တၢ်မၤလိ ၁
ကစၢ်ယွၤတ့လီၤ မူခိၣ်ဒီးဟီၣ်ခိၣ်
ယဟိဝၤယွၤမ့ၢ်ပတၢ်ဘၣ်တ့ကစၢ်လီၤ. တၢ်လၢပထံၣ်အီၤလၢ ပမဲာ်ချံသ့မ့ၢ်ဂ့ၤဒီး တၢ်လၢပထံၣ်အီၤလၢ ပမဲာ်ချံတသ့မ့ၢ်ဂ့ၤ ကစၢ်ယွၤတ့လီၤဝဲခဲလၢာ်လီၤ. တချုးလၢကစၢ်ယွၤတ့လီၤ တၢ်လၢပထံၣ်အီၤလၢပမဲာ်ချံ သ့န့ၣ် အဝဲတ့လီၤဆိဝဲမူခိၣ်ကလူးတဖၣ်လီၤ. မူခိၣ်ကလူးတဖၣ် မ့ၢ်ပှၤဒ်လဲၣ်န့ၣ် မ့ၢ်နသ့ၣ်ညါဧါ. မူခိၣ်ကလူးတဖၣ်အံၤ မ့ၢ်ပှၤနီၢ်သးဖိဒ် ယဟိဝၤယွၤအသိးလီၤ. ဒ်ပထံၣ်ကစၢ်ယွၤတသ့အသိး မူခိၣ်ကလူးစ့ၢ်ကီး ပထံၣ်အဝဲသ့ၣ်တသ့ဘၣ်. မူခိၣ်ကလူးအဆိကတၢၢ်တဂၤလၢ ယဟိဝၤယွၤတ့လီၤဝဲန့ၣ် ကဲထီၣ် အပှၤမၤစၢၤတၢ်ဖိတဂၤလီၤ. ဖဲယဟိဝၤယွၤတ့လီၤ ဆၣ်တဖၣ်, ဟီၣ်ခိၣ်ဖျၢၣ်တဖၣ်ဒီး တၢ်အဂၤတဖၣ်အခါ မူခိၣ်ကလူးတဂၤအံၤ မၤစၢၤအီၤလီၤ. ကစၢ်ယွၤတ့လီၤဝဲ ဟီၣ်ခိၣ်လၢအဃံအလၤတဖျၢၣ်အံၤဒ်သိး ပှၤဟီၣ်ခိၣ်ဖိကအိၣ်ဝဲအဂီၢ်လီၤ.
ဝံၤဒီးယဟိဝၤယွၤ ကတဲာ်ကတီၤပာ်ဝဲဟီၣ်ခိၣ်အံၤ ဒ်သိးဆၣ်ဖိကီၢ်ဖိ ဒီးပှၤဟီၣ်ခိၣ်ဖိတဖၣ် အိၣ်ဝဲလၢအပူၤကသ့အဂီၢ်လီၤ. ဒီးကစၢ်ယွၤတ့လီၤမုၢ်လၢ ကဟ့ၣ်ထီၣ်တၢ်ကပီၤလၢ ဟီၣ်ခိၣ်ချၢလီၤ. ကစၢ်ယွၤတ့လီၤစ့ၢ်ကီး ကစၢၢ်, ပီၣ်လဲၣ်ဒီး ထံကျိတဖၣ်လီၤ.
ကစၢ်ယွၤတ့လီၤဒံး တၢ်မနုၤလဲၣ်. ယဟိဝၤယွၤတဲဝဲလၢ– ‘ယကတ့လီၤနီၣ်, တၢ်မုၢ်တၢ်ဘိဒီး သ့ၣ်ထူၣ်ဝၣ်ထူၣ်တဖၣ်လီၤ.’ ယဟိဝၤယွၤတ့လီၤဝဲ သ့ၣ်သူဝၣ်သၣ်အကလုာ်ကလုာ်, တၢ်ဒိးတၢ်လၣ်အကလုာ်ကလုာ်ဒီး ဖီအကလုာ်ကလုာ်လီၤ. လၢခံ ယဟိဝၤယွၤတ့လီၤဝဲ ဆၣ်ဖိကီၢ်ဖိတဖၣ်လီၤ. ဆၣ်ဖိကီၢ်ဖိတနီၤန့ၣ် ယူၤလၢတၢ်ဖးဖီ, တနီၤန့ၣ်အိၣ်လၢထံကျါဒီး အဂၤတနီၤန့ၣ် အိၣ်လၢဟီၣ်ခိၣ်လိၤလီၤ. ကစၢ်ယွၤတ့လီၤဝဲ ဆၣ်ဖိကီၢ်ဖိလၢအဆံး ဒ်သိးဒီးပဒဲတဖၣ်, ဒီးဆၣ်ဖိကီၢ်ဖိလၢအဒိၣ် ဒ်သိးဒီးကဆီတဖၣ်န့ၣ်လီၤ. ဆၣ်ဖိကီၢ်ဖိလၢ နအဲၣ်အီၤဒိၣ်ကတၢၢ်န့ၣ် မ့ၢ်မနုၤလဲၣ်.
ဝံၤဒီး ယဟိဝၤယွၤတဲဘၣ် မူခိၣ်ကလူးအဆိကတၢၢ်တဂၤလၢ– “မ်ပတ့လီၤပှၤကညီ” တက့ၢ်. ပှၤဟီၣ်ခိၣ်ဖိန့ၣ် လီၤဆီဒီးဆၣ်ဖိကီၢ်ဖိတဖၣ်လီၤ. အဝဲသ့ၣ်အိၣ်ဒီးတၢ်သ့တၢ်ဘၣ် အါန့ၢ်ဒံးဆၣ်ဖိကီၢ်ဖိတဖၣ်လီၤ. အဒိ ပှၤဟီၣ်ခိၣ်ဖိန့ၣ် တဲတၢ်, နံၤ ဒီးဃ့ဘါထုကဖၣ်တၢ်သ့ဝဲလီၤ. အဝဲသ့ၣ်ဘၣ်ကွၢ်ထွဲဝဲ ဟီၣ်ခိၣ်ဒီးဆၣ်ဖိကီၢ်ဖိတဖၣ်ပှၤဟီၣ်ခိၣ်ဖိအဆိကတၢၢ်တဂၤန့ၣ် မ့ၢ်မတၤတဂၤလဲၣ်. မ့ၢ်နသ့ၣ်ညါဧါ. တၢ်မၤလိလၢခံတခါန့ၣ် ပကတဲသကိးတၢ်ဂ့ၢ်အံၤလီၤ.
လီၤ.“လၢထံးလၢသီန့ၣ် ယွၤတ့လီၤမူခိၣ်ဒီးဟီၣ်ခိၣ်လီၤ.”—၁ မိၤၡ့ ၁:၁