Evaengeli paMateus 20:1-34
20 “Osheshi Ouhamba womeulu owa fa mwene weumbo, oo a pita ongula inene a ka konge ovanailonga vomoshikunino shaye shomandjebele.+
2 Konima eshi a udafana novanailonga e va fute odenari* imwe mefiku, okwe va tuma moshikunino shaye shomandjebele.
3 Okwa pita mo vali potundi onhinhatu lwaapo,* nokwa mona vamwe ve li ofika pomalandifilo vehe na oilonga,
4 ndele ta ti kuvo, ‘Nanye indeni mu ka longe moshikunino, nohandi ke mu pa ondjabi i li pauyuki.’
5 Opo nee ova ya. Natango okwa li a pita mo vali potundi onhihamano lwaapo* nopotundi onhimuwoi,* ndele ta ningi sha faafana.
6 Xuuninwa, okwa pita mo vali potundi onhi-11 lwaapo,* ndele ta hange vamwe ve li ofika, nokwa tya kuvo, ‘Omolwashike mwa kala apa efiku alishe muhe na oilonga?’
7 Ova nyamukula va ti: ‘Osheshi kape na ou e tu pa oilonga.’ Okwa tya kuvo: ‘Nanye yo indeni moshikunino mu ka longe.’
8 “Eshi kwa toka, mwene woshikunino shomandjebele okwa lombwela elenga laye ta ti: ‘Ifana ovanailonga, ndele to va futu ondjabi yavo;+ hovela naava vaxuuninwa, ndele to xuuninwa naava votete.’
9 Ndele eshi ovanailonga ovo va longa okudja potundi onhi-11 ve uya, keshe umwe okwa pewa odenari* imwe.
10 Eshi votete ve uya, ova li ve shii otava pewa shihapu, ndele navo ova li va futwa ashike odenari* imwe.
11 Opo nee eshi ve i tambula, ova hovela okungongotela mwene weumbo
12 tava ti: ‘Ovalumenhu ava vaxuuninwa ova longa ovili imwe, ndele owe va pa shi fike pamwe nafye ava twa longa noudiinini efiku alishe moshanga shomutenya.’
13 Ndele okwa nyamukula umwe womuvo ta ti: ‘Kaume, inandi ungaunga naave shihe li pauyuki. Hamba inandi udafana nanye odenari* imwe?+
14 Tambula ondjabi yoye, ndele to i. Onda hala okupa ou waxuuninwa ondjabi i fike pwaai yoye.
15 Nghi na hano oufemba wokuninga eshi nda hala noinima yange? Ile eisho loye oli na ondubo,* molwaashi nde va ningila ouwa?’*+
16 Kungaho, ovo vaxuuninwa otava ka ninga votete, naavo votete otava ka ninga vaxuuninwa.”+
17 Fimbo Jesus ve li mondjila tava i kuJerusalem, okwa ifana po ovahongwa 12 ovo aveke, ndele te va lombwele ta ti:+
18 “Taleni! Ohatu yeni kuJerusalem, nOmona womunhu ota ka yandjwa momake ovapristeri ovakulunhu novanongo vomishangwa. Ota ka tokolelwa efyo+
19 nota ka yandjwa momake ovanhu vomoiwana imwe i lili, opo a shekwe, a dengwe nokuvalelwa komuti;+ nomefiku etitatu ota ka nyumunwa.”+
20 Opo nee ina yovanamati vaSebedeus+ okwe uya kuJesus pamwe novanamati vaye vavali, ndele te mu linyongamene,* a hala oku mu pula sha.+
21 Jesus okwa tya kuye: “Owa hala shike?” Okwa nyamukula ta ti: “Ohandi ku indile, opo ovanamati vange vavali va ka kale omutumba pamwe naave mOuhamba woye, umwe okolulyo loye naumwe okolumosho loye.”+
22 Jesus okwa ti: “Nye kamu shi shii osho tamu pula. Mbela otamu dulu ngoo okunwa meholo olo ndi li pokunwa?”+ Ova tya kuye: “Ohatu dulu.”
23 Okwa tya kuvo: “Oshili otamu ka nwa meholo lange,+ ashike okukala omutumba kolulyo nokolumosho lange haame handi ku yandje, ndele okwaava ve ku longekidilwa kuTate.”+
24 Eshi vakwao omulongo ve shi uda, ova li va handukila ovamwainafana ava vavali.+
25 Ashike Jesus okwe va ifana kuye, ndele ta ti: “Omu shi shii kutya ovapangeli voiwana ohave i pangele, novanhu ovanaenghono ohava longifa eenghonopangelo davo oku i pangela.+
26 Osho hasho shi na okukala ngaho mokati keni,+ ndele keshe ou a hala a kale munene mokati keni, na kale omuyakuli weni,+
27 nakeshe ou hala okukala wotete mokati keni, oku na okukala omupiya weni.+
28 Ngaashi ashike Omona womunhu, ka li e uya okuyakulwa, ndele okuyakula+ nokuyandja omwenyo waye u ninge ekulilo lavahapu.”+
29 Fimbo va li tava di mo muJeriko, ongudu inene yovanhu oye mu shikula.
30 Ndele tala! ovapofi vavali, ovo va li omutumba pomunghulo wondjila, eshi va uda kutya Jesus ota ende po, ova ingida mokule tava ti: “Omwene, Omona waDavid, tu fila onghenda!”+
31 Ndele ongudu yovanhu oye va hanyena noku va lombwela va mwene, ashike ova ingida mokule tava ti: “Omwene, Omona waDavid, tu fila onghenda!”
32 Opo nee Jesus okwa kanghama, te va ifana, ndele ta ti: “Omwa hala ndi mu ningile shike?”
33 Ova tya kuye: “Omwene, otwa hala omesho etu a mone ko.”
34 Jesus okwe va kenukila, ta kumu omesho avo,+ opo nee ova twikuluka diva, ndele tave mu shikula.
Omashangelo opedu
^ Tala Oshiw. B14.
^ Sha hala okutya, 9:00 wongula lwaapo.
^ Sha hala okutya, 12:00 womutenya lwaapo.
^ Sha hala okutya, 3:00 yomutenya lwaapo.
^ Sha hala okutya, 5:00 yokomatango lwaapo.
^ Tala Oshiw. B14.
^ Tala Oshiw. B14.
^ Tala Oshiw. B14.
^ Eln., “olii; olikolokoshi.”
^ Ile “molwaashi handi yandje?”
^ Ile “twile eengolo.”
