Evaengeli paMateus 26:1-75
-
Ovapristeri tava pangele omhangela va dipae Jesus (1-5)
-
Omaadi edimba liwa a tilwa Jesus (6-13)
-
Opaasa yaxuuninwa nokukengelelwa (14-25)
-
Okudikwa po kwOuvalelo wOmwene (26-30)
-
Okulidimbika kwaPetrus taku xunganekwa (31-35)
-
Jesus ta ilikana muGetsemane (36-46)
-
Jesus a kwatwa po (47-56)
-
Jesus e li mOmhangu yoPombada yOvajuda (57-68)
-
Petrus te lidimbike Jesus (69-75)
26 Eshi Jesus a mana okupopya oinima aishe oyo, okwa lombwela ovahongwa vaye ta ti:
2 “Omu shi shii kutya okudja paife oku na omafiku avali, opo ku danwe Opaasa,+ nOmona womunhu ota ka yandjwa a valelwe komuti.”+
3 Opo nee ovapristeri ovakulunhu novakulunhu voshiwana ova ongala momukala weumbo lomupristeri munene wedina Kajafas,+
4 ndele ova pangela omhangela+ va kwate po Jesus meholeko* noku mu dipaa.
5 Ndele ova li tava ti: “Inatu mu kwata po pefimbo loshivilo, opo paha holoke epiyaano mokati kovanhu.”
6 Fimbo Jesus a li muBetania meumbo laSimon, oo a li omunashilundu,+
7 kuye okwe uya omukainhu umwe e na oshanga yomaadi* ondilo edimba liwa, ndele ta hovele oku a tila momutwe waye fimbo a li ta li.*
8 Eshi ovahongwa ve shi mona, ova handuka, ndele tava ti: “Omolwashike omaadi taa hepifwa?
9 Ngeno okwa landifilwe po koimaliwa ihapu, ndele tai pewa eehepele.”
10 Eshi Jesus a uda osho tava popi, okwa tya kuvo: “Omolwashike mwa hala okuhandukifa omukainhu ou? Okwa longela nge oshilonga shiwa.
11 Osheshi eehepele odi li punye alushe,+ ndele ame itandi ka kala alushe punye.+
12 Eshi a tila omaadi aa edimba liwa kolutu lange, okwe shi ninga a longekide olutu lange, eshi handi ka pakwa.+
13 Oshili, ohandi mu lombwele, keshe apa onghundana ei iwa tai udifwa mounyuni aushe, osho omukainhu ou a longa, nasho otashi ka hepaululwa, opo a dimbulukiwe.”+
14 Ndele umwe womwaavo omulongo navavali, oo ha ifanwa Judas Iskariot,+ okwa ya kovapristeri ovakulunhu,+
15 ndele ta ti: “Otamu pe nge shike, ngeenge onda yandje Jesus momake eni?”+ Opo nee ove mu udanekela ve mu pe oisilveri 30.+
16 Onghee okudja opo, okwa kala ta kongo omhito tai wapalele, opo e mu kengelele.
17 Mefiku lotete lOmingome inadi ya Efulika,+ ovahongwa ove uya kuJesus tava ti: “Openi wa hala tu ke ku longekidile ouvalelo wOpaasa, opo u u lye?”+
18 Okwa tya: “Indeni moshilando komulumenhu wonhumba, ndele tamu ti kuye, ‘Omuhongi okwa ti: “Eufwafimbo lange oli li popepi; ohandi ka danena Opaasa pamwe novahongwa vange meumbo loye.”’”
19 Onghee ovahongwa ova ninga naanaa ngaashi Jesus e va lombwela, nova longekida Opaasa.
20 Eshi kwa toka,+ Jesus okwa li omutumba poshitaafula pamwe novahongwa vaye 12.+
21 Ofimbo tava li, okwa tya: “Oshili, ohandi mu lombwele, umwe womunye ota ka kengelela nge.”+
22 Opo nee ova nyika oluhodi unene, ndele keshe umwe ta hovele oku mu pula ta ti: “Omwene, haame ndishi?”
23 Okwa nyamukula a ti: “Ou ta tu eke laye oshita naame metiti, oye ta ka kengelela nge.+
24 Oshili, Omona womunhu ota ka fya, ngaashi pa shangwa kombinga yaye, ndele woo+ komunhu ou ta kengelele Omona womunhu!+ Oshixwepo ngeno omunhu oo ka dalelwe.”+
25 Ndele Judas, oo a li poku mu kengelela, okwa ti: “Rabbi, haame ndishi?” Jesus okwa tya kuye: “Enyamukulo ou li shii.”
26 Eshi va twikila okulya, Jesus okwa kufa omungome, nokonima eshi a ilikana okwe u pambula,+ ndele te u pe ovahongwa vaye ta ti: “Tambuleni, lyeni. Eshi otashi faneke olutu lange.”+
27 Opo nee okwa kufa eholo, ta pandula, nokwe li va pa ta ti: “Nweni mo amushe,+
28 osheshi eshi otashi faneke ‘ohonde yange+ yehangano,’+ oyo tai ka tilwashi omolwokudima po omatimba+ avahapu.+
29 Ndele ohandi mu lombwele: Itandi ka nwa vali nandenande omaviinyu aa, fiyo efiku olo handi ke a nwa mape pamwe nanye mOuhamba waTate.”+
30 Xuuninwa, konima eshi va imba omaimbilohambelelo,* ova dja mo, ndele tava i kOmhunda yEemono.+
31 Opo nee Jesus okwa tya kuvo: “Amushe otamu ka fiya nge po oufiku wonena, osheshi opa shangwa: ‘Ohandi ka denga omufita, needi doufita otadi ke lihana.’+
32 Ndele konima ngeenge onda nyumuka, ohandi ke mu tetekela kuGalilea.”+
33 Ashike Petrus okwe mu nyamukula ta ti: “Nande vakwetu aveshe nave ku fiye po omolwoshinima osho to ka ningilwa, ame nghi na fiku ndi ku fiye po!”+
34 Jesus okwa tya kuye: “Oshili, ohandi ku lombwele, oufiku ou, ofimbo ekondobolo inali kwena, oto ke lidimbika nge lutatu.”+
35 Petrus okwa tya kuye: “Kutya nee otashi pula ndi fye pamwe naave, itandi ke ku lidimbika nandenande.”+ Ovahongwa vakwao aveshe navo ova popya sha faafana.
36 Opo nee Jesus okwe uya navo ponhele hai ifanwa Getsemane,+ ndele ta ti kovahongwa: “Kaleni omutumba apa, ofimbo handi i kwinya ndi ka ilikane.”+
37 Nokwa kufa Petrus novana vaSebedeus vavali, ndele okwa hovela okunyika oluhodi nokukala e udite oudjuu unene.+
38 Opo nee okwa tya kuvo: “Onda* nyika oluhodi neenghono, nokuli fiyo okufya. Kaleni apa, nokukala oupafi pamwe naame.”+
39 Ndele okwa ehena komesho kanini, te linyongamene oshipala sha twa pedu, ta ilikana+ ta ti: “Tate, ngeenge otashi shiiva, eholo eli+ nali pitilile nge po. Ashike hangaashi ame nda hala, ndele ongaashi ove wa hala.”+
40 Okwa alukila kovahongwa vaye, nokwa hanga va kofa, ndele ta ti kuPetrus: “Hano itamu dulu okukala oupafi nande ovili imwe pamwe naame?+
41 Kaleni oupafi+ nokutwikila okwiilikana,+ opo muha ye momayeleko.+ Oshoshili kutya omhepo oya halelela,* ndele ombelela oi na ounghundi.”+
42 Opo nee okwa shuna ko olutivali, ndele ta ilikana ta ti: “Tate, ngeenge itashi dulika eholo eli li koyelele nge inandi li nwa, ehalo loye nali wanifwe.”+
43 Nokwe uya vali nokwe va hanga va kofa, osheshi omesho avo okwa li a dinda keemhofi.
44 Onghee okwe va fiya po, ndele ta shuna ko vali, ndele ta ilikana oshikando oshititatu, a popyulula eendjovo da faafana.
45 Opo nee okwa alukila kovahongwa, ndele ta ti kuvo: “Eli halo efimbo lokukofa nokufuda po! Taleni! Efimbo oli li popepi Omona womunhu a yandjwe momake ovalunde.
46 Fikameni, ituyeni. Taleni! Ou ta kengelele nge oku li popepi.”
47 Ofimbo a li natango ta popi, tala! Judas, umwe womwaavo omulongo navavali, okwe uya pamwe nongudu inene i na omaongamukonda needibo, ya tumwa kovapristeri ovakulunhu nokovakulunhu voshiwana.+
48 Ndele omukengeleli waye okwe va pa edidiliko ta ti: “Ou handi xupita, oye ngaho; mu kwateni po.”
49 Nokwa ya a yukilila kuJesus, nokwa tya kuye, “Rabbi! wa tokelwa po!” ndele te mu xupita.
50 Ashike Jesus okwa tya kuye: “Kaume, owe uya okuninga shike apa?”+ Opo nee ove uya komesho, ndele tava kwata po Jesus.
51 Ndele tala! umwe womwaavo va li naJesus okwa nana eke laye, ndele ta pweya mo eongamukonda laye nokudenga omupiya womupristeri munene, a teta ko okutwi kwaye.+
52 Opo nee Jesus okwa tya kuye: “Shunifa mo eongamukonda loye moshilaleko,+ osheshi aveshe ava tava longifa eongamukonda otava ka fya keongamukonda.+
53 Ile oto diladila kutya itandi dulu okwiindila Tate a tumine nge mepakumo leisho eengudu 12 dovaengeli?*+
54 Ndele ngeenge onda ningi ngaho, omishangwa otadi ka wanifwa ngahelipi odo tadi ti kutya osho shi na okuningwa ngaho?”
55 Pefimbo opo tuu opo, Jesus okwa tya keengudu dovanhu: “Omwe uya okukwata nge po mu na omaongamukonda needibo mwa fa mwe uya okukwata po ombudi? Efiku nefiku, onda li handi kala omutumba motembeli handi hongo,+ ashike inamu kwata nge po.+
56 Ndele aishe oyo oya ningwa, opo osho sha shangwa* kovaprofeti shi wanifwe po.”+ Opo nee ovahongwa aveshe ove mu fiya po nokuya onhapo.+
57 Ovo va kwata po Jesus ove mu twala keumbo laKajafas,+ omupristeri munene, oko kwa li kwa ongala ovanongo vomishangwa novakulunhu.+
58 Ashike Petrus okwa kala te mu shikula e li konima kokule, fiyo omomukala womupristeri munene, nokonima eshi a ya mo, okwa kala omutumba povapiya, opo a tale osho tashi ningwa po.+
59 Ndele ovapristeri ovakulunhu noilyo aishe ikwao yOmhangu yoPombada yOvajuda ova li tava kongo ovanhu va totele Jesus omahokololo oipupulu, opo va dule oku mu dipaa.+
60 Ashike inava mona nande oumwe, nonande opa li pa holoka eembangi doipupulu dihapu.+ Xuuninwa ope ke uya mbali,
61 ndele tadi ti: “Omulumenhu ou okwa tile, ‘Ohandi dulu okungumauna po otembeli yaKalunga noku i tungulula moule womafiku atatu.’”+
62 Opo nee omupristeri munene okwa fikama, ndele ta ti kuye: “Ito nyamukula sha? Ku udite ko hano eshi ovalumenhu ava tave ku hokololifa?”+
63 Ndele Jesus okwa kala ashike a mwena.+ Onghee omupristeri munene okwa tya kuye: “Ohandi ku anifa kuKalunga omunamwenyo u tu lombwele, ngeenge oove Kristus, Omona waKalunga!”+
64 Jesus okwa tya kuye: “Osho naanaa ngaashi wa popya. Ndele ohandi mu lombwele: Okudja paife otamu ka mona Omona womunhu+ e li omutumba kolulyo laKalunga Omunaenghono+ note uya moilemo yokeulu.”+
65 Opo nee omupristeri munene okwa pombaula oikutu yaye yokombada ta ti: “Omulumenhu ou okwa sheka Kalunga! Omolwashike twa pumbwa vali okukonga eembangi? Taleni! Omwe mu uda, eshi ta sheke Kalunga.
66 Otamu ti ngahelipi?” Ova nyamukula tava ti: “Okwa wana okufya.”+
67 Opo nee ove mu fiila omate moshipala+ noku mu denga neengonyo.+ Vamwe ove mu denga nomanghava moshipala+
68 tava ti: “Ove Kristus, tu xunganekela. Olyelye e ku denga?”
69 Ndele Petrus okwa li omutumba pondje momukala, nokakadona kamwe okapiya oke uya kuye, ndele taka ti: “Naave owa li pamwe naJesus Omugalilea!”+
70 Ashike okwe shi likala moipafi yaaveshe ta ti: “Nghi shii kutya oto popi kombinga yashike.”
71 Eshi a ya a finda koshivelo, okakadona kamwe vali oke mu mona, ndele taka ti kwaavo ve li po: “Omulumenhu ou okwa li pamwe naJesus Omunasaret.”+
72 Natango okwe shi likala nokwaana ta ti: “Omulumenhu nghi mu shii!”
73 Konima yokafimbo, ovo va li ofika ove uya, ndele tava ti kuPetrus: “Oshili naave yo oumwe womuvo, osheshi elaka loye* ole ku holola.”
74 Opo nee okwa hovela okulifingaela nokwaana ta ti: “Omulumenhu nghi mu shii!” Nekondobolo ola kwena diva.
75 Na Petrus okwa dimbuluka osho Jesus a li e mu lombwela a ti: “Fimbo ekondobolo inali kwena, oto ke lidimbika nge lwoikando itatu.”+ Nokwa ya pondje, ndele ta lili unene.
