Evaengeli paMateus 7:1-29
7 “Efeni po okutokola vakweni,+ opo nanye muha tokolwe;
2 osheshi etokolo olo tamu va tokolifa olo tamu ka tokolifwa,+ noshiyelekifo osho tamu yelekifa, osho tamu ka yelekifwa nasho.+
3 Ndele omolwashike u wete okambodi ke li meisho lomumwaxo, ndele ku wete endangalati olo li li meisho loye?+
4 Ile ongahelipi to dulu okulombwela omumwaxo kutya, ‘Handi uya ndi kufe mo okambodi meisho loye,’ ofimbo ove u na endangalati meisho loye?
5 Omunaihelele ove! Kufa mo tete endangalati olo li li meisho loye, opo u mone nawa nghee to dulu okukufa mo okambodi meisho lomumwaxo.
6 “Osho shiyapuki inamu shi yandja keembwa, noilanda yeni inamu i yandja koingulu,+ opo ihe i lyate nomakondo ayo, ndele tai mu pilukile po noku mu monifa oshiponga.
7 “Twikileni okwiindila, opo nee otamu pewa;+ twikileni okukonga, opo nee otamu mono; twikileni okukonghola, opo nee otamu yeululwa.+
8 Osheshi keshe ou ta indile ota pewa,+ nakeshe ou ta kongo ota mono, naau ta konghola ota yeululwa.
9 Ndele olyelye womunye ngeenge omona te mu indile omungome, te ke mu pa emanya?
10 Ile ngeenge te mu indile oshi, mbela ote ke mu pa eyoka?
11 Onghee hano ngeenge nye ovalunde, ndele omu shii okupa ovana veni oinima iwa, mbela Xo yeni womeulu ita ka yandja tuu oinima ihapu iwa+ kwaavo tave mu indile!+
12 “Ndele keshe osho mwa hala ovanhu ve mu ningile, osho nanye mu na oku va ningila.+ Osheshi eshi osho lela Omhango nOvaprofeti tava ti.+
13 “Piteni moshivelo sha finana,+ osheshi oshivelo shinene nondjila ya mbwalangadja otai twala mehanauno, naava tava ende mo ovahapu;
14 ofimbo oshivelo shinini nondjila ya finana otai twala komwenyo waalushe, naava tave i mono ovanini.+
15 “Lungameni ovaprofeti ovanaipupulu+ ovo have uya kunye ve li moikafa yeedi,+ ndele meni lavo omambungu* haa lyana.+
16 Otamu va koneke koiimati yavo. Mbela ovanhu ohava likola omandjebele, ile eenghwiyu komano?+
17 Sha faafana, omuti keshe muwa ohau ima oiimati iwa, ndele omuti keshe mwii ohau ima oiimati ii.+
18 Omuti muwa itau dulu okwiima oiimati ii, nomuti mwii itau dulu okwiima oiimati iwa.+
19 Omuti keshe oo ihau ima oiimati iwa otau kewa po, ndele tau ekelwa momundilo.+
20 Onghee hano ovalumenhu ovo otamu va koneke koiimati yavo.+
21 “Hakeshe umwe ou ta ti kwaame, ‘Omwene, Omwene,’ ta ka ya mOuhamba womeulu, ndele ou ha longo ehalo laTate womeulu oye ashike ta i mo.+
22 Mefiku olo vahapu otava ka tya kwaame: ‘Omwene, Omwene,+ hafye twa li hatu xunganeke medina loye, twa taataa mo eendemoni medina loye notwa longa oilonganghono ihapu medina loye?’+
23 Ndele ohandi ke va lombwela kutya: ‘Kandi mu shii nandenande! Djeni po pwaame, ovalongi vowii nye!’+
24 “Onghee hano keshe ou ta udu eendjovo edi dange, ndele te di wanifa, ota kala a fa omulumenhu omunaendunge oo a tungila eumbo laye kemanya.+
25 Nodula oya loka neenghono, nefundja ole uya, nomhepo inene oya pepa noye lidenga meumbo olo, ndele inali teka po, molwaashi ola tungilwa kemanya.
26 Kakele kaasho, keshe ou ta udu eendjovo dange, ndele ite di wanifa, ota ka kala ngaashi omulumenhu ehe na eendunge oo a tungila eumbo laye pehenge.+
27 Ndele odula oya loka neenghono, nefundja ole uya, nomhepo inene oya pepa noye lidenga meumbo olo,+ ndele tai li teya po noku li hanauna po filufilu.”
28 Eshi Jesus a mana okupopya eendjovo odo, eengudu dovanhu oda li da kuminwa ehongo laye,+
29 osheshi okwa li e va honga ngaashi ou e na eenghonopangelo,+ ndele hangaashi ovanongo vomishangwa.
Omashangelo opedu
^ Omambungu oludi eli okwa fa kavandje.
