Hechos 28:1-31
28 Tej otoq qo klete qkyaqile, ok qbʼiʼne qa Malta tbʼi isla.
2 Ex kubʼ kyyekʼin xjal in che anqʼin atz tbʼanelxix kymod qukʼile. Tuʼnju in kubʼtoq nim jbʼal ex attoq nim cheʼw, kubʼ kyqʼoʼn xjal qʼaqʼ ex tukʼil tbʼanel kymod o kʼmonjtze qkyaqile kyuʼn.
3 Atzunte Pablo, jaw tchmoʼn jun manojo tqʼabʼ tzeʼ tzqij. Ex tej tokx tqʼoʼn toj qʼaqʼ, etz lipen jun kan* kyxol tqʼabʼ tzeʼ tuʼn tipumal kyaq ex ok yeʼ tiʼj tqʼabʼ.
4 Tej tok kykeʼyin xjal najli qe toj isla qa ok yeʼ jun kan venenoso tiʼj tqʼabʼ Pablo, e ok ten yolil kyxolx ex kyqʼama: «Junlo bʼyol xjal xinaq* lu. Maske ma klet toj mar, mintiʼ ma tzaj tqʼoʼn diosa tzʼaqli* ambʼil te tuʼn kukx tanqʼin».
5 Pero el tchtoʼn Pablo tqʼabʼ ex kux tzʼaq kan toj qʼaqʼ, ex mintiʼ jun nya bʼaʼn tzaj tiʼj.
6 Atzun kye xjal, in che ayontoq tuʼn t-xi mal Pablo moqa noq minabʼen tuʼn tkubʼ tzʼaq ex tuʼn tkyim. Pero tej tok kykeʼyin qa mintiʼ jun nya bʼaʼn tzaj tiʼj, chʼexpaj kyximbʼetz ex e ok ten qʼamalte qa jun dios.
7 Nqayin tiʼj lugar, attoq jun xinaq Publio tbʼi, jun xinaq attoq nim ttxʼotxʼ ex aju xjal mas nim toklen toj isla. O okx kʼamoʼne tuʼn ex tuʼn tkyaqil tkʼuʼj tzaj tqʼoʼn qposade toj oxe qʼij.
8 Pero yabʼtoq tman Publio ex otoq kubʼ twitz watbʼil tuʼn kyaq ex chkʼoj. Entonces okx Pablo jatumel taʼ ex bʼant tej tnaʼn Pablo Dios tiʼj ex tej tkubʼ tqʼoʼn tqʼabʼ tibʼaj.
9 Tej tbʼaj jlu, kykyaqil xjal yabʼ in che anqʼin toj isla e pon tukʼil Pablo ex e kubʼ tqʼanin.
10 Ax ikx, tzaj kyqʼoʼn nim oyaj qeye, ex tej chʼinxtoq qikʼ bʼete toj bark tzaj kyqʼoʼn tkyaqilju at tajbʼen qeye.
11 Tej tikʼ oxe xjaw qponlene toj isla, kubʼ bʼe quʼne ex o jaxe toj jun bark tok tilbʼilal qe Tkʼwal Zeus twitz. Tzajnitoq bark toj tnam Alejandría ex otoq kyaj ten toj isla tuʼn tex jbʼalil tuʼn.
12 Tej qpone toj tnam Siracusa, o kyaj tene oxe qʼij atz.
13 Yajxitl kubʼ bʼe quʼne ex o pone toj tnam Regio. Toj juntl qʼij, tzaj chʼin kyqʼiqʼ tibʼaj mar kubʼni ex o pone toj tnam Puteoli toj tkabʼin qʼij.
14 Ex e kanet erman quʼne toj tnam lu ex e kubʼsan qwitze tuʼn qkyaj tene siete qʼij kyukʼil. Yajxitl o xiʼye atz Roma.
15 Tej tok kybʼiʼn erman te Roma qa ok qo pole, e ul kanol qeye toj Plas te Mercad te Apio ex toj jun lugar Oxe Tabernas tbʼi. Tej til Pablo qe erman, xi tqʼoʼn chjonte te Dios ex qeʼxix nim tkʼuʼj.
16 Ex tej qpone Roma, xi qʼoʼn ambʼil te Pablo tuʼn tkyaj ten tjunalx toj jun ja ex tuʼn tok xqʼuqin tuʼn jun soldad.
17 Pero tej tikʼ oxe qʼij, tzaj ttxkoʼn qe judiy mas nim kyoklen. Tej otoq tzʼok kychmon kyibʼ kykyaqil, xi tqʼamaʼn kye: «Aqeye erman, maske mintiʼ jun nya bʼaʼn ma tzʼok nbʼinchane tiʼj qtnam moqa tiʼj kykostumbr ojtxe qyajil, ma chin tzyete Jerusalén ex ma chinx qʼoʼne toj kyqʼabʼ xjal te Roma.
18 Tej woke toj xjel kyuʼn, kubʼ kyximen tuʼn wex kytzaqpiʼne, porke mintiʼ kanet jun wile kyuʼn tuʼn nkyime.
19 Pero nya bʼaʼn ela toj kywitz judiy, tuʼntzunju xi nqanine tuʼn nxi qʼiʼne twitz César. Ex mintiʼ bʼant jlu wuʼne tuʼnju atwit jun nqʼoje tiʼj ntname.
20 Tuʼntzunju, ma txi nqanine tuʼn kyok nkeʼyine ex tuʼn nyoline kyukʼile, porke kʼaloʼn qine tuʼn cadena lu noq tuʼn qʼuqbʼil tkʼuʼj Israel».
21 Atzun kye xi kyqʼamaʼn te: «Mintiʼ jun carta ma tzaj samaʼn qeye toj Judea in yolin tiʼja, ex nijun kyxol qerman o che ul tzalu o tzaj kyqʼoʼn jun tqanil tiʼja moqa o che yolin nya bʼaʼn tiʼja.
22 Pero qajbʼile tuʼn tok qbʼiʼne tiʼ t-xima, porke ojtzqiʼn quʼne qa toj tkyaqil lugar in che yolin xjal nya bʼaʼn tiʼj akʼaj okslabʼil lu».
23 Tuʼntzunju, kubʼ kyximen tuʼn kyxiʼ tukʼil Pablo toj juntl qʼij ex mas nim kybʼet e pon jatumel kyaj ten. Ex xi tzyet tuʼn tyolin Pablo kyukʼil te prim hasta te qale ex klar wen yolin kyukʼil tiʼj Tgobierno Dios. Yolin tiʼj Tley Moisés ex tiʼjju kubʼ kytzʼibʼin Profeta, tuʼntzun tkubʼ tiʼj kykʼuʼj tuʼn tuʼn kyokslaʼn tiʼj Jesús.
24 Ateʼ junjun xi kyokslaʼn aju tqʼama, ex ateʼ junjuntl mintiʼ xi kyokslaʼn.
25 Ex tuʼnju mintiʼ mojeʼ kyyol, xi tzyet tuʼn kyikʼ bʼet. Entonces oʼkx xi tqʼamaʼn Pablo jlu kye:
«Ax tok aju tqʼama espíritu santo tej tyolin profeta Isaías kyukʼil ojtxe kyyajile.
26 Tqʼama jlu: ‹Txiʼya kyukʼil xjal lu ex qʼamanxa kye: «Kʼokel kybʼiʼne, pero mlayx tzʼel kynikʼe tiʼj. Kʼokel kykeʼyine, pero mlayx kyile.
27 Porke o tzʼok kyanmi xjal lu te kyuw. O tzʼok kyjupuʼn kyẍkin* ex o kubʼ kyjupuʼn kywitz tuʼntzun miʼn kybʼin ex tuʼn miʼn kykeʼyin. Tuʼn jlu, mintiʼ in nel kynikʼ tiʼjju tuʼn tbʼant kyuʼn ex mintiʼ in che meltzʼaj wukʼile tuʼn kykubʼ nqʼanine»›.
28 Por eso, tzʼelx kynikʼe tiʼj qa aju kolbʼil in tzaj tukʼil Dios, ma txi qʼamet kye txqantl xjal nya judiy. Ex atzun kye kʼokel kybʼiʼn».
29 * ——
30 Axtzun kyaj ten Pablo kabʼe abʼqʼi toj jun ja majen. Ex kubʼ tyekʼin tbʼanel tmod kyukʼil qeju e pon keʼyilte.
31 Ax ikx, mintiʼ tzaj xobʼ tej tyolin tiʼj Tgobierno Dios kyukʼil ex tej t-xi tqʼoʼn xnaqʼtzbʼil kye tiʼj Qajaw Jesucristo, ex mintiʼ jun tiʼ kubʼ wabʼante.
