Hechos 20:1-38
20 Tbʼajlenxi jlu, e tzaj ttxkoʼn Pablo qe discípulo. Tej kybʼaj t-animarin ex tej tbʼaj yolin kyukʼil, etz ex xiʼ toj tnam Macedonia.
2 Yajxitl pon Grecia tej tbʼaj tbʼetin Macedonia ex tej tbʼaj t-animarin qe discípulo kyukʼil nim tyol.
3 Ex ax kyaj ten oxe xjaw. Pero tej chʼixtoq tjax toj jun bark tuʼn t-xiʼ toj tnam Siria, kubʼ kyximen judiy tuʼn tkubʼ kybʼyoʼn. Tuʼntzunju, kubʼ t-ximen tuʼn tmeltzʼaj toj Macedonia.
4 Kyxol qeju e xiʼ tukʼil, ten Sópater tkʼwal Pirro te Berea, Aristarco ex Segundo te Tesalónica, Gayo te Derbe, Timoteo, Tíquico ex Trófimo te Asia.
5 Pero e kubʼ nej qwitze ex e ayon qiʼje toj tnam Troas.
6 Ex tej tikʼ Fiesta tiʼj Pan Mintiʼ Levadura toj, o etze toj jun bark toj tnam Filipos ex tej tikʼ jweʼ qʼij kubʼ kyiʼj quʼne toj tnam Troas. Ex axtzun o kyaj tene siete qʼij.
7 Toj tnejel qʼij te seman, ok qchmon qibʼe tuʼn qwaʼne. Ex ok ten Pablo yolil kyukʼil qeju e pon, porke toj juntl qʼij kbʼeltoq bʼe tuʼn. Ex kukx yolin Pablo tej ttzaj a las 12 te qonikʼen.
8 Tuʼntzunju, attoq nim kandil toj kwart jatumel ok qchmon qibʼe, toj jun kwart toj toxin nivel.
9 Ex attoq jun kuʼxun Eutico tbʼi qʼuqli ttzi ventan, aju tzaj nim twatl tej in yolin Pablo. Tuʼnju ikʼ jtan, tzaj tzʼaq toj toxin nivel ex ya otoq kyim tej kypon keʼyilte.
10 Pero kuʼtz Pablo keʼyilte, kubʼ mutzeʼ tibʼaj ex jaw tchleʼn. Ex tqʼama jlu: «Miʼn che bʼisune, porke itzʼ taʼ».
11 Yajxitl jax Pablo, kubʼ tpiẍun pan ex xi tzyet tuʼn twaʼn. Ex kukx yolin tzmaxi tej qsqix, ex yajxitl ikʼ bʼet.
12 Atzunte kuʼxun, xi qʼiʼn kyuʼn xjal ex kubʼ kynaʼn nim tzalajbʼil porke itzʼtoq taʼ.
13 Ex o jaxe toj jun bark tuʼn qpone Asón, jatumel jaw qine Pablo. Porke tzaj tqʼamaʼn qeye qa tajbʼiltoq tuʼn tpon Asón tuʼn tqan.
14 Tuʼntzunju, tej tkubʼ qiʼje tuʼn* toj tnam Asón, jax qukʼile toj bark ex o xiʼye Mitilene.
15 Toj juntl qʼij, etz bark toj tnam Mitilene ex o weʼye twitz isla te Quíos. Toj juntl qʼij, o weʼye jun rat toj tnam Samos ex toj juntl qʼij o pone Mileto.
16 Kubʼ t-ximen Pablo tuʼn miʼn tikʼ toj tnam Éfeso tuʼntzun miʼn t-atrasarin toj txʼotxʼ te Asia, porke tajbʼiltoq tuʼn tpon Jerusalén, qa jakutoq bʼant, toj qʼij tej tok Fiesta te Pentecostés.
17 Pero tej attoq Pablo toj tnam Mileto, xi tsamaʼn junjun xjal toj tnam Éfeso txkol kye ansyan toj congregación.
18 Tej kypon ansyan tukʼil, xi tqʼamaʼn Pablo kye: «Ojtzqiʼn kyuʼne alkye nmode kubʼ nyekʼine kyxole atxix toj tnejel qʼij tej wule Asia.
19 Mintiʼ jaw nnimsan wibʼe tej wajbʼene te Qajaw ik tzeʼn jun majen, ex in noqʼe ex in nok weʼye kywitz prueba tej tkubʼ kyximen judiy tuʼn tkubʼ kybʼyoʼn qine.
20 Ex mintiʼ kubʼ nxkʼayin wibʼe tuʼn t-xi nqʼamaʼne aju at tajbʼen kyeye, ex tuʼn t-xi nqʼoʼne xnaqʼtzbʼil kyeye kywitz xjal ex ttziyele kyjaye.
21 Sino xi nqʼamaʼne klar wen kye judiy ex kye griego qa il tiʼj tuʼn tajtz tiʼj kyanmi ex tuʼn kymeltzʼaj tukʼil Dios, ex tuʼn tok qeʼ kykʼuʼj tiʼj Qajaw Jesús.
22 Pero jaʼlo ma chinxe Jerusalén, porke in tqʼamaʼn espíritu santo toj wanmiye qa il tiʼj tuʼn nxiʼye, maske mintiʼ bʼin wuʼne tiʼ kbʼajel atz.
23 Oʼkx bʼin wuʼne qa chin okex qʼoʼne toj cárcel ex qa chin okel weʼye twitz nya bʼaʼn aj wikʼe toj junjun tnam, porke kukx in tzaj tyekʼin espíritu santo jlu weye.
24 Pero nya mas nim toklen nchwinqlale toj nwitze, mas nim toklen toj nwitze tuʼn tjapun bʼaj wajbʼebʼile* ex tuʼn t-xi nchikʼbʼaʼne klar wen qe tbʼanel noticia tiʼj t-xtalbʼil Dios, aju aqʼuntl tzaj tqʼoʼn Qajaw Jesús weye.
25 Pero jaʼlo ojtzqiʼn wuʼne, aqeye in yoline tiʼj Tgobierno Dios kyukʼil, qa nijun kyxole kʼokel tkeʼyin juntl maj nwitze.
26 Tuʼntzunju, ma che tzaj ntxkoʼne, tuʼn tel kynikʼe tiʼj qa mintiʼ woklene tiʼj jun xjal qa ma kyim.*
27 Porke mintiʼ ma chin xobʼe tuʼn t-xi nqʼamaʼne kyeye tkyaqilju tvoluntad* Dios.
28 Kykeʼyinx kyibʼe ex kykeʼyinxe qe trit Dios, aju tzaj tlaqʼoʼn tuʼn tchkʼel Tkʼwal, porke ma tzaj qʼoʼn kyoklene tuʼn espíritu santo tuʼn kykubʼ neje kywitz ex tuʼn kyxqʼuqine kyiʼj* ik tzeʼn in bʼant tuʼn jun pastor.
29 Porke bʼin wuʼne qa aj wikʼe tzalu, che okex junjun xjal kyxole ik tzeʼn qe txʼuʼj xoʼj ex mlay kubʼ kyyekʼin kykʼujlabʼil kyiʼj rit.
30 Ax ikx kjawil kyin kyibʼ junjun xjal kyxole, aqeju kbʼajel kychʼexpuʼn xnaqʼtzbʼil noq tuʼn kyok lepeʼ discípulo kyiʼj.
31 Tuʼntzunju, che xqʼuqine ex kynaʼntze qa toj oxe abʼqʼi xi nqʼoʼne consej te teyele junjun kyeye. Qʼijtl ex qonikʼen in yoline kyukʼile ex etz taʼl nwitze.
32 Jaʼlo, che kjel nqʼoʼne toj tkwent Dios ex toj tkwent yol aju in yolin tiʼj t-xtalbʼil. Jaku tzʼonin yol lu kyiʼje tuʼn tten kyipumale ex jaku tzaj tqʼoʼn herencia kyeye junx kyukʼil qeju xjan qeʼ.
33 Mintiʼ o pon nkʼuʼje tiʼj tplata jun xjal, tiʼj t-oro nix tiʼj t-xbʼalun.
34 Ex ojtzqiʼn kyuʼne qa o chin aqʼunane tuʼn tkambʼet aju at tajbʼen weye ex kye qeju ateʼ wukʼile.
35 Toj tkyaqil ma txi nyekʼine kyeye qa il tiʼj tuʼn kyaqʼunane kyuw tuʼn kyonine kyiʼj qeju kyaj onbʼil. Ex miʼn tzikʼ tnaʼl kyuʼne aqeju yol lu tqʼama Qajaw Jesús: ‹At mas tzalajbʼil tuʼn t-xi qqʼoʼn chʼin kye txqantl twitzju tuʼn ttzaj kyqʼoʼn chʼin qe›».
36 Tej tbʼaj tqʼamaʼn Pablo jlu, kubʼ ẍmejeʼ kyukʼil ex ok ten naʼl Dios.
37 Entonces e jaw oqʼ kykyaqil, tzaj kychlen Pablo ex el kytzubʼan twitz tukʼil kʼujlabʼil.
38 Porke otoq tzaj nim kybʼis, mas tuʼnju xi tqʼamaʼn Pablo kye qa mlaytoq tzʼok kykeʼyin juntl maj. De último, e xiʼ wabʼil te tuʼn tjax toj bark.
