Hechos 19:1-41
19 Tej attoq Apolos toj tnam Corinto, ikʼ Pablo kyoj bʼe najchaq ateʼ tiʼj mar ex pon toj Éfeso. Toj tnam lu, e kanet junjun discípulo tuʼn
2 ex xi tqanin kye: «¿Tzajpe tqʼoʼn Dios espíritu santo kyibʼaje tej kyokslaʼne?». Atzun kye xi kytzaqʼweʼn te: «Bʼajx tzʼok qbʼiʼne qa at espíritu santo».
3 Xi tqanin Pablo kye: «Entonces, ¿tzeʼn e bautisarine?». Xi kytzaqʼweʼn te: «O bautisarine ik tzeʼn kyaj t-xnaqʼtzaʼn Juan».
4 Xi tqʼamaʼn Pablo kye: «E bautisarin xjal tuʼn Juan tuʼn tkubʼ kyyekʼin qa otoq tzʼajtz tiʼj kyanmi. Ex xi tqʼamaʼn kye xjal tuʼn kyokslaʼn tiʼjju lepchitz tiʼj, toj juntl yol, tiʼj Jesús».
5 Tej tok kybʼiʼn jlu, e bautisarin toj tbʼi Qajaw Jesús.
6 Ex tej tkubʼ tqʼoʼn Pablo tqʼabʼ kyibʼaj, kuʼtz espíritu santo kyibʼaj ex xi tzyet tuʼn kyyolin kyoj junjuntl yol ex tuʼn t-xi kyqʼamaʼn profecía.
7 Tuʼn kykyaqil, ten junlo 12 kybʼet.
8 Ex toj oxe xjaw, xiʼ Pablo toj ja te kʼulbʼil,* ex mintiʼ xobʼ tej tyolin ex tej tonin kyiʼj xjal tuʼn kyokslaʼn tiʼj Tgobierno Dios.
9 Pero kyxol xjal, e ten junjun kyuw kyanmi ex nyatoq kyaj tuʼn kyokslaʼn, ex e yolin nya bʼaʼn tiʼj tbʼe Qajaw kywitz txqantl. Tuʼntzunju, el tpan tibʼ Pablo kyiʼj ex xi tiʼn qe discípulo tukʼil. Ex tkyaqil qʼij, xi tqʼoʼn Pablo xnaqʼtzbʼil toj jun salón toj t-escuela jun xjal Tirano tbʼi.
10 Ex xi tqʼoʼn xnaqʼtzbʼil toj kabʼe abʼqʼi. Tuʼntzunju, kykyaqil xjal toj Asia ok kybʼiʼn tyol Qajaw, tanto qe judiy ex qe griego.
11 Ex kukx ajbʼen Pablo tuʼn Dios tuʼn kybʼant tbʼanel milagro tuʼn.
12 Ax ikx xi kyiʼn xjal qe suʼt ex qe gabacha ajbʼen tuʼn Pablo ex xi kyqʼoʼn kye xjal yabʼ ex bʼiʼx e bʼant, ex e jeʼtz demonio toj kyanmi.
13 Ex ateʼtoq junjun judiy in che bʼet expulsaril demonio noq jaxku tumel, ax ikx kyajbʼiltoq tuʼn tajbʼen tbʼi Qajaw Jesús kyuʼn tuʼn tex kylajoʼn demonio toj kyanmi xjal. Kyqʼama jlu: «In xi nqʼamaʼne kyeye toj tbʼi Jesús, aju in yolin Pablo tiʼj, tuʼn kyexe».
14 Atzun jlu bʼant kyuʼn siete tkʼwal jun nejenel kye pal judiy Esceva tbʼi.
15 Pero jun maj, xi ttzaqʼweʼn jun demonio kye: «Ojtzqiʼn Jesús wuʼne ex bʼiʼn wuʼne alkye Pablo. Yajtzun kyeye, ¿alkye qeye?».
16 Ex ok tzoqpaj xinaq* attoq demonio toj tanmi kyiʼj ex qʼojin kyukʼil tzmaxi tej tkubʼ kyiʼj kykyaqil tuʼn. Atzun kye, e jeʼtz oq toj ja mintiʼ kyxbʼalun ex otoq che bʼaj kʼixbʼi.
17 Ex ok kybʼiʼn kykyaqil aju otoq bʼaj, tanto qe judiy ex qe griego in che anqʼin toj Éfeso. Tuʼntzunju, tzaj nim kyxobʼil kykyaqil, ex mas ok qʼoʼn toklen tbʼi Qajaw Jesús.
18 Ex nim qe xjal otoq che okslan, e pon ex xi kyqʼamaʼn kywitz txqantl aju otoq bʼant kyuʼn.
19 Nya oʼkxju, ax ikx nim qe xjal e bʼinchan magia tnejel, tzaj kyiʼn kylibro ex kubʼ kypatin kywitz kykyaqil. Jaw kyiʼn tajlal twi ex japun te 50 mil monedas te plata.
20 Ex ok bʼiʼn tyol Jehová* kyoj mas lugar ex ok mas tipumal.
21 Tbʼajlenxi jlu, kubʼ t-ximen Pablo tuʼn t-xiʼ Jerusalén, pero tnejel tajbʼiltoq tuʼn tikʼ Macedonia ex Acaya. Ax ikx tqʼama: «Aj npone Jerusalén, ax ikx il tiʼj tuʼn nxiʼye Roma».
22 Tuʼntzunju, xi tsamaʼn Pablo kabʼe onilte toj tnam Macedonia, xi tsamaʼn Timoteo ex Erasto. Pero atzunte kyaj ten jteʼ qʼijtl toj Asia.
23 Toj ambʼil aju, e jaw tilj xjal toj tnam Éfeso tuʼn kypaj qeju e okslan tiʼj tbʼe Qajaw.
24 Ex attoq jun xjal Demetrio tbʼi, jun xinaq bʼinchal kyiʼj tal templo te plata ik tzeʼn templo te Ártemis. Ex kambʼet nim pwaq tuʼn kyukʼil txqantl tukʼil.
25 Entonces ok tchmoʼn Demetrio qe tukʼil ex qeju xi kybʼinchaʼn ax aqʼuntl ik tzeʼn kye, ex tqʼama: «Aqeye wukʼil, ojtzqiʼn kyuʼne qa nim ganancia in kambʼet quʼn tiʼj negocio lu.
26 Pero ik tzeʼn in nok kykeʼyine ex in nok kybʼiʼne jaʼlo, o kubʼ kykʼuʼj nim xjal tuʼn Pablo ex o chʼexpaj kyxim tuʼn, porke in xi tqʼamaʼn kye qa nya dios qeju dios bʼinchaʼn kyuʼn xjal. Ex nya oʼkx tzalu Éfeso, sino chʼixmi toj tkyaqil Asia.
27 Nya oʼkxju, ax ikx jaku che yolin xjal nya bʼaʼn tiʼj qaqʼunbʼen ex ya mlay tzʼok kyqʼoʼn toklen templo te Ártemis, aju diosa nimxix toklen. Knajel toklen Ártemis, aju in che kʼulin kykyaqil xjal te Asia twitz ex kykyaqil xjal twitz txʼotxʼ».
28 Tej tok kybʼiʼn xjal jlu, tzaj nim kyqʼoj, e jaw schʼin ex kyqʼama: «¡Nimxix toklen Ártemis, aju kydios xjal te Éfeso!».
29 Tuʼntzunju, e jaw tilj xjal toj tnam ex e okx ojqelan kykyaqil toj teatro, jawon Gayo ex Aristarco kyuʼn, kabʼe xjal te Macedonia e bʼet junx tukʼil Pablo.
30 Ex tajbʼiltoq Pablo tuʼn tokx yolil kyukʼil xjal, pero mintiʼ xi kyqʼoʼn discípulo ambʼil te.
31 Nya oʼkxju, ax ikx junjun encargado kyiʼj fiesta ex kyiʼj juego kyamiw kyibʼ tukʼil Pablo, xi kysamaʼn jun tqanil te ex e kubʼsan twitz tuʼn miʼn t-xiʼ toj teatro.
32 Ex otoq che el tzpet xjal ok kychmon kyibʼ. Ateʼ junjun kyqʼama jun yol, atzun junjuntl junxitl, porke nim qe kyxol nyatoq ojtzqiʼn kyuʼn tiquʼn otoq tzʼok kychmon kyibʼ.
33 Tuʼntzunju, xi kyqʼamaʼn junjun xjal te Alejandro tuʼn tjaw weʼ yolil, porke otoq txi lamoʼn kywitz xjal kyuʼn judiy. Xitzun tyekʼin Alejandro tqʼabʼ kye xjal tuʼn miʼn kyyolin porke tajbʼiltoq tuʼn tyolin.
34 Pero tej tel kynikʼ xjal tiʼj qa judiy, kykyaqil e jaw schʼin junx ex kyqʼama jlu toj kabʼe or: «¡Nimxix toklen Ártemis, aju kydios xjal te Éfeso!».
35 Tej tweʼ tuʼn kyschʼin xjal tuʼn nejenel toj tnam, xi tqʼamaʼn kye: «Aqeye xjal te Éfeso, ¿nyapetzun ojtzqiʼn kyuʼn kykyaqil xjal qa aju tnam Éfeso in xqʼuqin tiʼj templo te Ártemis, aju diosa nimxix toklen, ex tiʼj imagen kuʼtz tzʼaq twitz kyaʼj?
36 Ex nijun jaku txi qʼamante qa nya ax tok. Tuʼntzunju, miʼn che qʼajte ex miʼn kubʼ kybʼinchaʼne jun tiʼ naʼmxtoq kyximane tiʼj.
37 Porke aqeju xinaq ma che ul kyiʼne tzalu, mintiʼ in che elqʼan kyoj templo ex mintiʼ in che xmayin tiʼj qdios.
38 Tuʼntzunju, qa tajbʼil Demetrio ex qe txqantl tukʼil tuʼn kyqʼojin tukʼil jun xjal, ateʼqe qʼij in che jaqet tribunal ex ateʼqe gobernador. Ex jaku txi kyqʼamaʼn kye alkye nya bʼaʼn ma tzaj kyxol.
39 Pero qa in kubʼ kyximane juntl tiʼ, jaku kyaj bʼant tiʼj toj jun reunión.
40 Porke jaku tzaj nya bʼaʼn qiʼj tuʼnju ma bʼaj jaʼlo qa ma pon tqanil tukʼil gobierno ex qa ma kubʼ t-ximen qa in qo ok meltzʼaj tiʼj, porke mintiʼ jun tiquʼn tuʼn kyjaw tilj xjal».
41 Tej tbʼaj yolin, xi tqʼamaʼn kye xjal tuʼn kyetz.
