Evaengeli paMateus 11:1-30
11 Eshi Jesus a mana okuyandja omalombwelo kovahongwa vaye 12, okwa ya moilando yopoushiinda, opo a ka honge nokuudifila ovanhu.+
2 Ofimbo Johannes a li modolongo,+ okwa uda oilonga yaKristus, ndele ta tumu ovahongwa vaye+
3 ve ke mu pule kutya: “Oove tuu ou u na okuuya, ile otu na okuteelela umwe e lili?”+
4 Jesus okwe va nyamukula ta ti: “Indeni mu ka lombwele Johannes osho mwa uda naasho mwa mona:+
5 Ovapofi paife ove wete ko,+ oingudu otai ende, ovanashilundu+ otava velulwa, eembolo odi udite ko, ovafi otava nyumunwa, neehepele otadi udifilwa onghundana iwa.+
6 Ou ita limbililwa nge* ota kala a hafa.”+
7 Fimbo tava i, Jesus okwa hovela okupopya neengudu dovanhu kombinga yaJohannes ta ti: “Omwa ka talele shike mombuwa?+ Mbela olumbungu tali telaanifwa komhepo?+
8 Oshike naanaa mwa ka talele? Mbela omulumenhu a djala oikutu yondilo?* Ovo hava djala oikutu yondilo ohava kala momaumbo eehamba.
9 Omolwashike hano mwa ile mombuwa? Kamwa li mwa ka tala hamba omuprofeti? Heeno, ohandi mu lombwele, ye oku dule kokule omuprofeti.+
10 Oye a popiwa eshi kwa shangwa taku ti: ‘Tala! Ame ohandi tumu omutumwa wange e ku tetekele,* oo te ke ku longekidila ondjila!’+
11 Oshili ohandi mu lombwele, mokati kaavo va dalwa kovakainhu kamu na nande oumwe e dule Johannes Omuninginifi, ashike omunhu ou munini mOuhamba womeulu oku mu dule.+
12 Okudja pefimbo laJohannes Omuninginifi fiyo opaife, ovanhu otava kendabala okuya mOuhamba womeulu, naavo tava kendabala noudiinini otava i mo.+
13 Osheshi aveshe, Ovaprofeti nosho yo Omhango, ova xunganeka fiyo opefimbo laJohannes;+
14 kutya nee omwa hala oku shi itavela, ile hasho, Johannes oye ‘Elia oo a popiwa kovaprofeti kutya ote uya.’+
15 Ou e na omatwi na ude ko.
16 “Epupi eli ohandi li yelekanifa nashike?+ Ola fa ounona ve li omutumba pomalandifilo tava ingida vakwao
17 tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ashike inamu lila.’*
18 Sha faafana, Johannes okwe uyile ita li noita nu, ndele ovanhu ova ti, ‘Oku na ondemoni.’
19 Omona womunhu okwe uya ta li nota nu,+ ndele ovanhu ova ti, ‘Tala! Omulumenhu ou omufukenhu nongholwe,* kaume kovafendelifi nokovalunde.’+ Sha faafana, ounongo ohau hololwa pauyuki koilonga* yao.”+
20 Opo nee okwa hovela okuyandja oushima koilando omo a longa oilonganghono ihapu, molwaashi inai lidilulula.
21 Okwa ti: “Woo ove, Korasin! Woo ove, Betsaida! molwaashi ngeno ovanhu vomoilando yaTirus naSidon ova monene oilonganghono oyo, ngeno ove lidilulula nale ve li meeshako nomomute.+
22 Ndele ohandi mu lombwele, mEfiku lEtokolo, ehandukilo leni otali ka kala linene li dulife laTirus nolaSidon.+
23 Ndele ove Kapernaum,+ mbela oto ka tumbalekwa u ye meulu? Oto ka kulukila mOmbila,*+ molwaashi oilonganghono oyo ya longwa mwoove ngeno oya longelwe muSodom, ngeno oko e li fiyo okefiku eli.
24 Ndele ohandi ku lombwele, mEfiku lEtokolo, ehandukilo loye otali ka kala linene li dulife laSodom.”+
25 Opo nee Jesus okwa popya pefimbo olo a ti: “Tate, Omwene weulu nedu, ohandi ku tange moipafi yaaveshe, molwaashi oinima ei owe i holeka ovanaendunge novahongwanhu, ndele owe i hololela ounona vanini.+
26 Heeno, Tate, molwaashi eshi osho she ku wapalela.
27 Oinima aishe Tate okwe i pa nge,+ ndele kape na nande ou e shii Omona filufilu, kakele kaTate;+ kape na yo ou e shii filufilu Tate, kakele kOmona nakeshe oo Omona a hala oku mu hololela Xe.+
28 Ileni kwaame amushe ava hamu longo nomwa lolokifwa, opo ndi mu tulumukife.
29 Humbateni ondjoko yange nokulihonga kwaame, osheshi ame ondi na omwenyo muwa, nomomutima onde lininipika,+ opo nee otamu ke limonena etulumuko.
30 Osheshi ondjoko yange oiwa,* nomutengi wange omupu.”
Omashangelo opedu
^ Eln., “ite lipumu mwaame nokulidenga po.”
^ Ile “youdjeko?”
^ Eln., “komesho yoye.”
^ Ile “lidenga meenhulo, opo mu ulike kutya omwa nyika oluhodi.”
^ Eln., “nomufinyuni womaviinyu.”
^ Ile “koidjemo.”
^ Ile “mo-Hades,” sha hala okutya, koufi. Tala Omafatululo oitya.
^ Ile “oipu okuhumbata.”
