Hechos 18:1-28
18 Tbʼajlenxi jlu, etz Pablo toj tnam Atenas ex xiʼ toj Corinto.
2 Ex kanet jun xinaq* tuʼn aju Áquila tbʼi, jun judiy ul itzʼj toj tnam Ponto. Kʼitzqetoq tetzlen Áquila toj Italia tukʼil Priscila aju t-xuʼjil, porke etz tqʼoʼn Claudio jun orden tuʼn kyex kykyaqil judiy toj tnam Roma. Tuʼntzunju, xiʼ Pablo kyukʼil,
3 kyaj ten kyja ex aqʼunan kyukʼil porke axtoq kyaqʼun. E aqʼunan bʼinchal ja te tela.
4 Ex kykyaqil sábado, yolin kyukʼil xjal toj ja te kʼulbʼil* ex kubʼ kykʼuʼj judiy ex griego tuʼn.
5 Tej tpon Silas ex Timoteo toj tnam Corinto, tzajni qeʼ toj Macedonia, bʼiʼx xi tqʼon tibʼ Pablo tuʼn tyolin tiʼj tyol Dios. Xi tqʼamaʼn kye judiy ex xi tyekʼin kye qa a Jesús Cristo.
6 Pero tuʼnju kukx e qʼojin judiy tukʼil Pablo ex e ok ten yasil tiʼj, el tchtoʼn quq tiʼj t-xbʼalun ex tqʼama: «Aʼyexe at kypaj qa ma che kyime, nya aqine. Jaʼlo, ma chinxe kyukʼil xjal kyoj junjuntl tnam».
7 Ikʼtzun bʼet Pablo kywitz* ex xiʼ tja jun xjal Ticio Justo tbʼi, jun xinaq in kʼulintoq twitz Dios ex najan ttxlaj ja te kʼulbʼil.
8 Ex okslan Crispo, aju nejenel toj ja te kʼulbʼil, tiʼj Qajaw junx kyukʼil kykyaqil toj tja. Ex nim qe xjal te Corinto, e okslan ex e bautisarin tej tok kybʼiʼn tbʼanel noticia.
9 Nya oʼkxju, ax ikx xi tqʼamaʼn Qajaw jlu te Pablo toj jun witzikʼ te qonikʼen: «Miʼn xobʼa, kukx yolina ex miʼn sikta.
10 Porke atine tukʼila ex mlay tzʼok tzoqpaj jun xjal tiʼja. Ateʼ nim xjal toj tnam lu che okslal wiʼje».
11 Tuʼntzunju, ax kyaj ten Pablo jun abʼqʼi tukʼil seis meses ex xi tqʼoʼn xnaqʼtzbʼil tiʼj tyol Dios kye.
12 Tej in kawin gobernador Galión toj tnam Acaya, kubʼ kyximen judiy tuʼn kyok tzoqpaj tiʼj Pablo ex xi kyiʼn toj tribunal.
13 Kyqʼama jlu: «In xi tyekʼin xinaq lu kye xjal tuʼn kykʼulin twitz Dios toj jun tumel mintiʼ in tzaj tqʼamaʼn ley».
14 Tej chʼinxtoq t-xi tzyet tuʼn tyolin Pablo, xi tqʼamaʼn Galión kye judiy: «Aqeye xjal judiy, noqwit jun nya bʼaʼn ma kubʼ tbʼinchaʼn xjal lu moqa jun il, jaku chin kubʼ tene bʼil kyeye tukʼil pasens.
15 Pero qa noq tuʼn jun yol ma che ule tzalu, noq tuʼn tbʼi jun xjal moqa noq tuʼn kyleye, kykeʼyinxe tiʼ kbʼantel kyuʼne. Porke nya waje tuʼn woke te jwes kyibʼaj».
16 E jeʼtztzun tlajoʼn toj tribunal.
17 Tuʼntzunju, tzaj tzyuʼn Sóstenes, aju nejenel toj ja te kʼulbʼil, kyuʼn kykyaqil xjal ex bʼaj kygolpearin twitz tribunal. Pero mintiʼ okx tqʼon tibʼ Galión kyxol.
18 Ex ax kyaj ten Pablo junjuntl qʼij. Yajxitl, tej tbʼaj tdespedirin tibʼ kyiʼj erman, jax toj jun bark tuʼn t-xiʼ toj tnam Siria, ax ikx xiʼ Priscila ex Áquila tukʼil. Toj tnam Cencreas, el tiʼn ttzmal twiʼ porke xi tprometerin jun tyol.
19 Tej kypon Éfeso, kyaj tqʼoʼn Pablo Priscila ex Áquila toj tnam. Atzunte okx toj ja te kʼulbʼil ex xi tqʼoʼn xnaqʼtzbʼil kye judiy.
20 Maske xi kyqanin te tuʼn tkyaj ten mastl qʼij, xi tqʼamaʼn kye qa mlay.
21 Noq oʼkx bʼaj tdespedirin tibʼ kyiʼj ex xi tqʼamaʼn kye: «Qa tajbʼil Jehová,* che okel nkeʼyine juntl maj». Entonces jax toj jun bark toj tnam Éfeso
22 ex kuʼtz Cesarea. Ex xiʼ toj tnam Jerusalén qʼolbʼel kye erman toj congregación. Yajxitl kuʼtz Antioquía.
23 Tej tten jteʼ qʼij toj tnam lu, xiʼ ex bʼaj tbʼetin tkyaqil tnam te Galacia ex Frigia ex xi tqʼuqbʼaʼn kykʼuʼj kykyaqil discípulo.
24 Ex pon jun xjal Apolos tbʼi toj tnam Éfeso, jun judiy ul itzʼj toj tnam Alejandría. Nyatoq kwest in nela te tuʼn tyolin ex attoq nim tojtzqibʼil tiʼj tyol Dios.
25 Otoq tzʼel tnikʼ kyiʼj t-xnaqʼtzbʼil* Jehová,* ex kubʼ tnaʼn nim tzalajbʼil tuʼn tonbʼil espíritu santo, ex yolin ex xi tqʼoʼn xnaqʼtzbʼil toj tumel tiʼj Jesús, pero oʼkxtoq ojtzqiʼn bautismo tuʼn aju yolin Juan tiʼj.
26 Ex mintiʼ xobʼ Apolos tej tyolin toj ja te kʼulbʼil. Tej tok tbʼiʼn Priscila ex Áquila te, xi kyiʼn part ex e yolin tukʼil kyiʼj t-xnaqʼtzbʼil* Dios tuʼntzun tel mas tnikʼ tiʼj.
27 Ax ikx, tej tkubʼ t-ximen Apolos tuʼn t-xiʼ toj tnam Acaya, xi kytzʼibʼin erman te Éfeso kye erman te Acaya tuʼn tkubʼ kyyekʼin tbʼanel kymod tukʼil. Tej tpon Apolos Acaya, onin nim kyiʼj qeju otoq che okslan tuʼn t-xtalbʼil Dios.
28 Porke mintiʼ tzaj xobʼ Apolos tej t-xi tyekʼin kye xjal qa nya toj tumel kyxnaqʼtzbʼil judiy, ex xi tyekʼin kye tukʼil tyol Dios qa a Jesús Cristo.
