Evaengeli paMateus 5:1-48
-
EUDIFO LOKOMHUNDA (1-48)
5 Eshi Jesus a mona eengudu dovanhu, okwa ya komhunda; ndele eshi a kala omutumba, ovahongwa vaye ove uya kuye.
2 Opo nee okwa hovela oku va honga ta ti:
3 “Ovo tava kala va hafa ovovo ve shii kutya ova pumbwa ewiliko laKalunga,*+ osheshi Ouhamba womeulu owavo.
4 “Ovo tava kala va hafa ovovo va nyika oluhodi, osheshi otava ka hekelekwa.+
5 “Ovo tava kala va hafa ovovo ve na omwenyo muwa,*+ osheshi otava ka fyuulula edu.+
6 “Ovo tava kala va hafa ovovo va fya ondjala nenota+ louyuki, osheshi otava ka kutifwa.+
7 “Ovo tava kala va hafa ovovo ve na onghenda,+ osheshi otava ka filwa onghenda.
8 “Ovo tava kala va hafa ovovo ve na omitima da yela,+ osheshi otava ka mona Kalunga.
9 “Ovo tava kala va hafa ovovo hava pange ombili,*+ osheshi otava ka ifanwa ovana vaKalunga.
10 “Ovo tava kala va hafa ovovo tava hepekelwa ouyuki,+ osheshi Ouhamba womeulu owavo.
11 “Ovo tamu kala mwa hafa onye ngeenge ovanhu tave mu sheke,+ tave mu hepeke+ noku mu popila mowii aushe omolwange.+
12 Hafeni nokunyakukwa,+ osheshi ondjabi yeni+ oinene meulu, molwaashi novaprofeti ve mu tetekela osho ve va hepeka ngaho.+
13 “Onye omongwa wedu,+ ndele ngeenge omongwa owa tutuka, otau dulu ngoo vali okukala u na eenghono? Itau ka kala vali u na oshilonga, ndele otau ekelwashi+ u ka lyatwe kovanhu.
14 “Onye ouyelele wounyuni.+ Oshilando sha tungilwa komhunda itashi dulu okuhondama.
15 Ovanhu ngeenge va tema olamba, ihave i tula koshi yoshimbale,* ndele okoshikwatelwalamba, nohai minikile aveshe ovo ve li meumbo.+
16 Sha faafana, nanye ouyelele weni nau minikile ovanhu,+ opo va mone oilonga yeni iwa+ nova hambelele Xo yeni womeulu.+
17 “Inamu diladila kutya onde uya okuxulifa po Omhango, ile eendjovo dovaprofeti. Inandi uya oku di xulifa po, ndele oku di wanifa po.+
18 Oshili ohandi mu lombwele kutya nande ngeno eulu nedu oi xule po, mOmhango itamu di nande okandada kamwe kanininini, ile okapambu kamwe kondada, fiyo osheshi aishe ya wanifwa.+
19 Keshe tuu ou ta tauluka shimwe shomoipango ei inini, ndele ta hongo vakwao va ninge sha faafana, ina wana okuya mOuhamba womeulu. Ashike keshe ou te i wanifa po, ndele te i hongo vakwao okwa wana okuya mOuhamba womeulu.
20 Onghee ohandi mu lombwele, ouyuki weni ngeenge kau dule wovanongo vomishangwa nowOvafarisai,+ itamu ka ya mo mOuhamba womeulu.+
21 “Omwa uda osho ooxokulululwa va lombwelwa kwa tiwa: ‘Ino dipaa,+ osheshi keshe tuu ou ta dipaa ota ka twalwa komhangu.’+
22 Ndele ohandi mu lombwele kutya keshe ou ta kala a handukila+ omumwaxe ota ka twalwa komhangu, naau ta ula omumwaxe eendjovo dii ota twalwa kOmhangu yoPombada elela, nakeshe tuu ou ta ti, ‘Elai ove,’ ota ka ya muGehenna.*+
23 “Ngeenge to twala oshali yoye koaltari,+ ndele oko wa dimbulukila kutya ope na sha pokati keni nomumwaxo,
24 fiya ko oshali yoye komesho yoaltari, ndele to i mu ka paafane tete ombili nomumwaxo, opo nee to aluka u uye u yandje oshali yoye.+
25 “Paafaneni diva ombili nomutamaneki woye, ofimbo mu li naye mondjila, opo ehe ku yandje momake omupanguli, nomupanguli ehe ku twale komupiya womomhangu, ndele to tulwa modolongo.+
26 Oshili ohandi ku lombwele, ito ka dja mo nandenande fiyo osheshi wa futa oimaliwa aishe oyo u na.*
27 “Omwa uda kwa tiwa: ‘Ino nyona ohombo.’+
28 Ndele ame ohandi mu lombwele kutya keshe ou ha tale omukainhu+ nokahalu, oye okwe mu haela nale momutima waye.+
29 Hano ngeenge eisho loye lokolulyo otali ku hongaula, li kolola mo, ndele to li ekeleshi.+ Osheshi oshixwepo okukanifa oshilyo shoye shimwe sholutu shi dulife olutu loye alishe tali ekelwa muGehenna.*+
30 Natango, ngeenge eke loye lokolulyo otali ku hongaula, li teta ko, ndele to li ekeleshi.+ Osheshi oshixwepo okukanifa oshilyo shoye shimwe sholutu shi dulife olutu loye alishe tali ekelwa muGehenna.*+
31 “Shimwe vali, okwa tiwa: ‘Keshe ou ta teya ohombo nomukulukadi waye, ne mu pe ombapila yeteyohombo.’+
32 Ndele ame ohandi mu lombwele kutya keshe ou ta teya ohombo nomukulukadi waye omolwoshinima shimwe shihe fi oluhaelo,* ote mu twalifa moluhaelo, naau ta hombola omukainhu a tya ngaho, ota haele.+
33 “Natango omwa uda ooxokulululwa va lombwelwa kutya: ‘Inamu ana oipupulu,+ ndele omu na okuwanifa po osho mwa anena Jehova.’*+
34 Ashike ame ohandi mu lombwele: Inamu ana nandenande,+ kutya nee okeulu, osheshi olo olukalwapangelo laKalunga,
35 ile okedu, osheshi olo oshilyatelo sheemhadi daye,+ ile kuJerusalem, osheshi osho oshilando shOhamba inene.+
36 Ino ana komutwe woye, osheshi ito dulu okulundulula nande oxwiki imwe i ninge itoka, ile ilaula.
37 Eendjovo deni ‘Heeno,’ nadi kale heeno, nosho yo ‘Ahawe,’ nai kale ahawe;+ edi da wedwa po oda dja momunawii.+
38 “Omwa uda eshi kwa tiwa: ‘Eisho omeisho, neyoo omeyoo.’+
39 Ndele ohandi mu lombwele: Ngeenge ope na ou te ku shindi, ino mu lwifa, naau te ku denge kolupanda lokolulyo mu pa yo likwao.+
40 Ngeenge ope na ou a hala oku ku twala komhangu e ku kufe oshikutu shoye shokoshi, mu pa yo oshikutu shoye shokombada;+
41 ndele ngeenge umwe ote ku kondjifa u mu findikile oshinano shokilometa imwe, mu findikila oshinano sheekilometa mbali.
42 Yandja kwaau te ku indile, ndele ino pilamena ou a hala oku ku ehela.*+
43 “Omwa uda eshi kwa tiwa: ‘Kala u hole mukweni,+ ndele tonda omutondi woye.’
44 Ndele ohandi mu lombwele kutya: Kaleni mu hole ovatondi veni+ nokwiilikanena ovo have mu hepeke,+
45 opo mu ulike shili kutya nye ovana vaXo yeni womeulu,+ osheshi etango laye ohe li pitifile ovo hava longo owii naavo hava longo ouwa, nodula yaye ohe i lokifile ovayuki naavo vehe fi ovayuki.+
46 Ngeenge omu hole ashike ovo ve mu hole, omwa teelela oku ka mona ondjabi yashike?+ Mbela novafendelifi ihava ningi yo sha faafana?
47 Ndele ngeenge ohamu popifa ashike ovamwaxo, mbela omu shii otamu ningi oshinima shiwa mu dule vamwe? Ovanhu vomoiwana mbela navo hasho hava ningi ngaho?
48 Kaleni hano mwa wanenena, ngaashi Xo yeni womeulu a wanenena.+
Omashangelo opedu
^ Ile “ovovo ve na omhumbwe yopamhepo; ovaeheli vomhepo.”
^ Ile “ovalidiiniki.”
^ Ile “ovanambili.”
^ Ile “yoshimbale shokuyelekifa.”
^ Onhele yokuxwikila oimbodi oyo ya li kondje yaJerusalem. Tala Omafatululo oitya.
^ Eln., “ee-quadran daxuuninwa.” Tala Oshiw. B14.
^ Tala Omafatululo oitya.
^ Tala Omafatululo oitya.
^ MOshigreka, porneia. Tala Omafatululo oitya.
^ Sha hala okutya, okweehela nopehe na okuyandja oishoshela.
