Hechos 8:1-40
8 Ex bʼaʼn ela toj twitz Saulo tuʼn tkubʼ bʼyoʼn Esteban.
Ex toj qʼij aju, xi tzyet tuʼn tok bʼinchaʼn nim nya bʼaʼn tiʼj congregación te Jerusalén. Tuʼntzunju, e jex oq kykyaqil discípulo ex e xi oq kyoj tnam te Judea ex Samaria, ex oʼkx qe apóstol e kyaj ten.
2 Atzunte Esteban kux maquʼn kyuʼn junjun xinaq* e xobʼ twitz Dios, ex e oqʼ nimxix tiʼj.
3 Ex ok tzaqpaj Saulo tiʼj congregación. Okx kyojele ja tuʼn kyetz tjawoʼn qe xinaq ex qe xuʼj,* ex e xi tiʼn pres.
4 Atzun kye discípulo e jex oq, e ok ten yolil tiʼj tbʼanel noticia tiʼj tyol Dios kyukʼil xjal noq jaxku tumel e pon.
5 Kyxol, ten Felipe aju xiʼ toj tnam* te Samaria ex ok ten yolil tiʼj Cristo kyukʼil xjal.
6 Ok kybʼuyin kyibʼ nim xjal ex kykyaqil ok kyqʼoʼn kywiʼ tiʼjju tqʼama Felipe, ok kybʼiʼn ex ok kyqʼoʼn kywitz kyiʼj milagro* bʼant tuʼn.
7 Tej kyetz demonio toj kyanmi nim xjal, e jaw schʼiʼn. Ax ikx e bʼant nim qe xjal mintiʼ in bʼant kyyukch ex qe kox.
8 Tuʼntzunju, kykyaqil xjal toj tnam aju, noj toj kyanmi tuʼn tzalajbʼil.
9 Ex toj tnam in nanqʼintoq jun xjal Simón tbʼi, aju aqʼunan tukʼil magia tej naʼmxtoq tbʼaj tkyaqil jlu. E jaw labʼin xjal te Samaria tiʼj, ex xi tqʼamaʼn kye qa nimtoq toklen.
10 Ok kyqʼoʼn kywiʼ kykyaqil xjal tiʼj, qeju chʼin kyoklen ex qeju nim kyoklen, ex in kyqʼamaʼntoq: «Ma tzaj tqʼoʼn Dios tipumal nimxix toklen te xinaq lu».
11 E jaw labʼin xjal tiʼj magia bʼant tuʼn ex ok kyqʼoʼn kywiʼ tiʼjju tqʼama toj nimku ambʼil.
12 Pero tej tyolin Felipe kyukʼil kyiʼj tbʼanel noticia tiʼj Tgobierno Dios ex tiʼj tbʼi Jesucristo, xi kyokslaʼn tyol ex e bautisarin qe xinaq ex qe xuʼj.
13 Ax ikx te Simón okslan. Ex mintiʼ el tpan tibʼ tiʼj Felipe tej tbautisarin. Jaw labʼin tej tok tkeʼyin qe milagro* bʼant tuʼn Felipe ex qe tbʼanel bʼinchbʼen.
14 Tej tok kybʼiʼn apóstol toj Jerusalén qa otoq tzʼok kybʼiʼn xjal te Samaria tyol Dios, xi kysamaʼn Pedro ex Juan kyukʼil.
15 Tej kypon, e naʼn Dios kyiʼj xjal te Samaria tuʼn ttzaj qʼoʼn espíritu santo kye.
16 Porke oʼkx otoq che bautisarin toj tbʼi Qajaw Jesús ex nijun otoq tzaj qʼoʼn espíritu santo te.
17 Tuʼntzunju, kubʼ tqʼoʼn Pedro ex Juan kyqʼabʼ kyibʼaj ex tzaj tqʼoʼn Dios espíritu santo kye.
18 Tej tok tkeʼyin Simón qa tzaj tqʼoʼn Dios espíritu santo kyibʼaj xjal tej tkubʼ kyqʼoʼn apóstol kyqʼabʼ kyibʼaj, xi t-ofrecerin pwaq kye
19 ex tqʼama: «Ax ikx kyqʼontze oklenj lu weye tuʼntzun ttzaj tqʼoʼn Dios espíritu santo tibʼaj alkyexku xjal ma kubʼ nqʼoʼne nqʼabʼe tibʼaj».
20 Pero xi tqʼamaʼn Pedro te: «Kuchiwt naja junx tukʼil tpwaqa, porke ma kubʼ t-ximana qa jakutoq tzaj tlaqʼoʼna oyaj in tzaj tqʼoʼn Dios.
21 Mintiʼ toklena tiʼj aqʼuntl lu, porke nya tzʼaqli tanmiya twitz Dios.
22 Tuʼntzunju, tajtz tiʼj tanmiya ex kubʼsana twitz Jehová,* qape jaku kubʼ tnajsaʼn il ma kubʼ t-ximana toj tanmiya.
23 Porke in nok nkeʼyine qa puro nojni toj tanmiya tuʼn nya bʼaʼn* ex qa tzyuʼna tuʼn il».
24 Xi ttzaqʼweʼn Simón kye: «Kynajsame, che kubʼsane twitz Jehová* wiʼje, tuʼntzun miʼn tbʼaj aju ma tzaj kyqʼamaʼne».
25 Tej tbʼaj yolin Pedro ex Juan tiʼj tyol Jehová* ex tej t-xi kyqʼamaʼn tkyaqil kye xjal toj lugar aju, e meltzʼaj toj Jerusalén. Ex toj bʼe, e ok ten yolin kyukʼil xjal kyiʼj tbʼanel noticia kyoj nim aldea te Samaria.
26 Tbʼajlenxi jlu, tzaj yolin t-anjel Jehová* te Felipe ex xi tqʼamaʼn te: «Bʼincham ttena ex txiʼya kubʼni, toj bʼe in tzaj toj Jerusalén tuʼn tpon toj Gaza». Aju bʼe lu atztoq in nikʼ toj desierto.
27 Tuʼntzunju, bʼaj tbʼinchaʼn Felipe tten ex xiʼ, ex til jun xinaq nim toklen* tzajni toj Etiopía. Attoq tipumal xinaq lu ex in naqʼunan tukʼil reina Candace, aju reina kye xjal te Etiopía, ex atztoq toj tkwent taʼ tqʼinumabʼil reina. Xiʼ kʼulul twitz Dios toj Jerusalén,
28 pero otoq tzʼajtz tuʼn tmeltzʼaj toj ttxʼotxʼ. Qʼuqlitoq toj tkarwaj ex in leerin tukʼil tqʼajqʼajel twiʼ tiʼjju kubʼ ttzʼibʼin profeta Isaías.
29 Tuʼntzunju, xi tqʼamaʼn espíritu santo te Felipe: «Txiʼya ex laqʼexa ttxlaj karwaj».
30 Xitzun ojqelan Felipe ttxlaj karwaj ex ok tbʼiʼn qa in leerintoq xinaq tukʼil tqʼajqʼajel twiʼ tiʼjju kubʼ ttzʼibʼin profeta Isaías. Ex xi tqanin Felipe te: «¿In nelpe tnikʼa tiʼj tkyaqilju in jaw tleerina?».
31 Xi ttzaqʼweʼn xinaq te Felipe: «¿Tzeʼn jaku tzʼel nnikʼe tiʼj qa mintiʼ jun xjal in tzaj xnaqʼtzante weye?». Tuʼntzunju, kubʼsan twitz Felipe tuʼn tjax tukʼil toj karwaj ex tuʼn tkubʼ qeʼ ttxlaj.
32 Atzun piẍ tyol Dios lu jaw tleerin: «Xi qʼiʼn ik tzeʼn jun rit* jatumel tuʼn tkubʼ bʼyoʼn, ex ik tzeʼn jun rit mintiʼ in noqʼ twitz xjal in nel qʼinte ttzmal, noq in kubʼ tyoʼn.
33 Tej tkubʼ qʼoʼn tchʼixwi, kubʼ qʼoʼn tkastiw maske mintiʼ til. ¿Alkyetzun kyyolil kyiʼj tyajil? Porke kʼelel qʼiʼn tchwinqlal tzalu twitz txʼotxʼ».
34 Xitzun tqanin xjal te Etiopía te Felipe: «Najsama, qʼamantza weye, ¿alqiʼj in yolin profeta? ¿Tiʼjx, moqa tiʼj juntl xjal?».
35 Tzyettzun tyolin Felipe, tzaj tzyet tuʼn tyolin tiʼj piẍ tyol Dios lu, ex yolin tukʼil kyiʼj tbʼanel noticia tiʼj Jesús.
36 Tej in che bʼet, kanet aʼ kyuʼn ex xi tqʼamaʼn xinaq te Felipe: «Keʼyinxa, lu jun aʼ lu, ¿tiʼ jaku tzʼel qʼinte ambʼil weye tuʼn nbautisarine?».
37 * ——
38 Xitzun tqʼamaʼn xinaq te Etiopía tuʼn tweʼ karwaj, e kuʼx kykabʼil toj aʼ ex bautisarin tuʼn Felipe.
39 Tej kyjatz toj aʼ, ajbʼen espíritu santo tuʼn Jehová* tuʼn t-xi tiʼn Felipe toj juntl lugar ex ya mintiʼ ok tqʼoʼn xinaq te Etiopía twitz tiʼj. Ex xi tlajoʼn xinaq tbʼe in tzalaj.
40 Atzunte Felipe xi qʼiʼn toj tnam Asdod ex yolin tiʼj tbʼanel noticia kyukʼil xjal kyojele tnam tzmaxi tej tpon toj Cesarea.
Tqanil
^ Toj junjuntl lugar «ichan».
^ Toj junjuntl lugar «qya».
^ Axlo ikx «toj jun tnam».
^ Toj griego «señal».
^ Toj griego «señal».
^ Qʼonka twitza tiʼj xnaqʼtzbʼil A5.
^ Toj griego «txkʼaya».
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Qʼonka twitza tiʼj xnaqʼtzbʼil A5.
^ Toj griego «jun eunuco».
^ Toj junjuntl lugar «ẍneʼl», «carner».
^ Qʼonka twitza tiʼj xnaqʼtzbʼil A3.
^ Qʼonka twitza tiʼj xnaqʼtzbʼil A5.
