Evaengeli paMateus 27:1-66
27 Ongula eshi kwa sha, ovapristeri ovakulunhu aveshe novakulunhu voshiwana ova kundafana, opo va dipae Jesus.+
2 Konima eshi ve mu manga, ove mu twala kuPilatus, oo a li ngoloneya.+
3 Opo nee Judas, oo e mu kengelela, eshi a mona kutya Jesus okwa tokolwa, okwe lipa oushima, ndele ta shunifa oimaliwa oisilveri 30 kovapristeri ovakulunhu nokovakulunhu+
4 ta ti: “Onda nyona, eshi nda kengelela omulumenhu ehe na etimba.”* Ova ti: “Osho otu na shike nasho? Tala kutya oto ningi po shike!”*
5 Onghee okwa ekela oisilveri motembeli, ndele ta di mo. Opo nee okwa ya e ke limangeleke.+
6 Ovapristeri ovakulunhu ova kufa po oisilveri, ndele tava ti: “Kashi li pamhango oku i tula moshikefa shiyapuki, osheshi oyo ofuto yohonde.”
7 Konima eshi va kundafana, oimaliwa oyo ove i landa po epya lomuhongi woitoo li ninge onhele yokupaka ovanailongo.
8 Onghee onhele oyo ohai ifanwa Epya lOhonde+ fiyo okunena.
9 Kungaho, osho sha li sha popiwa okupitila momuprofeti Jeremia osha wanifwa, eshi a ti: “Ova kufa oisilveri 30, ondado yomulumenhu, oyo ovana vamwe vaIsrael va dimina oku mu landa po.
10 Ndele ove i landa po onhele, ngaashi Jehova* a lombwela nge.”+
11 Jesus okwa li ofika koshipala shangoloneya, na ngoloneya okwe mu pula a ti: “Oove Ohamba yOvajuda?” Jesus okwa ti: “Osho naanaa ngaashi wa popya.”+
12 Ndele eshi a li ta hokololifwa kovapristeri ovakulunhu nokovakulunhu, ina nyamukula sha.+
13 Opo nee Pilatus okwa tya kuye: “Ku udite ko hano oinima ihapu oyo to hokololifwa?”
14 Ashike naye ine mu nyamukula sha, onghee ngoloneya oo okwa li a kumwa neenghono.
15 Osha li onghedindjikilile poshivilo keshe shopaasa ngoloneya a mangulule omunadolongo umwe oo ongudu yovanhu ya hala a mangululwe.+
16 Pefimbo opo ova hangika ve na mo omunadolongo omukolokoshi wedina Barabas.
17 Onghee eshi va ongala, Pilatus okwa tya kuvo: “Olyelye mwa hala ndi mu mangululile, oBarabas, ile oJesus, ou taku tiwa oKristus?”
18 Osheshi Pilatus okwa li e shi shii kutya ove mu yandja momake aye omolwondubo.
19 Ndele fimbo e li omutumba kolukalwatokolo, omukulukadi waye okwe mu tumina etumwalaka ta ti: “Omulumenhu oo omuyuki ino mu ningila sha, osheshi onda twa ondjodi kombinga yaye, noya tilifa nge neenghono.”
20 Ashike ovapristeri ovakulunhu novakulunhu ova xwaxwameka eengudu dovanhu di pule di mangululilwe Barabas+ nokudipaifa Jesus.+
21 Ngoloneya okwe va pula vali ta ti: “Pwaava vavali, olyelye mwa hala ndi mu mangululile?” Ova tya: “OBarabas.”
22 Pilatus okwa tya kuvo: “Oshike ndi na okuningila Jesus, ou taku tiwa oKristus?” Aveshe ova ti: “Na valelwe komuti!”*+
23 Okwa ti: “Omolwashike? Okwa longa owii washike?” Ova twikila okwiingida mokule: “Na valelwe komuti!”+
24 Eshi Pilatus a mona kutya eenghendabala daye inadi kwafa sha, ndele ponhele yaasho eweelelo ola ya ashike pombada, okwa kufa omeva, ndele ta kosho omake aye moipafi yongudu yovanhu ta ti: “Ame nghi na etimba lohonde yomulumenhu ou. Taleni kutya otamu mu ningi ngahelipi.”
25 Ovanhu aveshe ova nyamukula tava ti: “Ohonde yaye nai uye kombada yetu nokombada yovana vetu.”+
26 Opo nee okwe va mangululila Barabas, ndele okwa dengifa Jesus+ nokwe mu yandja a ka valelwe komuti.+
27 Opo nee ovakwaita vangoloneya ova twala Jesus meumbo langoloneya, nova ongaleka etangakwaita alishe le mu dingilila.+
28 Opo nee ove mu dula, noku mu kambeka elapi litilyana,+
29 ndele tava tungu oshishani shomakiya noku shi tula komutwe waye, ndele tave mu pe olumbungu meke laye lokolulyo. Opo nee ove mu twila eengolo, tave mu sheke tava ti: “Kundwa,* ove Ohamba yOvajuda!”
30 Ndele ove mu fiila omate+ nova kufa olumbungu, ndele tava hovele oku mu denga komutwe.
31 Konima eshi ve mu sheka, ove mu dula elapi, ndele tave mu dike oikutu yaye yokombada noku mu twala a ka valelwe komuti.+
32 Ndele fimbo tava i, ova shakeneka omulumenhu Omukireni wedina Simon. Omulumenhu oo ove mu fininika a humbate omuti womahepeko* waJesus.+
33 Eshi va fika ponhele hai ifanwa Golgata, sha hala okutya, Onhele yOmakolotwe,+
34 ova pa Jesus a nwe omaviinyu a lumbakanifwa nonyango,*+ ndele eshi e a makela, okwa anya oku a nwa.
35 Eshi ve mu valela komuti, ove litukulila oikutu yaye yokombada ve i umbila oihoololifo,+
36 nova kala omutumba opo, opo ve mu pashukile.
37 Pomutwe waye ova tula po yo okapapa ka shangwa etomheno kutya omolwashike a dipawa, tali ti: “Ou oJesus, Ohamba yOvajuda.”+
38 Opo nee ovakolokoshi vavali ova valelwa komuti pamwe naye, umwe okolulyo laye naumwe okolumosho laye.+
39 Naavo va li tava ende po ova li tave mu sheke,+ tava pukapuka komitwe davo,+
40 notava ti: “Owa tile oto ngumauna po otembeli noku i tungulula moule womafiku atatu,+ lixupifa ove mwene! Ngeenge ove omona waKalunga, dja ko komuti womahepeko!”*+
41 Ovapristeri ovakulunhu pamwe novanongo vomishangwa nosho yo ovakulunhu navo ova li va hovela oku mu sheka tava ti:+
42 “Okwa li ha kwafa vakwao, ndele ye mwene ita dulu okulikwafa! Oye Ohamba yaIsrael;+ na dje ko paife komuti womahepeko,* opo nee ohatu ke mu itavela.
43 Okwe lineekela Kalunga; ne mu xupife, ngeenge okwe mu hokwa,+ osheshi okwa ti, ‘Ame Omona waKalunga.’”+
44 Nokuli novakolokoshi ovo va li va valelwa pamwe naye ova li tave mu sheke.+
45 Okudja potundi onhihamano* edu alishe ola li la laula, fiyo opotundi onhimuwoi.*+
46 Lwopotundi onhimuwoi, Jesus okwa ingida mokule ta ti: “Eli, Eli, lama sabaktani?” sha hala okutya, “Kalunga kange, Kalunga kange, omolwashike wa ekela nge shi?”+
47 Eshi vamwe ovo va li va fikama opo ve shi uda, ova ti: “Omulumenhu ou ota ifana Elia.”+
48 Diva umwe womuvo okwa tondoka, ndele ta kufa okayavo noku ka yaveka momaviinyu malula, ndele te ka tula kolumbungu noku mu pa a nwe.+
49 Ndele vakwao ova tya kuye: “Mu efeni! Natu taleni, ngeenge Elia ote uya e mu xupife.”
50 Natango Jesus okwa ingida mokule, opo nee okwa fya.+
51 Ndele tala! etukulifolapi lomonhele iyapuki+ ola li la tauka pokati,+ okudja pombada fiyo opedu,+ nedu ola kakama, nomamanya okwa tatauka.
52 Neembila* oda li da yeuluka, noimhu ihapu yovayapuki, ovo va fya, oya umbwa mo,
53 (novanhu ovo va dja mokati keembila, konima eshi Jesus a nyumuka, ova ya moshilando shiyapuki),* nova monika kovanhu vahapu.
54 Ashike eshi omukulunhu wetangakwaita naavo va li naye va nangela Jesus va mona ekakamo ledu noinima oyo ya li tai ningwa, ova li va tila neenghono, ndele tava ti: “Ou okwa li shili Omona waKalunga.”+
55 Novakainhu vahapu, ovo va li pamwe naJesus tave mu yakula okudja kuGalilea, ova li oko tava tale ve li kokule;+
56 mokati kavo omwa li Maria Magdalena naMaria, ina yaJakob naJoses, nosho yo ina yovanamati vaSebedeus.+
57 Ndele molwaashi osha li efimbo lokomatango, opa li pe uya omulumenhu oshipuna wokuArimatia wedina Josef, oo naye a li omuhongwa waJesus.+
58 Omulumenhu oo okwa ya kuPilatus, ndele ta pula a pewe oshimhu shaJesus.+ Opo nee Pilatus okwa yandja elombwelo e shi pewe.+
59 Josef okwa kufa oshimhu, ndele te shi dingile melapi londilo liyela loliina iwa,+
60 ndele te shi tula mombila* yaye ipe,+ oyo a li a hoka memanya. Nokonima eshi a undulila emanya linene poshivelo shombila,* okwa ya.
61 Ashike Maria Magdalena naMaria mukwao opo va kala ve li omutumba komesho yombila.+
62 Efiku la landula ko, olo la li efiku lElilongekido,+ ovapristeri ovakulunhu nOvafarisai ova li va ongala koshipala shaPilatus
63 tava ti: “Omufimanekwa, otwa dimbuluka kutya omupukifi winya, eshi a li e na omwenyo okwa tile, ‘Ohandi ka nyumuka konima yomafiku atatu.’+
64 Onghee hano yandja elombwelo, opo ombila i nangelwe fiyo efiku etitatu, opo ovahongwa vaye vehe mu vake mo,+ ndele tava ti kovanhu, ‘Okwa nyumunwa koufi!’ Opo nee epukifo olo laxuuninwa otali ka kala lii li dule linya lotete.”
65 Pilatus okwa tya kuvo: “Kufeni ovanangeli va ka nangele ombila.”
66 Onghee ova ya, ndele emanya olo la idila kombila tave li undulile po nawanawa nokutula po ovanangeli.
Omashangelo opedu
^ Eln., “ohonde ihe na etimba.”
^ Ile “Oo oupyakadi woye mwene!”
^ Ile “Na dipaelwe komuti!”
^ Ile “Fimanekwa.”
^ Tala Omafatululo oitya.
^ Oshikunwa shilula.
^ Tala Omafatululo oitya.
^ Tala Omafatululo oitya.
^ Sha hala okutya, 12:00 womutenya lwaapo.
^ Sha hala okutya, 3:00 yomutenya lwaapo.
^ Ile “Neembiladimbuluko.”
^ Eendjovo odo di li moikondekifo otadi ulike koiningwanima oyo ya ka ningwa lwanima.
^ Ile “mombiladimbuluko.”
^ Ile “shombiladimbuluko.”
