Omayeletumbulo 11:1-31
11 Oshiyelekifo shoukengeleledi* oshi li oshinima shitondifa kuJehova,Ashike oshiyelekifo sha yuka* ohashi mu hafifa.+
2 Ngeenge ounhwa owe uya, ohoni otai shikula ko,+Ashike ounongo ou li povalininipiki.+
3 Oudiinini wovayuki oo hau va wilike,+Ashike oukengeleledi wovanamakoto ohau va hanauna po.+
4 Emona* itali ka eta ouwa washa mefiku lehandu,+Ndele ouyuki oo tau ka xupifa mefyo.+
5 Ouyuki waao ehe na ondjo ohau yukililifa elila laye,Ndele omukolokoshi ota ka punduka omolwoukolokoshi waye mwene.+
6 Ouyuki wovayuki otau va xupifa,+Ndele ovakengeleledi otava ka yulwa komahalo avo vene.+
7 Ngeenge omukolokoshi a fi, eteelelo laye ohali xulu po;Nelineekelo laye, olo la kanghamena keenghono daye, ohali xulu po yo.+
8 Omuyuki oha xupifwa mo moudjuu,Ndele omukolokoshi oha mono oixuna omolwoudjuu oo.+
9 Okanya komushunimonima* otaka nyono po mukwao,Ndele ovayuki otava xupifwa omolweshiivo.+
10 Ouwa wovayuki ohau hafifa oshilando,Nongeenge omukolokoshi okwa xulu po, ohapa kala ehafo linene.+
11 Omolwenangeko noupuna lovayuki, oshilando ohashi tumbalekwa,+Ndele okanya kovakolokoshi ohake shi teyaula po.+
12 Omunhu oo ehe na eendunge* okwa dina* mukwao,Ndele omunhu oo e na shili eendunge dokuyoolola oha kala a ngungumana.+
13 Omulundili oha holola oiholekwa,+Ndele omunhu oo e shii okulineekelwa* oha kala e i mwenena.*
14 Ngeenge kape na ewiliko lopandunge,* ovanhu tava mono oixuna,Ndele apa pe na ovayandjimayele* vahapu, oinima otai ende nawa.*+
15 Keshe oo ta ane a kalele po omukuli* womunailongo ote litwala moupyakadi,+Ndele oo ha henuka* okuninga eudafano la tya ngaho ote lixupifa moudjuu.
16 Omukainhu muwa oha kongo efimano,+Ashike ovalumenhu ovakwanyanya ohave likufile oupuna.
17 Omunanghenda* ohe lietele ouwa,*+Ashike omukwanyanya ohe lietele oupyakadi.*+
18 Omukolokoshi oha mono ondjabi yoipupulu,+Ashike omunhu oo ha kunu ouyuki oha mono ondjabi yashili.+
19 Ou ta diinine ouyuki oku li mondjila yomwenyo,+Ndele ou ta longo owii oku li mondjila yefyo.
20 Ovo ve na omutima u na omakoto ove li oshinima shitondifa kuJehova,+Ndele ava vehe na ondjo otave mu hafifa.+
21 Shilipalekwa kutya:* Omukolokoshi ita kala ina handukilwa,+Ashike ovana vomuyuki itava ka handukilwa.
22 Ngaashi olinga yoshingoli i li meyulu loshingulu,Omukainhu muwa, ndele oku tonde eendunge, naye osho e li.
23 Ehalo lomuyuki otali etifa ouwa,+Ashike eteelelo lomukolokoshi otali etifa ehandu.
24 Omunhu, oo ha yandje nehalo liwa,* ota ka kala e na shihapu;+Ndele oo muluva ota ka ninga omufyoona.+
25 Omunhu* oo ha yandje nehalo liwa ota ka punapala,*+Naao ha tulumukifa* vamwe ota ka tulumukifwa.+
26 Ovanhu otava ka finga oo ha anyene oilya,Ndele otava ka nangeka noupuna oo he i landifa.
27 Omunhu oo mudiinini mokulonga ouwa ota kongo okufilwa onghenda,+Ndele omunhu oo ta kongo owii otau ke mu hanga filufilu.+
28 Oo te lineekele momamona aye ota ka punduka,+Ndele omuyuki ota ka hapa ngaashi omafo omuti.+
29 Keshe oo ha eta oupyakadi* meumbo laye ota ka fyuulula omhepo,+Nelai otali ka ninga omupiya womunaendunge.
30 Oshiimati shomuyuki osho omuti womwenyo,+Naao ta likola eemwenyo* omunaendunge.+
31 Ngeenge omuyuki, oo e li kombada yedu, ota pewa shili ondjabi,Mbela ongahelipi shi na sha nomukolokoshi nosho yo omulunde?+
Omashangelo opedu
^ Ile “oshiyelekifo shemanya le lixwa po.”
^ Ile “shoipupulu.”
^ Ile “Oinima yongushu.”
^ Ile “komuhenakalunga.”
^ Eln., “a pumbwa omutima.”
^ Ile “oku tonde.”
^ Eln., “oo omudiinini momhepo.”
^ Eln., “oha tuvikile oshinima.”
^ Ile “epukululo liwa.”
^ Ile “ovapukululi.”
^ Ile “ope na exupifo.”
^ Eln., “e tonde.”
^ Ile “ta yandje eshilipaleko.”
^ Ile “Omunhu e na ohole i na oudiinini.”
^ Ile “oha ningile omwenyo waye ouwa.”
^ Ile “ohoni.”
^ Eln., “Eke neke.”
^ Eln., “andjakaneke.”
^ Ile “Omwenyo.”
^ Eln., “ota ka ondoka.”
^ Eln., “ha yandje omeva oshali.”
^ Ile “ohoni.”
^ Tala Omafatululo oitya.
