Hechos 14:1-28
14 Okxtzun Pablo ex Bernabé toj ja te kʼulbʼil* kye judiy toj tnam Iconio. Ex tuʼnju ajbʼen tbʼanel yol kyuʼn, e okslan nim xjal judiy ex griego.
2 Atzun kye judiy mintiʼ e okslan, bʼaj kytzpetsaʼn kynabʼil xjal nya judiy tuʼntzun kyqʼojin kyiʼj erman.
3 Tuʼntzunju, kyaj ten Pablo ex Bernabé nim ambʼil atz ex tzaj tqʼoʼn Jehová* kyipumal tuʼn miʼn kytzaj xobʼ tuʼn kyyolin. Ex tuʼnju e ajbʼen tuʼn tuʼn kybʼant milagro* ex qe tbʼanel bʼinchbʼen, el toj qʼanchaʼl qa ax tok tqanil e yolin tiʼj, aju tqanil tiʼj t-xtalbʼil.
4 Pero tzaj pabʼil kyxol xjal toj tnam, ateʼ junjun e ok lepeʼ kyiʼj judiy, atzun junjuntl kyiʼj apóstol.
5 Tuʼntzunju, kubʼ kyximen xjal nya judiy junx kyukʼil judiy ex qe gobernador kyxol tuʼn tok kybʼinchaʼn nya bʼaʼn tiʼj Pablo ex Bernabé, ex tuʼn tok kyxoʼn abʼj kyiʼj.
6 Tej tok tbʼiʼn Pablo ex Bernabé jlu, e xi oq toj tnam Listra ex Derbe, toj txʼotxʼ te Licaonia, ex kyoj junjuntl lugar tok kyiʼjele.
7 Ex kukx e yolin kyiʼj tbʼanel noticia atz.
8 Toj tnam Listra, attoq jun xinaq* mintiʼ in bʼant tbʼet. Bʼajxtoq bʼet porke kox titzʼjlenx. Qʼuqlitoq xinaq lu,
9 ex in bʼintoq tiʼj Pablo tej in yolin. Xi tkeʼyin Pablo xinaq ex el tnikʼ tiʼj qa ok qeʼ tkʼuʼj tiʼjju tqʼama ex qa jakutoq bʼant.
10 Tuʼntzunju, xi tqʼamaʼn te tukʼil tqʼajqʼajel twiʼ: «Weʼktza». Jawtzun tʼikpaj xinaq ex xi tzyet tuʼn tbʼet.
11 Tej tok kykeʼyin xjal aju bʼant tuʼn Pablo, e jaw schʼin toj yol licaónica ex kyqʼama: «¡Ma che kʼul dios qxol, ik che keʼyin ik tzeʼn qe xjal!».
12 Tuʼntzunju ok kyqʼoʼn xjal tbʼi Bernabé te Zeus, atzunte Pablo Hermes tuʼnju atoq mas in yolin.
13 Ex tzaj tiʼn pal ajbʼen toj templo te Zeus junjun wakx ex bʼech* ttzi tnam, porke tajtoq tuʼn tkubʼ tqʼoʼn sacrificio twitz Pablo ex Bernabé junx kyukʼil xjal. Ex atztoq taʼ templo te Zeus ttzi tnam Listra.
14 Tej tok tbʼiʼn Bernabé ex Pablo* jlu, el kylaqun kyxbʼalun, e okx ojqelan kyxol xjal ex tukʼil tqʼajqʼajel kywiʼ kyqʼama jlu:
15 «Aqeye xinaq, ¿tiquʼn in kybʼinchaʼne jlu? Ax ikx qeye, xjal qoʼye ik tzeʼn kyeye. Ex in qo yoline kyiʼj tbʼanel noticia kyukʼile tuʼntzun tkyaj kytzaqpiʼne tuʼn kykʼuline kywitz qe tiʼ mintiʼ kyajbʼen ex tuʼn kykʼuline twitz Dios itzʼ, aju kubʼ bʼinchante kyaʼj, txʼotxʼ, ex mar, ex tkyaqilju at kyoj.
16 Toj ambʼil ojtxe, xi tqʼoʼn Dios ambʼil tuʼn t-xi kybʼinchaʼn xjal alkyexku kyajbʼil.
17 Maske ikju, kubʼ tyekʼin alkyetoq tej ttzaj tqʼoʼn aju bʼaʼn kye. Tzaj tqʼoʼn jbʼal kyibʼaj, chmet nim twitz kyawal, tzaj tqʼoʼn kywa ex noj toj kyanmi tuʼn tzalajbʼil tuʼn».
18 Maske xi kyqʼamaʼn apóstol tkyaqil jlu kye xjal, peni kubʼ tiʼj kykʼuʼj kyuʼn tuʼn miʼn tkubʼ kyqʼoʼn sacrificio kywitz.
19 E pontzun junjun judiy te Antioquía ex te Iconio ex kyqʼama nya ax tok yol tiʼj Pablo tuʼntzun ttzaj kyqʼoj xjal tiʼj. Tuʼntzunju ok kyxoʼn xjal abʼj tiʼj ex tuʼnju kubʼ kyximen qa ya otoq kyim, ex kyjawoʼn tiʼjxi tnam.
20 Pero tej tok kychmon kyibʼ discípulo tiʼj, jaw weʼ ex okx toj tnam. Toj juntl qʼij, xiʼ toj tnam Derbe junx tukʼil Bernabé.
21 Tej tbʼaj kyqʼamaʼn tbʼanel noticia toj tnam lu ex tej kyonin kyiʼj nim xjal tuʼn kyok te discípulo, e meltzʼaj juntl maj toj tnam Listra, Iconio ex Antioquía te Pisidia.
22 Kyoj tnam lu, e onin kyiʼj discípulo tuʼn kyweʼxix toj kyokslabʼil ex xi kyqʼamaʼn kye: «Il tiʼj tuʼn qikʼ toj nim sufrimiento tuʼntzun qokx toj Tgobierno Dios».
23 Ax ikx xi kyqʼoʼn kyoklen junjun xinaq te ansyan toj teyele junjun congregación. E naʼn Dios ex e ayunarin, ex yajxitl e kyaj kyqʼoʼn toj tkwent Jehová,* aju otoq che okslan tiʼj.
24 Yajxitl, e ikʼx toj tnam Pisidia tuʼn kypon Panfilia.
25 Ex tej kybʼaj yolin tiʼj tyol Dios toj tnam Perga, e xiʼ toj tnam Atalia.
26 Toj tnam Atalia, e jax toj jun bark tuʼn kymeltzʼaj toj Antioquía te Siria, jatumel otoq che kubʼsan erman twitz Dios tuʼn tkubʼ tyekʼin t-xtalbʼil kyiʼj tuʼn tkyaj bʼant aqʼuntl kyuʼn aju tzmatoq in kyaj bʼant kyuʼn.
27 Tej kypon, ok kychmoʼn qe erman ex xi kyqʼamaʼn kye tkyaqilju otoq bʼant tuʼn Dios tuʼn kyaqʼunbʼen. Ax ikx xi kyqʼamaʼn kye qa otoq txi tqʼoʼn Dios ambʼil kye txqantl nasyon tuʼn kyokslaʼn.
28 Tuʼntzunju, e kyaj ten nim ambʼil kyukʼil discípulo.
