, ex ten Saulo.
2 Tej tzmatoq in che kʼulin twitz Jehová* ex tej in che ayunarin, tzaj tqʼamaʼn espíritu santo jlu: «Kypaʼmile Bernabé ex Saulo weye, porke ma che jaw nskʼoʼne tuʼn t-xi kybʼinchaʼn jun aqʼuntl».
3 Entonces kubʼ kyqʼoʼn kyqʼabʼ kyibʼaj tej kybʼaj ayunarin ex tej kybʼaj naʼn Dios, ex bʼaj kydespedirin kyibʼ.
4 Tuʼntzunju, ajbʼen espíritu santo tuʼn Dios tuʼn kyxi tsamaʼn. E xiʼ toj tnam Seleucia ex e jax toj jun bark tuʼn kypon Chipre.
5 Tej kypon Salamina, e ok ten yolil tiʼj tyol Dios kyoj ja te kʼulbʼil* kye xjal judiy. Ex xiʼ Juan kyukʼil te onil kye.
6 Tej tbʼaj kybʼetin tkyaqil isla te Chipre, e pon Pafos. Toj tnam lu, kanet jun judiy kyuʼn aju Bar-Jesús tbʼi, jun chman ex jun falso profeta.
7 Ex atztoq taʼ tukʼil jun gobernador Sergio Paulo tbʼi, jun xinaq* list. Tzaj ttxkoʼn Sergio Paulo Bernabé ex Saulo porke tajbʼiltoq tuʼn tok tbʼiʼn tyol Dios.
8 Pero atzunte Elimas,* aju a tzʼelpuna tbʼi chman, ok ten qʼojil tukʼil Bernabé ex Saulo porke nyatoq taj tuʼn tokslaʼn gobernador.
9 Entonces noj toj tanmi Saulo, aju ax ikx ok qʼoʼn tbʼi te Pablo, tuʼn espíritu santo, xi tkeʼyin Elimas
10 ex xi tqʼamaʼn te: «Aya jun sbʼul ex nojni toj tanmiya tuʼn nya bʼaʼn. Jun tkʼwal Tajaw il ex jun aj qʼoj tiʼj tkyaqilju bʼaʼn. ¿Tiquʼn in bʼaj ttxalpuna tbʼe Jehová* recto tiʼj?
11 Jaʼlo, kbʼel qʼoʼn tkastiwa tuʼn Jehová* ex kjela moẍ, ex mlay tzʼok tkeʼyina tqan qʼij toj jun ambʼil». Tej tbʼaj yolin Pablo, ok muj tiʼj twitz Elimas ex ya mintiʼ bʼant tkeʼyin. Tuʼntzunju, ok ten jyol tqʼabʼ jun xjal tuʼn t-xi qʼiʼn.
12 Tej tok tkeʼyin gobernador aju otoq bʼaj, okslan porke jaw labʼin tiʼjju el tnikʼ tiʼj Jehová.*
13 Etztzun Pablo kyukʼil qeju ateʼ tukʼil toj tnam Pafos, e jax toj jun bark tuʼn kyxiʼ toj Perga, jun tnam toj Panfilia. Pero e kyaj qʼoʼn tuʼn Juan porke meltzʼaj toj Jerusalén.
14 Atzun kye e ikʼ bʼet toj tnam Perga tuʼn kypon toj tnam Antioquía te Pisidia. Yajxitl e okx toj ja te kʼulbʼil toj qʼij sábado ex e kubʼ qeʼ.
15 Tej tbʼaj leerin Ley kywitz xjal ex aju kubʼ kytzʼibʼin Profeta, xi kysamaʼn nejenel toj ja te kʼulbʼil jun xjal qʼamalte kye: «Aqeye erman, qa at jun kyyole tuʼn t-xi kyqʼuqbʼaʼne kykʼuʼj xjal, kyqʼamanxe kye».
16 Jawtzun weʼ Pablo, xi tyekʼin tukʼil tqʼabʼ kye tuʼn miʼn kyyolin ex xi tqʼamaʼn kye:
«Aqeye xjal te Israel ex aqeye in che xobʼ twitz Dios, kybʼintze nyole.
17 Jaw tskʼoʼn Kydios xjal te Israel qeju ojtxe qyajil. Tej kyten toj Egipto ik tzeʼn stranjer xjal, e ok te jun tnam nim toklen tuʼn ex e jeʼtz tiʼn tukʼil tipumal.
18 Ex como 40 años, kubʼ tyekʼin Dios tpasens kyiʼj toj desierto.
19 Yajxitl xi tqʼoʼn te ky-erencia aju kytxʼotxʼ siete tnam e kubʼ t-xiten toj Canaán.
20 Bʼaj tkyaqil jlu toj junlo 450 años.
Ex xi tqʼoʼn Dios kyoklen jwes kyibʼaj tzmaxi toj tqʼijlalil profeta Samuel.
21 Pero toj tqʼijlalil Samuel, xi kyqanin xjal jun kyrey, ex tzaj tqʼoʼn Dios jun kyrey aju Saúl tbʼi, tkʼwal Quis ex tzajni tiʼj tribu te Benjamín, aju kawin kyibʼaj toj 40 años.
22 Tej tel tiʼn Dios toklen Saúl te rey, xi tqʼoʼn te David aju tqʼama jlu tiʼj: ‹Ma tzʼok David, aju tkʼwal Jesé te jun xinaq in tzalaj wanmiye tiʼj. Ex kxel tbʼinchaʼn tkyaqilju wajbʼile›.
23 Ex jaw tskʼoʼn Dios, ik tzeʼn otoq kyaj tqʼamaʼn, jun xjal kyxol tyajil David tuʼn tklet Israel tuʼn ex a Jesús.
24 Tej naʼmxtoq tul Jesús, xi tqʼamaʼn Juan kye kykyaqil xjal te Israel tuʼn kybautisarin tuʼntzun tkubʼ kyyekʼin qa otoq tzʼajtz tiʼj kyanmi.
25 Pero tej chʼixtoq tkubʼaj taqʼun, tqʼama jlu: ‹¿Alkye qine toj kywitze? Porke nya aqine xjal in che ayone tiʼj. Pero tzʼelx kynikʼe tiʼj qa aju xjal lepchitz wiʼje, mintiʼ woklene tuʼn tel npjuʼne taq’al t-xjabʼ›.
26 Aqeye erman, aqeye tyajil Abrahán ex aqeye in che xobʼ twitz Dios, qe ma tzaj qʼoʼn yol tuʼn qklet.
27 Porke mintiʼ el kynikʼ xjal te Jerusalén ex qe gobernador kyxol tiʼj klol kye. Pero tej tkubʼ kyqʼoʼn tsentens, japun kyuʼn tkyaqilju tzaj kyqʼamaʼn Profeta, aju in jaw schʼin tkyaqil sábado.
28 Maske mintiʼ kanet jun til kyuʼn tuʼn tkyim, xi kyqanin te Pilato tuʼn tkubʼ bʼyoʼn.
29 Ex tej tjapun kyuʼn tkyaqilju otoq kyaj tzʼibʼin tiʼj, kutz kyiʼn twitz tzeʼ ex okx kyqʼoʼn toj jun panteón.
30 Maske ikju, jaw anqʼin tuʼn Dios kyxol kyimni.
31 Ex kubʼ tyekʼin tibʼ nimku qʼij kywitz tdiscípulo e jax junx tukʼil toj Galilea tuʼn kypon toj Jerusalén. Atzun qe jlu ma che ok testiw tiʼj jaʼlo kywitz xjal.
32 Tuʼntzunju, in qo yoline kyukʼile kyiʼj tbʼanel noticia tzaj tprometerin Dios kye ojtxe qyajil.
33 Ex ma japun twi tkyaqil tuʼn Dios te qe, aqoʼ kykʼwal, tej tjaw anqʼin Jesús tuʼn. Atzun jlu in tzaj tqʼamaʼn salmo dos: ‹Aya nkʼwale, atzun weye ma chin oke te tmana jaʼlo›.
34 Tzaj tqʼamaʼn Dios qa kjawiltoq anqʼin Jesús tuʼn kyxol kyimni ex qa mlaytoq ten juntl maj t-xmilal jaku naj, porke tqʼama jlu: ‹Kbʼel nyekʼine nkʼujlabʼile axix tok kyiʼje, aju xi nqʼamaʼne te David, ex jaku tzʼok qeʼ kykʼuʼje tiʼj›.
35 Tuʼntzunju, in tzaj tqʼamaʼn juntl salmo jlu: ‹Mlay txi tqʼoʼna ambʼil tuʼn tkubʼ qʼay t-xmilal tmajena kukx in najbʼen teya›.
36 Ajbʼen David te Dios* tej tanqʼin, ikʼ jtan toj kamik, kux maquʼn junx kyukʼil ojtxe tyajil ex kubʼ qʼay t-xmilal.
37 Pero aju jaw anqʼin tuʼn Dios mintiʼ kubʼ qʼay t-xmilal.
38 Aqeye erman, tzʼelx kynikʼe tiʼj jlu, oʼkx jaku kubʼ najsaʼn kyile noq tuʼn Jesús, ex atzun jlu in xi qqʼamaʼne kyeye jaʼlo.
39 Mlaytoq bʼant tuʼn tkubʼ najsaʼn kyile tuʼn Tley Moisés. Pero jaʼlo noq tuʼn Jesús, kykyaqil qeju ma che okslan, jaku tzaj tqʼamaʼn Dios qa mintiʼ kyil.
40 Tuʼntzunju, kyxqʼuqink kyibʼe tuʼn miʼn tbʼaj kyiʼje aju kubʼ kytzʼibʼin Profeta:
41 ‹Aqeye xjal kygan tuʼn kyxmayin, kykeʼyinxe aqʼuntl in bʼant wuʼne toj kyqʼijlalile. Mlayx txi kyokslaʼne qa wuʼne in bʼant maske ma txi tqʼamaʼn jun xjal kyeye. Pero che kjawil labʼine tiʼj ex che kyimele›».
42 Tej tetz Pablo ex Bernabé toj ja te kʼulbʼil, e kubʼsan xjal kywitz tuʼn kypon toj juntl sábado tuʼn kyyolin chʼintl tiʼj jlu.
43 Ex tej kyetz kykyaqil toj ja te kʼulbʼil, nim qe judiy e ok lepeʼ kyiʼj, ax ikx qeju xi kyokslaʼn kyreligión judiy. Atzun kye e ok ten yolil kyukʼil ex xi kyqʼamaʼn kye tuʼn kukx kyten toj t-xtalbʼil Dios.
44 Toj juntl qʼij sábado, ok kychmon kyibʼ chʼixme kykyaqil xjal toj tnam tuʼn t-xi kybʼiʼn tyol Jehová.*
45 Tej tok kykeʼyin judiy qa otoq tzʼok kychmon kyibʼ nim xjal, tzaj kyqʼoj. Xi kyqʼamaʼn qa nya ax tok aju tqʼama Pablo ex e xmayin tiʼj tyol.
46 Tuʼntzunju, xi ttzaqʼweʼn Pablo ex Bernabé kye tukʼil tkyaqil kykʼuʼj: «Iltoq tiʼj tuʼn t-xi qʼamet tyol Dios kyeye tnejel. Pero tuʼnju mintiʼ in nok kybʼiʼne, in kubʼ kyyekʼine qa nya kyaje tuʼn tten kychwinqlale te jumajx. Tuʼntzunju, ma qoʼxe kyukʼil xjal kye junjuntl tnam.
47 Porke atzun jlu tzaj tqʼamaʼn Jehová* qeye tej tqʼama: ‹Ma jaw nskʼona tuʼn toka te jun spikʼun kye tnam, tuʼntzun t-xi tqʼamaʼna kye xjal twitz tkyaqil txʼotxʼ tzeʼn che kletel wuʼne›».
48 Tej tok kybʼiʼn xjal te junjuntl tnam jlu, e jaw tzalaj ex xi kyqʼamaʼn qa tbʼanelxix qe tyol Jehová.* Ex kykyaqil qeju ten jun tbʼanel kyanmi tuʼn ttzaj qʼoʼn kychwinqlal te jumajx, e okslan.
49 Nya oʼkxju, ax ikx ok kybʼiʼn xjal tyol Jehová* toj tkyaqil tnam.
50 Pero e yolin judiy kyukʼil xuʼj* at kyoklen ex in che xobʼtoq twitz Dios, ax ikx kyukʼil xinaq nim kyoklen toj tnam, tuʼntzun kyqʼojin tukʼil Pablo ex Bernabé ex yajxitl e jeʼx kylajoʼn toj kytnam.
51 Tuʼntzunju, el kychtoʼn Pablo ex Bernabé quq tiʼj kyqan tuʼn t-xi kyyekʼin kye qa otoq kubʼ kybʼinchaʼn jun nya bʼaʼn ex yajxitl e xiʼ toj tnam Iconio.
52 Ex kukx noj toj kyanmi discípulo te Antioquía tuʼn tzalajbʼil ex tuʼn espíritu santo.
Tqanil
^ Qʼonka twitza tiʼj xnaqʼtzbʼil A5.
^ Moqa «sinagoga».
^ Toj junjuntl lugar «ichan».
^ Atzun juntl tbʼi Bar-Jesús aju ma qo yolin tiʼj toj versículo 6.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Moqa «Xi tbʼinchaʼn David tvoluntad Dios».
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Toj junjuntl lugar «qya».
