Omayeletumbulo 20:1-30
20 Omaviinyu oo omusheki, oikolwifa ohai ningifa vamwe va kale vehe na elipangelo;Nakeshe oo ta kolwa kuyo ke na eendunge.
2 Okutila* ohamba oku li ngaashi onghoshi* tai kumbu;Keshe oo te i handukifa ota tula omwenyo waye moshiponga.
3 Omunhu oo iha kufa ombinga meenhamanana okwa wana okufimanekwa,Ndele elai keshe otali ka kufa ombinga meenhamanana.
4 Omukwandede iha longo sha pokufu,Onghee oha ka ehela pefimbo leteyo, eshi ehe na sha.*
5 Omadiladilo* omomutima womunhu oku li ngaashi omeva e li moule,Ndele omunhu oo e na eendunge dokuyoolola, ote a teke mo.
6 Ovanhu vahapu ohava ti kutya ove na ohole i na oudiinini,Ndele mbela olyelye ta dulu okumona omunhu omudiinini?
7 Omuyuki oha kanyatele oudiinini waye.
Ovana* vaye, ovo tave mu shikula, otava kala va hafa.
8 Ngeenge ohamba oya kala kolukalwapangelo i tokole,Ohai didilike mo owii aushe nomesho ayo.
9 Olyelye ta dulu okutya: “Onda koshola omutima wange;Onda yela komatimba ange”?
10 Oiyelekifo inai yuka noyoipupulu*— Aishe oi li oshinima shitondifa kuJehova.
11 Nokuli nokaana* oke shiivike omolweenghatu dako,Kutya elihumbato lako oliwa nola yuka.
12 Omatwi haa udu ko, nomesho haa mono ko;Aishe oya shitwa kuJehova.
13 Ino kala u hole eemhofi, opo uha ninge omufyoona.
Penduka, noto ka kutifwa komungome.
14 Omulandi ota ti: “Kashiwa, kashiwa!”Opo nee ota i note ke litanga.
15 Ope na oshingoli nomamanya eekorali* mahapu,Ndele omilungu daao e na eshiivo odo oshinima shi na ondilo.
16 Oto dulu okukufa ko oshikutu shaao a anena omunailongo, oo e mu pa eendjo;Kufa ko sha kuye onga eshilipaleko, ngeenge okwa ya meenghundafana nomukainhu omuhaeli.*
17 Omungome wa likolwa moukengeleledi omuwa komunhu,Ndele konima yaasho, okanya kaye otaka ka kala ke yadi omadu.
18 Apa pe na eenghundafana,* eemhangela otadi wanifwa,*Nongeenge to i koita, owa pumbwa ewiliko lopandunge.
19 Omulundili oha holola oiholekwa;Ino endafana naao e hole olwaambo.*
20 Keshe oo ta tuku xe nosho yo ina,Olamba yaye otai ka dima, ngeenge omilaulu ode uya.
21 Efyuululo la monika tete omolwolwishoItali ka eta enangeko noupuna pexulilo.
22 Ino tya: “Ohandi ka shunifa owii!”
Lineekela muJehova, note ke ku xupifa.
23 Oiyelekifo inai yuka* oi li oshinima shitondifa kuJehova,Noiyelekifo youkengeleledi kaiwa.
24 Eenghatu domunhu ohadi wilikwa kuJehova;Ongahelipi omunhu ta dulu okuuda ko ondjila yaye?*
25 Oshi li omwiyo komunhu okuyapulila Kalunga oshali meendelelo,
Nota ka diladila ashike lwanima eano olo a ninga.
26 Ohamba inaendunge ohai kufa mo ovakolokoshiNohai alangatifa elola loshilei* kombada yavo.
27 Okupopya* kwomunhu oku li ngaashi olamba yaJehova,Otaku holola osho shi li meni laye.
28 Ohole i na oudiinini nosho yo oulineekelwa otai amene ohamba;Omolwohole i na oudiinini otai kaleke po olukalwapangelo layo.
29 Efimano lovanyasha olo eenghono davo,Newapalo lovanamido olo eenghwakutoka davo.
30 Omadidimika noipute ohai tu kwafele tu efe po owii,Nomadengo ohaa koshola meni lomunhu.
Omashangelo opedu
^ Ile “Oumbada wokutila.”
^ Ile “onghoshi yondume yonyasha.”
^ Ile tashi dulika, “Oha ka konga pefimbo leteyo, ndele iha mono sha.”
^ Ile “Omahalo.” Eln., “Omayele.”
^ Eln., “Ovanamati.”
^ Ile “Oiyelekifo yomamanya ivali ya yoolokafana nosho yo oiyelekifo yoikwatelwa ivali ya yoolokafana.”
^ Ile “nokamati.”
^ Tala Omafatululo oitya.
^ Eln., “nomukainhu omunailongo.”
^ Ile “omayele.”
^ Ile “pamekwa.”
^ Ile “naao ha pukifa nomilungu daye.”
^ Ile “Oiyelekifo yomamanya ivali ya yoolokafana.”
^ Ile “ondjila oyo e na okuya nayo.”
^ Ile “oiti yokuxwifa.”
^ Eln., “Omufudo.”
