Hechos 24:1-27
24 Tej tikʼ jweʼ qʼij, pon nejenel kye pal Ananías toj tnam Cesarea junx kyukʼil junjun ansyan ex jun licenciado Tértulo tbʼi. Ex e xiʼ twitz gobernador qʼamalte alkye til Pablo.
2 Tej tokx txkoʼn, xi tzyet tuʼn tyolin Tértulo ex tqʼama:
«Tat gobernador, chjonte teya in qo anqʼine bʼaʼn ex tuʼn tbʼanel aqʼuntl in bʼant tuʼna o che bʼant junjun chʼixpubʼil toj tnam.
3 Tkyaqil qʼij, noq jaxku tumel atoʼye, in xi qqʼoʼne chjonte tuʼn tbʼanel taqʼuna tat Félix, aya gobernador nimxix toklen.
4 Pero tuʼn miʼn tsikta qiʼje, in chin kubʼsane twitza tuʼn tkubʼ tyekʼina t-xtalbʼila qiʼje ex tuʼn t-xi tbʼiʼna aju kxel qqʼamaʼne teya.
5 Qajbʼile tuʼn t-xi qqʼamaʼne teya qa aju xinaq* lu in nok ten tzpetsalte kynabʼil xjal.* In xi tqʼamaʼn kye judiy twitz tkyaqil txʼotxʼ tuʼn tjaw kyiʼn kyibʼ tiʼj gobierno ex jun nejenel kyxol xjal toj akʼaj okslabʼil nazareno tbʼi.
6 Ex ma tzyet quʼne, porke tajbʼiltoq tuʼn tbʼaj ttzʼilsaʼn templo.
7 * ——
8 Aj tok toj xjel tuʼna, kʼelel tnikʼa tiʼj qa ax tok tkyaqilju ma txi qqʼamaʼne teya».
9 Entonces, e jaw yolin judiy ex kyqʼama qa ax tok tkyaqil jlu.
10 Tej t-xi tbʼinchaʼn gobernador jun señ tukʼil twiʼ te Pablo tuʼn tyolin, tqʼama Pablo jlu:
«Ojtzqiʼn wuʼne qa ma tzikʼ nim abʼqʼi aya jwes toj tnam lu. Tuʼntzunju, jaku chin yoline tukʼil tkyaqil nkʼuʼje twitza.
11 Qa tajbʼila tuʼn tel tnikʼa tiʼj qa ax tok moqa nya, jaku txi tqanina. Pero naʼmx tikʼ 12 qʼij nxilene toj Jerusalén kʼulul twitz Dios.
12 Mintiʼ ma chin kanete kyuʼn inwt chin iline tukʼil jun xjal toj templo moqa inwt che jaw tilj xjal toj ja te kʼulbʼil* wuʼne moqa toj tnam.
13 Ex mlay bʼant txi kyyekʼin teya qa ax tok tkyaqilju ma tzaj kyqʼamaʼn wiʼje.
14 Pero wajbʼile tuʼn t-xi nqʼamaʼne teya qa in chin anqʼine ik tzeʼn ‹akʼaj okslabʼil› in che yolin tiʼj ex qa in chin kʼuline twitz Kydios ojtxe nyajile. Porke in xi wokslaʼne tkyaqilju in tzaj tqʼamaʼn Ley ex aju kubʼ kytzʼibʼin Profeta.
15 Ex qʼuql nkʼuʼje tiʼj Dios, ik tzeʼn kye xjal lu qʼuql kykʼuʼj tiʼj, qa che jawil anqʼin kyimni, tzaʼnx qeju tzʼaqlixix, ax ikx qeju nya tzʼaqlixix.
16 Tuʼntzunju, in nok tilil wuʼne tuʼn tten jun tbʼanel wanmiye twitz Dios ex kywitz xjal.
17 Tbʼajlenxi nim abʼqʼi, in meltzʼaje juntl maj toj Jerusalén, tzaj wiʼne onbʼil kye nxjalile ex in nule qʼol ofrenda twitz Dios.
18 Ex atzun jlu in bʼanttoq wuʼne toj templo tej in kanete kyuʼn. Ya otoq bʼaj nlimpiarin wibʼe ik tzeʼn in tzaj tqʼamaʼn ley. Nyatoq nim xjal ateʼ wukʼile ex mintiʼ jun problem tzaj wuʼne. Pero e pon junjun judiy te Asia atz,
19 aqeju mintiʼ ma che ul. Atzun kye iltoq tiʼj tuʼn kyul twitza qa at jun wile kywitz.
20 Si no, kyqʼamantz xinaq lu alkye wile kywitz tej ẍinx qʼiʼne twitz Sanedrín.
21 Porke oʼkx xi nqʼamaʼne jlu tukʼil tqʼajqʼajel nwiʼye: ‹¡Ma chin oke toj xjel jaʼlo porke in nok qeʼ nkʼuʼje tiʼj qa che kjawil anqʼin kyimni!›».
22 Tej tok tbʼiʼn Félix jlu, kyaj tqʼoʼn juicio te juntl qʼij. Porke ojtzqintoq tuʼn tkyaqilju attoq toklen tukʼil tbʼe Qajaw. Ex xi tqʼamaʼn jlu kye kykyaqil: «Kbʼel nximane tiʼ kxel nbʼinchane kyukʼile tzmaxi aj tul coronel Lisias».
23 Xitzun tqʼamaʼn Félix te capitán kye soldad tuʼn tokx tqʼoʼn Pablo pres, pero ax ikx xi tqʼoʼn ambʼil te tuʼn tbʼant junjun tiʼ tuʼn. Ax ikx xi tqʼoʼn ambʼil kye tamiw tuʼn t-xi kyqʼoʼn aju at tajbʼen te.
24 Tej tikʼ junjun qʼij, xiʼ Félix tukʼil t-xuʼjil, aju Drusila tbʼi ex judiy xjal, jatumel taʼ Pablo. Tzaj ttxkoʼn Pablo ex kubʼ tbʼiʼn tej tok ten yolil tiʼj tiʼ tzʼelpuna tuʼn qokslaʼn tiʼj Cristo Jesús.
25 Pero tej tok ten Pablo yolil tiʼjju tzʼaqli, tiʼjju tuʼn qjukʼunte qibʼ ex tiʼj ambʼil aj kyok xjal toj juicio tuʼn Dios, tzaj xobʼ Félix ex tqʼama: «Txiʼya jaʼlo. Ktzajel ntxkoʼna juntl maj aj tten ambʼil wiʼje».
26 Pero in nayontoq Félix tuʼn t-xi tqʼoʼn Pablo pwaq te tuʼn tex ttzaqpiʼn. Tuʼntzunju, kukx tzaj ttxkoʼn tuʼn tyolin tukʼil.
27 Tej tikʼ kabʼe abʼqʼi, xi tzyet tuʼn tkawin Porcio Festo te t-xel Félix. Pero tuʼnju tajbʼiltoq Félix tuʼn tkyaj bʼaʼn kyukʼil judiy, kyaj tqʼoʼn Pablo pres.
