Hechos 16:1-40
16 Entonces pon Pablo toj tnam Derbe ex yajxitl xiʼ toj tnam Listra. Toj tnam lu attoq jun discípulo Timoteo tbʼi. Tal jun xuʼj judiy okslal, atzun tman griego.
2 Atzun kye erman toj tnam Listra ex Iconio in che yolintoq bʼaʼn tiʼj Timoteo.
3 Tajtoq Pablo tuʼn t-xiʼ Timoteo tukʼil, pero tnejel xi tiʼn tuʼn tkubʼ circuncidarin tuʼn kypaj judiy ateʼtoq kyoj lugar aju, porke ojtzqiʼntoq kyuʼn kykyaqil qa griego tman.
4 Tej kyikʼ kyojele tnam, xi kyqʼamaʼn kye erman aju otoq kubʼ kyximen apóstol ex qe ansyan toj Jerusalén tuʼntzun t-xi kynimen.
5 Tuʼn jlu, kyuwsanjtz qʼuqbʼil kykʼuʼj erman kyoj congregación ex mas chʼiy kybʼet junjun qʼij.
6 Ax ikx e ikʼ toj Frigia ex Galacia, porke mintiʼ xi tqʼoʼn espíritu santo ambʼil kye tuʼn kyyolin tiʼj tyol Dios toj txʼotxʼ te Asia.
7 Ex tej kypon Misia, kyajbʼiltoq tuʼn kyokx Bitinia, pero mintiʼ xi tqʼoʼn t-espíritu santo Jesús* ambʼil kye tuʼn kyokx.
8 Tuʼntzunju, e ikʼ toj Misia ex e pon Troas.
9 Te qonikʼen, ok tkeʼyin Pablo toj jun witzikʼ qa in kubʼsan jun xinaq* te Macedonia twitz. Tqʼama jlu: «Tikʼtza Macedonia ex qo tonintza».
10 Tej tok tkeʼyin Pablo witzikʼ lu, ok tilil quʼne tuʼn qxiʼye Macedonia, porke el qnikʼe tiʼj qa a Dios tzaj qʼonte txokbʼil qiʼje tuʼn qxiʼye qʼamalte tbʼanel noticia kye.
11 O jaʼxe toj jun bark atz Troas tuʼn qxiʼye directo Samotracia. Toj juntl qʼij, o xiʼye Neápolis.
12 Ex toj tnam Neápolis o xiʼye Filipos, jun tnam te Roma ex aju tnam mas nim toklen toj Macedonia. Ex o kyaj tene junjun qʼij toj tnam lu.
13 Toj jun qʼij sábado, o etze tiʼjxi tnam ex o xiʼye ttzi jun río, jatumel kubʼ qximane qa in noktoq kychmon kyibʼ xjal naʼl Dios. Entonces o kubʼ qeʼye ex xi tzyet tuʼn qyoline kyukʼil xuʼj* otoq tzʼok kychmon kyibʼ atz.
14 Ex in bʼintoq jun xuʼj qiʼje Lidia tbʼi, tzajni toj tnam Tiatira. Jun xuʼj kʼayil tiʼj tbʼanel tela morado keʼyin ex in kʼulintoq twitz Dios. Onin Jehová* tiʼj tuʼn t-xi tbʼiʼn ex tuʼn t-xi tnimen aju tqʼama Pablo.
15 Tej otoq bautisarin Lidia kyukʼil toj tja, kubʼsan qwitze ex tqʼama: «Qa in kubʼ kyximane qa tzʼaqli qine twitz Jehová,* kytzaje wukʼile ex che tenkje njaye». Ex o kyaj tene tja tuʼnju kubʼsan qwitze.
16 Jun qʼij, tej qxiʼye toj lugar jatumel in nok naʼj Dios, kanet jun txin majen quʼne aju attoq demonio toj tanmi. In neltoq tnikʼ txin lu tiʼjju kbʼajel toj ambʼil tzul ex kambʼet nim pwaq tuʼn kye tpatrón.
17 Ok lepeʼ txin lu tiʼj Pablo ex qiʼje, jaw schʼin ex tqʼama: «Aqeju xinaq lu tmajen Dios qe, aju Dios Nimxix Toklen ex in xi kyqʼamaʼn bʼe te kolbʼil kyeye».
18 Ex nimku qʼij xi tqʼamaʼn txin jlu kye. Pero tej tbʼaj tgan Pablo tiʼj, ajtz tkeʼyin ttzel tiʼj ex xi tqʼamaʼn te demonio: «Kxel nqʼamaʼne teya toj tbʼi Jesucristo tuʼn tetza toj tanmi txin». Ex jurattzun etz demonio toj tanmi.
19 Tej tok kykeʼyin tpatrón txin qa otoq tzʼetz demonio toj tanmi ex qa ya mlaytoq che kambʼan pwaq, tzaj kytzyuʼn Pablo ex Silas ex xi kyiʼn kywitz gobernador toj plas te merkad.
20 Tej kypon kywitz gobernador toj tnam, kyqʼama jlu: «Ma che jaw tilj xjal toj tnam kyuʼn xinaq judiy lu.
21 Ex in xi kyxnaqʼtzaʼn juntl kostumbr kye xjal aju mintiʼ tuʼn qok lepeʼ tiʼj ex tuʼn tkubʼ qbʼinchaʼn, porke te Roma qoʼ».
22 Tej tok kybʼiʼn xjal jlu, e jaw tilj kyiʼj. Atzun kye gobernador toj tnam, bʼaj kylaqiʼn t-xbʼalun Pablo ex Silas ex xi kyqʼamaʼn tuʼn kybʼaj golpearin tukʼil tzeʼ.
23 Tej kybʼaj golpearin nim, e okx kyqʼoʼn pres ex xi kyqʼamaʼn te xqʼuqil pres tuʼn kyok t-xqʼuqin wen.
24 Tej tok tbʼiʼn xqʼuqil pres orden lu, e okx tqʼoʼn toj calabozo tzmax tojxi ex okx tqʼoʼn kyqan toj cepo.
25 Como a las 12 te qonikʼen, in naʼntoq Pablo ex Silas Dios ex jaw kynimsaʼn Dios tukʼil bʼitz, ex in che bʼintoq txqantl pres kyiʼj.
26 Ex noq minabʼen tzaj jun terremoto aju yukch tsimyentil cárcel tuʼn. E jaqet tpwertil cárcel ex e jel tzʼaq cadena kyiʼj kykyaqil.
27 Tej tjaw sekʼpaj xqʼuqil pres toj twatl ex tej tok tkeʼyin qa jaqoʼn qe tpwertil cárcel, jatz tiʼn t-espada ex tajtoq tuʼn tkubʼ tbʼyon tibʼ, porke kubʼ t-ximen qa otoq che ex oq kykyaqil pres.
28 Pero jaw schʼin Pablo kyuw ex tqʼama: «¡Miʼn kubʼ tbʼyon tibʼa! ¡Qkyaqile atoʼye tzalu!».
29 Tuʼntzunju, xi tqanin xqʼuqil pres tuʼn kytzaj qʼiʼn kandil, xi ojqelan tojxi ex in luʼlun tuʼn t-xobʼil tej tkubʼ ẍmejeʼ twitz Pablo ex Silas.
30 Yajxitl e jeʼtz tiʼn ex xi tqʼamaʼn kye: «Aqeye tat, ¿tiʼ il tiʼj tuʼn tbʼant wuʼne tuʼn nklete?».
31 Xi kytzaqʼweʼn te: «Tzʼokslana tiʼj Qajaw Jesús ex che kletele, aya ex qe toj tjaya».
32 Xitzun kyqʼamaʼn tyol Jehová* te ex kye kykyaqil toj tja.
33 Ex tojx qonikʼen aju, e xi qʼiʼn tuʼn xqʼuqil pres ex el ttxʼajoʼn kykʼixbʼlen. Ex bautisarin xqʼuqil pres junx kyukʼil kykyaqil toj tja.
34 Yajxitl e xi qʼiʼn tuʼn xqʼuqil pres tja ex xi tqʼoʼn kywa. Ex nimxix jaw tzalaj junx kyukʼil kykyaqil toj tja, porke otoq che okslan tiʼj Dios.
35 Tej qsqix, xi kysamaʼn gobernador toj tnam junjun guardia qʼamalte te xqʼuqil pres tuʼn tex ttzaqpiʼn Pablo ex Silas.
36 Tuʼntzunju, xi tqʼamaʼn xqʼuqil pres jlu te Pablo: «Ma che tzaj samaʼn junjun xinaq kyuʼn gobernador toj tnam qʼamalte qa jaku che exe. Kyexe jaʼlo ex kyxiʼye toj tzalajbʼil».
37 Pero xi tqʼamaʼn Pablo kye: «Mlay, aqe il tiʼj tuʼn kyul qʼamalte qeye tuʼn qexe. Kyajbʼil tuʼn qex kytzaqpiʼne toj ewaj porke, maske te Roma qoʼye ex naʼmxtoq tkubʼ kyqʼoʼn qsentense, ma qo bʼaj golpearine kyuʼn kywitz xjal ex ma qo okx kyqʼoʼne toj cárcel».
38 Xi kyqʼamaʼn guardia jlu kye gobernador toj tnam. Ex e tzaj xobʼ tej tok kybʼiʼn qa te Roma qeʼ.
39 Tuʼntzunju, e xiʼ qanil najsam kye. Ex tej kyetz kyiʼn toj cárcel, xi kyqʼamaʼn kye tuʼn kyex toj tnam.
40 Pero tej tetz Pablo ex Silas toj cárcel, e xiʼ tja Lidia jatumel kyil qe erman ex xi kyqʼuqbʼaʼn kykʼuʼj. Yajxitl, e etz toj tnam.
