Hechos 10:1-48
-
Ok tkeʼyin Cornelio jun witzikʼ (1-8)
-
Ok tkeʼyin Pedro jun witzikʼ kyiʼj txkup otoq che bʼaj limpiarin (9-16)
-
Xiʼ Pedro visitarilte Cornelio (17-33)
-
Yolin Pedro kyiʼj tbʼanel noticia kyukʼil xjal te junjuntl tnam (34-43)
-
«Junx kyoklen xjal toj twitz Dios» (34, 35)
-
-
Kuʼtz espíritu santo kyibʼaj xjal te junjuntl tnam ex e bautisarin (44-48)
10 Ex in nanqʼintoq jun xinaq* toj tnam Cesarea aju Cornelio tbʼi, jun kyxol qe capitán te jun grupo soldad* italiano tbʼi.*
2 In xobʼtoq Cornelio twitz Dios ex kʼulin twitz junx kyukʼil kykyaqil toj tja. Onin kyiʼj qeju* e ikʼ toj necesidad ex kubʼsan twitz Dios nimku maj.
3 Jun qʼij, como a las 3 te qale,* ok tkeʼyin klarxix wen toj jun witzikʼ qa pon jun t-anjel Dios tukʼil ex xi tqʼamaʼn te: «¡Cornelio!».
4 Pero noq kyaj keʼyin Cornelio tiʼj anjel, tzaj xobʼ ex xi tqanin te: «¿Tiʼtzun, Tat?». Xi tqʼamaʼn anjel te: «Ma che tzaj bʼiʼn tnaʼj Diosa tuʼn Dios ex ma tzʼok tkeʼyin tzeʼn in nonina kyiʼj xjal prow, ex naʼn tkyaqil tbʼinchbʼena tuʼn.
5 Tuʼntzunju, samanxa junjun xjal toj tnam Jope txkol jun xinaq Simón tbʼi, aju ojtzqiʼn ik tzeʼn Pedro.
6 Atz ma kyaj ten tja Simón, jun xjal in naqʼunan tzqʼajsal cuero ex in nanqʼin ttzi mar».
7 Tej tikʼ bʼet anjel otoq yolin tukʼil Cornelio, tzaj ttxkoʼn Cornelio kabʼe tmajen ex jun soldad in xobʼtoq twitz Dios kyxol qeju e ajbʼen te.
8 Xi tqʼamaʼn tkyaqil kye ex e jeʼx tsamaʼn toj tnam Jope.
9 Toj juntl qʼij, tej in che bʼet ex chʼixtoq kypon toj tnam, como a las 12 del mediodía,* jax Pedro naʼl Dios twi ja.*
10 Pero tzaj weʼyaj tiʼj ex tajbʼiltoq tuʼn twaʼn. Tej tzmatoq in kubʼ bʼinchaʼn twa, ok tkeʼyin jun witzikʼ.
11 Til qa jaqet kyaʼj ex qa kuʼtz jun tiʼ twitz txʼotxʼ ik keʼyin ik tzeʼn jun matij* sábana te lino, ex tzyuʼn qe kyaje ttxaʼn.
12 Twitz sábana, waʼl qetoq nim clase txkup kyaje kyqan, qe txkup in kyjukʼuʼn kykʼuʼj, ex qe pájaro.
13 Yajxitl ok tbʼiʼn Pedro qe yol lu: «¡Pedro, weʼktza. Bʼyonkuya qe txkup te ttchiʼya!».
14 Atzunte Pedro xi ttzaqʼweʼn: «Mlay, Tat, porke bʼajx txi nchyoʼne jun tiʼ tzʼil moqa nya bʼaʼn».
15 Oktzun tbʼiʼn Pedro juntl maj qa tzaj yolin ex tqʼama: «Miʼn tzʼok tqʼoʼna te tzʼil aju ma bʼaj tlimpiarin Dios».
16 Tej ttzaj yolin toxin maj, xi qʼiʼn sábana toj kyaʼj.
17 Tej tzmatoq in ximen Pedro tiʼj tiʼ tzʼelpuna witzikʼ ok tkeʼyin, kanet tja Simón kyuʼn xinaq e pon tsamaʼn Cornelio ex waʼl qetoq ttzi pwert.
18 E okx yolin ex xi kyqanin qa atztoq in kyaj ten Simón, aju ojtzqiʼn ik tzeʼn Pedro.
19 Atzunte Pedro kukxtoq in ximen tiʼj witzikʼ ok tkeʼyin, tej ttzaj tqʼamaʼn espíritu santo te: «Pedro, in che jyon oxe xinaq tiʼja.
20 Weʼktza ex tkuʼxa, txiʼya kyukʼil, miʼn bʼaj tkʼuʼja, porke aqine ma chin tzaj samante kye».
21 Entonces kuʼtz Pedro jatumel ateʼtoq xinaq ex xi tqʼamaʼn kye: «Lu qine lu. Wiʼje in che jyone. ¿Tiquʼn ma che ule?».
22 Xi kyqʼamaʼn xinaq te: «Ma qo tzaj samaʼne tuʼn jun capitán kye soldad, aju Cornelio tbʼi. Jun xinaq tzʼaqli ex in xobʼ twitz Dios. Ex kykyaqil judiy in che yolin bʼaʼn tiʼj. Ma tzʼajbʼen jun anjel tuʼn Dios tuʼn ttzaj tqʼamaʼn te tuʼn t-xi tqʼoʼn txokbʼil tiʼja tuʼn tpona tja ex tuʼn tok tbʼiʼn tkyaqilju kxel tqʼamaʼna te».
23 Tuʼntzunju, xi tqʼamaʼn Pedro kye xinaq tuʼn kyokx ex xi tqʼoʼn kyposad.
Toj juntl qʼij, jaw weʼ ex xiʼ kyukʼil, junx kyukʼil junjun erman te Jope.
24 Tej tikʼ jun qʼij, pon toj tnam Cesarea. Ex in nayontoq Cornelio kyiʼj, otoq che ok tchmoʼn tfamiliar ex qe tamiw kʼujlaʼn tuʼn.
25 Tej tokx Pedro toj tja Cornelio, etz Cornelio qʼolbʼelte, kubʼ ẍmejeʼ twitz ex jaw tnimsaʼn.
26 Pero jaw twabʼan Pedro Cornelio ex xi tqʼamaʼn te: «Weʼktza, porke jun xjal qine ik tzeʼn teya».
27 Tej tzmatoq in yolin Pedro tukʼil Cornelio, okx toj tja ex til qa otoq tzʼok kychmon kyibʼ nim xjal.
28 Xi tqʼamaʼn Pedro kye: «Ojtzqiʼn kyuʼne qa mintiʼ in tzaj tqʼoʼn ley ambʼil tuʼn tok tmojbʼan tibʼ jun judiy tukʼil jun xjal te juntl tnam ex tuʼn tokx toj tja. Pero ma tzaj tyekʼin Dios weye qa mintiʼ tuʼn tok nqʼoʼne jun xjal te tzʼil moqa te nya bʼaʼn.
29 Tuʼntzunju, mintiʼ ma kubʼ nxkʼayin wibʼe tuʼn ntzaje kyukʼile. Jaʼlo kyqʼamantze weye, ¿tiquʼn ma chin tzaj kytxkoʼne?».
30 Xi ttzaqʼweʼn Cornelio te: «Ma bʼant kyaje qʼij, toj ax or ik tzeʼn jaʼlo, como a las 3 te qale,* tej in chin naʼne Dios toj njaye, kubʼ tyekʼin tibʼ jun xinaq nwitze in qoptzʼaj t-xbʼalun
31 ex tzaj tqʼamaʼn weye: ‹Cornelio, ma tzaj tbʼiʼn Dios tnaʼj Diosa ex naʼn tuʼn tkyaqil onbʼil ma txi tqʼoʼna kye xjal prow.
32 Tuʼntzunju, samanxa jun xjal toj tnam Jope txkolte Simón, aju ojtzqiʼn ik tzeʼn Pedro. Atz ma kyaj ten tja Simón, jun xjal tzqʼajsal cuero ex in nanqʼin ttzi mar›.
33 Tuʼntzunju, ma chex nsamaʼne junjun xjal jyol teya ex chjonte tuʼnju ma tzula. Ex ma tzʼok qchmon qibʼe twitz Dios tuʼn tok qbʼiʼne tkyaqilju ma tzaj tqʼamaʼn Jehová* teya».
34 Tej tok tbʼiʼn Pedro jlu, xi tzyet tuʼn tyolin ex tqʼama: «Jaʼlo in nel nnikʼe tiʼj qa junx kyoklen xjal toj twitz Dios.
35 Porke in tzalaj kyiʼj xjal te alkyexku tnam qa in che xobʼ twitz ex qa in kubʼ kybʼinchaʼn bʼaʼn.
36 Tzaj tqʼamaʼn Dios jun tbʼanel noticia kye xjal te Israel, qa jaku che ten bʼaʼn tukʼil noq tuʼn Jesucristo. Ex a Jesús Qajaw qkyaqilx.
37 Ojtzqiʼn kyuʼne aju tqanil el toj tkyaqil Judea, aju tzaj tzyet toj Galilea tej t-xi tqʼamaʼn Juan kye xjal tuʼn kybautisarin.
38 At toklen tukʼil Jesús te Nazaret. Jaw tskʼoʼn Dios tuʼn espíritu santo ex tzaj tqʼoʼn tipumal, ex bʼet toj tkyaqil lugar tuʼn tkubʼ tbʼinchaʼn bʼaʼn ex tuʼn tkubʼ tqʼanin kykyaqil qeju in che sufririn tuʼn Tajaw il. Bʼant tkyaqil jlu tuʼn porke ten Dios tukʼil.
39 Ex testiw qoʼye tiʼj tkyaqilju bʼant tuʼn toj kytnam judiy ex toj Jerusalén, pero jaw qʼoʼn twitz tzeʼ kyuʼn xjal ex kubʼ kybʼyoʼn.
40 Maske ikju, jaw anqʼin tuʼn Dios toj toxin qʼij ex xi tqʼoʼn ambʼil te tuʼn tkubʼ tyekʼin tibʼ.
41 Mintiʼ kubʼ tyekʼin tibʼ kywitz kykyaqil xjal, sino oʼkx kywitz qeju xi tqʼoʼn Dios kyoklen te testiw tiʼj. Toj juntl yol, kubʼ tyekʼin tibʼ qwitze, ex o waʼne ex o kʼane junx tukʼil tej otoq jaw anqʼin kyxol kyimni.
42 Ax ikx tzaj tqʼamaʼn qeye tuʼn qyoline tiʼj tyol Dios kyukʼil xjal, ex tuʼn t-xi qqʼamaʼne klar wen qa jaw tskʼoʼn Dios tuʼn tok te jwes kyibʼaj xjal itzʼ ex kyimni.
43 E yolin kykyaqil profeta tiʼj ex tzaj kyqʼamaʼn qa noq tuʼn tbʼi jaku kubʼ najsaʼn kyil kykyaqil qeju in nok qeʼ kykʼuʼj tiʼj».
44 Tej tzmatoq in yolin Pedro, kuʼtz espíritu santo kyibʼaj kykyaqil qeju in che bʼin tiʼj tyol.
45 Atzun kye okslal judiy* e xiʼ tukʼil Pedro, e jaw labʼin tuʼnju tzaj tqʼoʼn Dios espíritu santo kyibʼaj xjal te juntl tnam ik tzeʼn jun oyaj.
46 Porke ok kybʼiʼn qa in che yolin kyoj junjuntl yol ex qa jaw kynimsaʼn Dios. Yajxitl, tqʼama Pedro jlu:
47 «Ma tzaj tqʼoʼn Dios espíritu santo kyibʼaj xjal lu ik tzeʼn qe, ¿alkye jaku tzʼel qʼinte ambʼil kye tuʼn kybautisarin tukʼil aʼ?».
48 Xitzun tqʼamaʼn Pedro tuʼn kybautisarin toj tbʼi Jesucristo. Ex xi kyqanin te tuʼn tkyaj ten jteʼ qʼijtl kyukʼil.
Tqanil
^ Toj junjuntl lugar «ichan».
^ Moqa «jun centurión», aju e ten 100 soldad toj tkwent.
^ Jun grupo soldad te Roma te 600 kybʼet.
^ Moqa «Xi tqʼoʼn oyaj kye xjal».
^ Toj griego «tej chʼixtoq ttzaj a las nueve or».
^ Toj griego «a las seis or».
^ Moqa «tibʼaj terraza».
^ Toj junjuntl lugar «nimin», «nintz».
^ Toj griego «a las nueve or».
^ Qʼonka twitza tiʼj xnaqʼtzbʼil A5.
^ Toj griego «otoq che kubʼ circuncidarin».
