Evaengeli paMateus 14:1-36
14 Pefimbo opo Herodes, omupangeli woshitukulwalongo* shaGalilea, okwa uda onghundana i na sha naJesus,+
2 ndele ta lombwele ovapiya vaye ta ti: “Oo oJohannes Omuninginifi. Okwa nyumuka koufi, nomolwaasho ta longo oilonganghono ya tya ngaho.”+
3 Herodes* okwa li a kwatifa po Johannes noku mu mangifa po, noku mu tulifa modolongo omolwaHerodias, omukulukadi wamumwaina, Filippus.+
4 Osheshi Johannes okwa li he mu lombwele ta ti: “Kashi li pamhango u hombole omukainhu oo.”+
5 Ndele nonande okwa li a hala okudipaa Johannes, okwa li a tila ongudu yovanhu, molwaashi ova li va tala ko Johannes e li omuprofeti.+
6 Ndele fimbo kwa li taku danwa edalo laHerodes,+ okamonakadona kaHerodias oka li taka dana oshidano poshivilo osho, noka li ka hafifa unene Herodes.+
7 Opo nee okwa udaneka nokwaana kutya ote ke ka pa keshe osho taka pula.
8 Ndele oka popya osho ka lombwelwa kuina ka ti: “Pe nge omutwe waJohannes Omuninginifi moshiyaxa.”+
9 Nonande ohamba oya li ya nyika oluhodi, oya yandja elombwelo ke u pewe omolweano olo ya ninga nomolwaavo va li tava li* pamwe nayo.
10 Opo nee oya tuma omukwaita a ka tete ko omutwe waJohannes modolongo.
11 Omutwe waye owa li wa etwa u li moshiyaxa, ndele tau pewa okakadona, opo nee oke u twaalela ina.
12 Konima yaasho, ovahongwa vaye ova ya, ndele tava kufa po oshimhu shaye, noku shi paka. Opo nee ova ya, ndele tave shi lombwele Jesus.
13 Eshi Jesus e shi uda, okwa londa mowato nokwa ya konhele ye likalela, opo a ka kale oye aeke. Ndele eshi eengudu dovanhu de shi uda, ode mu shikula kolupadi da dja moilando i lili noku lili.+
14 Eshi e uya komunghulofuta, okwa mona ongudu inene yovanhu, ndele okwa li e i kenukila+ nokwa velula ovanaudu vavo.+
15 Ndele eshi taku toko, ovahongwa vaye ove uya kuye, ndele tava ti: “Onhele ei oye likalela, nokwa toka nale; lekela eengudu dovanhu, opo di ye momikunda di ke lilandele oikulya.”+
16 Opo nee Jesus okwa tya kuvo: “Inava pumbwa okuya; va peni sha shokulya.”
17 Ova tya kuye: “Katu na po sha apa, kakele komingome nhano neeshi mbali.”
18 Okwa ti: “Di eteni kwaame.”
19 Okwa lombwela eengudu dovanhu di kale omutumba pomwiidi. Opo nee okwa kufa omingome nhano neeshi mbali, nokwa tala keulu, ndele ta ilikana,+ nokonima eshi e di pambula, okwe di pa ovahongwa, novahongwa ove di yandja keengudu dovanhu.
20 Onghee aveshe ova lya nova kuta, nova toola po oundjaumukile vomingome, va yadeka oimbale 12.+
21 Ovo va lya ova li ovalumenhu 5 000 lwaapo nosho yo ovakainhu nounona.+
22 Opo nee okwa lombwela diva ovahongwa vaye va londe mowato, nove mu tetekele kombinga ikwao yefuta, ofimbo ye ta lekele eengudu dovanhu.+
23 Konima eshi a lekela eengudu dovanhu, okwa ya komhunda oye aeke a ka ilikane.+ Ndele okwa kala ko oye aeke fiyo osheshi kwa toka.
24 Pefimbo opo owato oya li kokule unene nomutunda oshinano shonhumba,* noya li tai kondjifwa komakufikufi omolwomhepo oyo ya li tai va dilile komesho.
25 Ashike penangelo etine loufiku* okwe uya kuvo, ta ende kombada yomeva.
26 Eshi ovahongwa ve mu mona ta ende kombada yomeva, ova li va tila unene, ndele tava ti: “Oshifalakanena osho!” Nova ingida mokule omolwoumbada.
27 Opo nee Jesus okwe va lombwela a ti: “Kaleni mu na ouladi! Aame; inamu kala mwa tila.”+
28 Petrus okwe mu nyamukula ta ti: “Omwene, ngeenge oove, lombwele nge ndi uye kwoove handi ende kombada yomeva.”
29 Jesus okwa ti: “Ila!” Opo nee Petrus okwa dja mo mowato, ndele ta ende kombada yomeva a finda kuye.
30 Ndele eshi a tala koshikungulu shomhepo, okwa kwatwa koumbada. Naashi a hovela okuningina, okwa ingida ta ti: “Omwene, xupife nge!”
31 Jesus okwa nana diva eke laye, te mu kwata, ndele ta ti kuye: “Omunaitavelo linini ove, omolwashike wa limbililwa?”+
32 Konima eshi va ya mowato, oshikungulu shomhepo osha lota.
33 Opo nee ovahongwa ovo va li mowato ove linyongamena kuye* tava ti: “Ove Omona waKalunga shili.”
34 Ova taulula efuta, ndele tava ka fika kuGenesaret.+
35 Eshi ovanhu vomoshitukulwa osho ve mu dimbuluka, ova tuma etumwalaka moshitukulwa ashishe, novanhu ova li ve mu etela ovanaudu vavo aveshe.
36 Nove mu indila va kwate ashike nande okonyemba yoshikutu shaye shokombada,+ naaveshe ovo va kwata ko ova li va veluka filufilu.
Omashangelo opedu
^ Eln., “omupangeli woshitine shoshilongo.”
^ Sha hala okutya, Herodes Antipas. Tala Omafatululo oitya.
^ Ile “omutumba poshitaafula.”
^ Eln., “shee-stadia 60.” O-stadium imwe oi fike peemeta 185. Tala Oshiw. B14.
^ Sha hala okutya, 3:00 yokeengulasha lwaapo fiyo 6:00, eshi etango tali piti.
^ Ile “ove mu twila eengolo.”
