Evaengeli paMateus 10:1-42
10 Okudja opo okwa ifana ovahongwa vaye 12, nokwe va pa eenghono dokufinda eemhepo da nyata,+ opo va dule oku di ta mo nokuvelula omikifi di lili noku lili noungone keshe.
2 Omadina ovayapostoli ovo 12 oo aa:+ Simon, oo ha ifanwa Petrus,+ nomumwaina Andreas;+ Jakob, omona waSebedeus, nomumwaina Johannes;+
3 Filippus naBartolomeus;+ Tomas+ naMateus,+ omufendelifi; Jakob, omona waAlfeus; naTadeus;
4 Simon, Omukaanan;* naJudas Iskariot, oo lwanima a ka kengelela Jesus.+
5 Eshi Jesus a tuma ovayapostoli 12, okwe va pa omalombwelo aa:+ “Inamu ya kovanhu vomoiwana imwe, noinamu ya nande omoshilando shimwe shomuSamaria.+
6 Ndele ponhele yaasho, indeni ashike mu ka konge eedi odo da kana domeumbo laIsrael.+
7 Eshi tamu i, udifeni tamu ti: ‘Ouhamba womeulu owa ehena popepi.’+
8 Veluleni ovanaudu,+ nyumuneni ovafi, yelifeni ovanashilundu, teni mo eendemoni. Omwa pewa oshali, yandjeni yo oshali.
9 Inamu likongela oshingoli, oshisilveri, ile ongopolo momakwamo eni oimaliwa,+
10 ile ondjato yoikulya yomolweendo, ile oikutu ivali,* ile eenghaku, ile odibo,+ molwaashi omulongi okwa wana okupewa oikulya.+
11 “Moshilando, ile momukunda keshe tamu i mo, kongeni oo e na ehalo loku mu tambula, ndele tamu kala omo, fiyo osheshi mwa dja mo.+
12 Ngeenge tamu i meumbo, popifeni ovaneumbo.
13 Ndele ngeenge ovaneumbo ove mu tambula, ombili yeni nai kale navo,+ ashike ngeenge inave mu tambula, shuneni nombili yeni.
14 Ngeenge kape na oo e mu tambula, ile a pwilikina keendjovo deni, eshi tamu di mo meumbo olo, ile moshilando osho, pupuleni ondwi keemhadi deni.+
15 Oshili ohandi mu lombwele, ehandukilo loshilando osho mEfiku lEtokolo otali ka kala linene li dulife laSodom nolaGomorra.+
16 “Taleni! Ohandi mu tumu ngaashi eedi mokati komambungu;* kaleni hano mwa lungama ngaashi omayoka nomuhe na oshipo ngaashi eenghuti.+
17 Lungameni ovanhu, molwaashi otave ke mu twala keemhangu,+ ndele tave mu dengele+ meeshinagoga davo.+
18 Notamu ka twalwa komesho yovapangeli noyeehamba+ omolwange, opo shi ninge oumbangi kuvo nokoiwana.+
19 Onghee hano ngeenge ove mu twala kovapangeli, inamu kala mu na oshisho kutya otamu ka popya ngahelipi, ile otamu ka popya shike, molwaashi osho tamu ka popya otamu ke shi pewa pefimbo opo;+
20 osheshi hanye ashike vene tamu ka popya, ndele omhepo yaXo yeni oyo tai ka popya munye.+
21 Natango, omumwainamati ota ka yandja omumwainamati a dipawe, naxe omona waye, nounona otava ka kala ve li omhinge novadali vavo, notave ke va dipaifa.+
22 Notamu ka tondwa kovanhu aveshe omolwedina lange,+ ashike ou e lididimika* fiyo okexulilo ota xupifwa.+
23 Ngeenge tave mu hepeke moshilando shimwe, indeni onhapo kushikwao;+ osheshi ohandi mu lombwele oshili kutya itamu mane okuudifila moilando aishe yaIsrael fiyo Omona womunhu ote uya.
24 “Omuhongwa ke dule omuhongi waye, nomupiya ke dule omwene waye.+
25 Omuhongwa oku na okukala ngaashi omuhongi waye, nomupiya ongaashi omwene waye.+ Ngeenge ovanhu ova ifana mwene weumbo Belsebub,*+ osha yela kutya novaneumbo laye osho tave va ifana.
26 Onghee hano inamu va tila, osheshi kaku na osho sha tuvikilwa itashi ka tuvikululwa, nokaku na oshiholekwa itashi ka shiivika.+
27 Osho handi mu lombwele momilaulu, shi popyeni mouyelele, naasho tamu udu tashi nongofolwa, shi udifeni moipafi yaaveshe.+
28 Ndele inamu tila ovo tava dipaa olutu, osheshi itava dulu oku mu imba oku ka kala nomwenyo monakwiiwa;+ mepingafano naasho, tileni ou ta dulu oku mu hanauna po muGehenna.*+
29 Mbela oiyandja ivali ihai landwa nokapeni kamwe* kongushu inini? Ashike kape na nande oshimwe shomuyo tashi wile pedu Xo yeni ine shi didilika.+
30 Ndele nokuli neexwiki adishe dokomitwe deni oda valulwa.
31 Hano inamu tila; nye omwa fimana unene mu dule oiyandja ihapu.+
32 “Ndele keshe ou ta hepaulula nge moipafi yovanhu,+ naame ohandi ke mu hepaulula yo moipafi yaTate oo e li meulu.+
33 Ashike ou te lidimbike nge moipafi yovanhu, naame ohandi ke mu lidimbika yo moipafi yaTate oo e li meulu.+
34 Inamu diladila kutya onde uya okweeta ombili kombada yedu; inandi uya okweeta ombili, ndele eongamukonda.+
35 Osheshi onde uya okweeta etukauko; omulumenhu ota pataneke xe, omonakadona ota pataneke ina, noshitenya shomukainhu otashi pataneke inamweno.+
36 Oshoshili, ovatondi vomunhu otava ka kala ovo vomeumbo lavo.
37 Keshe ou e hole unene xe, ile ina komesho yange, ina wapalela nge; nakeshe ou e hole unene omonamati, ile omonakadona komesho yange, ina wapalela nge.+
38 Nakeshe ou ita kufa omuti waye womahepeko,* ndele ta shikula nge, ina wapalela nge.+
39 Keshe ou ta kendabala okuxupifa omwenyo waye ote u kanifa, nakeshe ou ta kanifa omwenyo waye omolwange ote ke u mona.+
40 “Keshe ou te mu tambula, aame yo a tambula, nakeshe ou a tambula nge, okwa tambula yo Ou a tuma nge.+
41 Ndele keshe ou ta tambula omuprofeti, molwaashi e li omuprofeti, ota ka pewa ondjabi yomuprofeti,+ nakeshe ou ta tambula omuyuki, molwaashi e li omuyuki, ota ka pewa ondjabi yomuyuki.
42 Nakeshe ou ta pe umwe womwaava vanini nande eholo ashike lomeva matalala okunwa, molwaashi e li omuhongwa, oshili, ohandi mu lombwele, ita kala nande ina pewa ondjabi yaye.”+
Omashangelo opedu
^ Ile “omuladi.”
^ Ile “oshikutu sha wedwa po.”
^ Omambungu oludi eli okwa fa kavandje.
^ Ile “ou te lididimike.”
^ Edina limwe laSatana, ohamba, ile omupangeli, weendemoni.
^ Tala Omafatululo oitya.
^ Eln., “no-assarion.” Tala Oshiw. B14.
^ Tala Omafatululo oitya.
