Hechos 11:1-30
11 Ex ok kybʼiʼn apóstol ex qe erman ateʼ toj Judea qa xi kyokslaʼn xjal te junjuntl tnam tyol Dios.
2 Tuʼntzunju, tej tpon Pedro toj Jerusalén, e ok ten xjal in che kolin tiʼj circuncisión qʼojil tukʼil.
3 Xi kyqʼamaʼn te: «¿Tiquʼn ma tzʼokxa toj kyja xjal nya judiy* ex ma waʼna junx kyukʼil?».
4 Xitzun tqʼamaʼn Pedro kye tkyaqilju otoq bʼaj. Tqʼama jlu:
5 «Tej in chin naʼne Dios toj tnam Jope, ok nkeʼyine jun witzikʼ. Wile qa kuʼtz toj kyaʼj jun tiʼ ik keʼyin ik tzeʼn jun matij* sábana te lino, tzyuʼn qe kyaje ttxaʼn, ex kʼuʼl nwitze.
6 Tej t-xi nkeʼyine, e wile txkup kyaje kyqan wal qe tibʼaj, qe txkup in xi kyjakʼun kykʼuʼj, qe pájaro ex qe txqantl txkup.
7 Ax ikx ok nbʼiʼne qe yol lu: ‹¡Pedro, weʼktza. Bʼyonkuya qe txkup lu te tchiʼya!›.
8 Pero xi ntzaqʼweʼne te: ‹Mlay, Tat, porke bʼajx txi nchyoʼne jun tiʼ tzʼil moqa nya bʼaʼn›.
9 Entonces ok nbʼiʼne juntl maj qa tzaj yolin toj kyaʼj ex tqʼama: ‹Miʼn tzʼok tqʼoʼna te tzʼil aju ma bʼaj tlimpiarin Dios›.
10 Ex tej ttzaj yolin toxin maj, xi qʼiʼn tkyaqil toj kyaʼj.
11 Tej tbʼaj jlu, cabal e pon oxe xinaq* jyol weye toj ja jatumel o kyaj tene, otoq che tzaj samaʼn tzmax toj Cesarea.
12 Tzaj tqʼamaʼn espíritu santo weye tuʼn miʼn ntzaj xobʼe tuʼn nxiʼye kyukʼil. Ax ikx, e xiʼ seis erman lu wukʼile ex qkyaqile o qo okxe toj tja jun xinaq.
13 Tzaj tqʼamaʼn xinaq qeye qa otoq tzʼok tkeʼyin jun anjel toj tja ex qa xi tqʼamaʼn jlu te: ‹Samanxa junjun xjal toj tnam Jope txkolte Simón, aju ax ikx ojtzqiʼn ik tzeʼn Pedro.
14 Ex tzul tqʼamaʼn teya tiʼ kbʼantel tuʼna tuʼn tkleta ex tuʼn kyklet toj tjaya›.
15 Pero tej tzmatoq in chin yoline, kuʼtz espíritu santo kyibʼaj ik tzeʼn kuʼtz qibʼaj tnejel.
16 Tej tbʼaj jlu, tzaj nnaʼne aju in tqʼamaʼntoq Qajaw: ‹E bautisarin xjal tuʼn Juan toj aʼ, atzun kyeye che bautisarile tuʼn espíritu santo›.
17 Tuʼntzunju, qa ma txi tqʼoʼn Dios oyaj lu kye ik tzeʼn tzaj tqʼoʼn qe porke ok qeʼ qkʼuʼj tiʼj Qajaw Jesucristo, ¿tiʼtzun woklene at tuʼn t-xi nqʼamaʼne te Dios tuʼn miʼn t-xi tbʼinchaʼn aju tajbʼil?».*
18 Tej tok kybʼiʼn jlu, ya mintiʼ jun tiʼ xi kyqʼamaʼn ex xi tzyet tuʼn tjaw kynimsaʼn Dios. Ex kyqʼama: «¡Qʼanchaʼlxix taʼ qa ax ikx tajbʼil Dios tuʼn tajtz tiʼj kyanmi xjal te junjuntl tnam ex tuʼn tten kychwinqlal!».
19 Atzun kye discípulo e jel oq tuʼn tpaj nya bʼaʼn ok bʼinchaʼn kyiʼj tej tkubʼ bʼyoʼn Esteban, e pon tzmax toj tnam Fenicia, Chipre ex Antioquía. Ex oʼkx e yolin kyiʼj tbʼanel noticia kyukʼil judiy.
20 Pero toj tnam Antioquía, e pon junjun discípulo te Chipre ex te Cirene, ex e ok ten yolil kyukʼil xjal in che yolin toj griego ex xi kyqʼamaʼn tbʼanel noticia tiʼj Qajaw Jesús kye.
21 Ten tipumal Jehová* kyukʼil, ex nim qe xjal e okslaʼn ex e ok lepeʼ tiʼj Qajaw.
22 Tej tok kybʼiʼn erman toj congregación te Jerusalén jlu, xi kysamaʼn Bernabé toj tnam Antioquía.
23 Tej tpon Bernabé ex tej tok tkeʼyin qa kubʼ tyekʼin Dios t-xtalbʼil kyiʼj discípulo, jaw tzalaj ex xi tqʼamaʼn kye kykyaqil tuʼn kukx kynimen te Qajaw tuʼn tkyaqil kyanmi.
24 Porke jun tbʼanel xjaltoq Bernabé, ok qeʼ tkʼuʼj tiʼj Dios ex nojni toj tanmi tuʼn espíritu santo. Tuʼntzunju, nim qe xjal e okslan tiʼj Qajaw.
25 Yajxitl xiʼ Bernabé jyolte Saulo toj tnam Tarso tzmaxi tej tkanet tuʼn.
26 Tej tkanet tuʼn, xi tiʼn toj tnam Antioquía. Ex toj jun abʼqʼi, ok kychmon kyibʼ kyukʼil erman toj congregación ex xi kyqʼoʼn xnaqʼtzbʼil kye nim xjal. Ex atz toj tnam Antioquía ok qʼoʼn kybʼi discípulo tnejel maj te cristiano,* ik tzeʼn tvoluntad Dios.
27 Kyoj qʼij aju, e kuʼtz junjun profeta toj Jerusalén tuʼn kypon toj tnam Antioquía.
28 Kyxol, ten jun profeta Ágabo tbʼi. Jaw weʼ ex tzaj tqʼamaʼn tuʼn tonbʼil espíritu santo qa tzultoq nim weʼyaj twitz tkyaqil txʼotxʼ. Ex bʼaj jlu toj tqʼijlalil Claudio.
29 Tuʼntzunju, kubʼ kyximen discípulo tuʼn t-xi kysamaʼn onbʼil kye erman in che anqʼin toj Judea, ik tzeʼn jakutoq bʼant tuʼn t-xi kyqʼoʼn teyele junjun kye.
30 Ex atzun jlu bʼant kyuʼn, jaw kychmoʼn onbʼil ex xi kyqʼoʼn te Bernabé ex Saulo tuʼn t-xi kyiʼn ex tuʼn t-xi kyqʼoʼn kye ansyan.
